Elder O. Vincent Haleck

Ena Vitusagavulu

Ni se gone sara a dau saumi ikatini, lolo, ka vulica na ivolanikalou o Elder Otto Vincent Haleck—a qai sota kei rau na daukaulotu ka papitaiso.

O tinai Elder Haleck e lewe ni Lotu ia sa vakayabaki na nona sega tu ni lotu. E sega ni lewe ni Lotu o tamana. Io eratou dau saumi ikatini na nona matavuvale, lolo e veimacawa, wilika e veisiga na iVolatabu, ka solia na veika e tu vei iratou vei ira era vakaleqai tu. E lako mai ena dua na isolisoli ni vakabauta o Elder Haleck.

A sucu o Elder Haleck ena Janueri ni 1949 mai Samoa Vakaamerika. Erau a vakauti koya na nona itubutubu o Otto kei Dorothy me laki vuli ki California e Amerika. Ni yabaki 17, e raica ni so na nona itokani gonevuli ni matanitu era duatani mai vei ira tale eso. “Era sureti au ki na Muavata, ka sa guilecava na vo ni ka,” e kaya o Elder Haleck.

A rawata o Elder Haleck na koroi ni bachelor ena kacivaki ivoli kei na volivolitaki. E taukena e vica na bisinisi mai Samoa Vakaamerika ka vakaitavi ena veicakacaka ni kena vakailavotaki na veisasaga vivinaka eso. Erau a vakamau o Elder Haleck kei na watina o Peggy Ann Cameron, ena ika 29 ni June, 1972, ena Valetabu mai Provo e Utah. Erau nodratou itubutubu e tolu na gone.

Sa qai yaco ni ratou kunea na kosipeli na matavuvale taucoko nei Elder Haleck. A qai papitaisotaki tamana yabaki 80 o Elder Haleck ka raica na nona lesu mai ki na Lotu na tinana ni oti e 50 na yabaki ni bula vakawati.

Ni bera ni kacivi ki na iKarua ni Kuoramu ni Vitusagavulu, a veiqaravi vakadaukaulotu tudei ena Tabana ni Kaulotu na Samoa Apia, bisopi, lewe ni matabose e cake ni iteki, peteriaki, peresitedi ni iteki, ka se qai oti toka ga oqo vakaperesitedi ni Tabana ni Kaulotu na Samoa Apia.

E vakabauta o Elder Haleck ni kauti koya mai ki na vanua sa tu kina oqo na kila sa rawata mai na nona bula taucoko. “Au raica lesu na noqu bula, sa rawa niu kaya niu rawa ni raica na liga ni Turaga,” e kaya o Elder Haleck. “Au vakavinavinaka ka doka na nona veivakabauti ena vukuda na Turaga. Au lomana na Turaga kau nuitaka niu na dua na nona iyaya vinaka. Au kila ni na vukei au na Turaga.”