Na iLavovure ni Vuli e Vakavotukanataki Kina na Yalayala Vakaparofita
Ena tini na yabaki sa oti, a vakaraitaka kina o Peresitedi Gordon B. Hinckley (1910–2008) e dua na leqa—na nodra sega tiko ni rawata na lesu mai ena kaulotu kei ira eso tale na itabagone bula kilikili me ra tara cake na veika me ra dro tani kina mai na bula dravudravua—ka vakarautaka e dua na kena iwali: na iLavovure ni Vuli (LVV). E dua na ilavo cawiri ka rawa mai na nodra cau eso na lewenilotu kei ira na itokani ni Lotu, ena vakarautaka na LVV na dinau ni vuli vei ira na itabagone ka namaki kina me ra vakarautaki ira ki na veicakacaka vivinaka ena nodra veivanua ka ra sauma lesu tale mai me rawa ni mai donumaki ira tale eso na madigi vata oqori. E kaya ni na vakararavi na Lotu vei ira na voladia kei na ivurevure vaka-Lotu sa tu rawa me rawa vinaka kina.
Vakayacori na Cakamana
Ni kalawa yani ki na itutunivunau o Peresitedi Hinckley ena ika 31 ni Maji, 2001 ka vakaraitaka na raivotu ni iLavovure ni Vuli vei ira na matabete ena Lotu, sa ivakadinadina vei ira e lewe vuqa ni sa ciqoma na parofita ni Turaga na idusidusi.
A basika beka eso na ivakatakilakila ni na sega ni rawa ni yaco ena nodra sa kusa na iliuliu vovou ni LVV me tekivu na soli ni dinau ena vulaimago ni 2001, me vaka na veidusimaki nei Peresitedi Hinckley. Ena taudaku ni nona ituvatuva vakauqeti na parofita e sega ni dua na ituvatuva vakabisinisi, sega na vakatutu matailalai. A tauyavutaki na parokaramu ena kena vakayagataki na vosa ni koniferedi nei Peresitedi Hinckley me kena idusidusi. E tasoro yani e drau vakadrau na kere dinau ki na valenivolavola liu ni Lotu ni ra se qai kacivi tiko mada ga na dairekita ka tarai cake na kena yavu.
Ia sa yaco tiko na cakamana. Ena loma ga ni imatai ni yabaki, sa cauraki yani ki na parokaramu e milioni vakamilioni na dola. Era sa tu vakarau e vica na tamata ka ganiti ira sara ga vakavinaka na cakacaka ni LVV me vaka na nodra kila ka vakacakacaka me ra dairekita voladia. Na iyaragi e gadrevi me tokona na cicivaki ni LVV e vuravura raraba era sa cici rawa tu ena parokaramu ni yavulotu ena iVakarau ni Vuli ni Lotu kei na Valenivolavola ni iVurevure ni Veivakacakacakataki. Era babasika ga mai vakatotolo na veika kece e gadrevi, ka vakarautaki kina ena parokaramu na veika a qai tukuna ena Epereli ni 2002 o Peresitedi Hinckley me dua na “yavu tudei.”1
A kaya vaqo o Rex Allen, ka veiqaravi tiko ena gauna oqo vakavoladia dairekita ni veituberi kei na veitaratara ena LVV, “Ena dua na gauna balavu sa oti, a dodoka na nona ititoko o Mosese ka tawase na Wasa Damudamu. A vakatayaloyalotaka o Peresitedi Hinckley na vakabauta vata oqori ena nona dodoka na nona iyaragi vakaparofita ena wasawasa butobuto ni bula dravudravua ka vakavuna na LVV.”
“Oqo e dua na cakamana,” a vakadeitaka vakavica o Peresitedi Hinckley.
Ni oti e 10 na yabaki, e dina beka ni se qai tekivu tiko na veicakamana cecere.
Sa Vakayacori na Yalayala
Ena nona kacivaka na LVV kei na nona veivosa tale eso, a yalataka kina o Peresitedi Hinckley ni na drodro mai na LVV e vica vata na veivakalougatataki. Era sa vakayacori taucoko ka toso cake tikoga na kena totolo ni ra sa tauri ivola e vuqa ka ra vakaitavi ena LVV ka ra sa sauma lesu mai na nodra dinau.
Na Madigi kei na Cakacaka
“Ena rawa vei ira na [vakaitavi kina] me ra vuli vakavinaka ka ra laveti tani mai na bula dravudravua,” e kaya o Peresitedi Hinckley.2
Me yacova mai na Feperueri ni 2011, e voleka ni 90 na pasede vei ira na vaqara cakacaka ni sa oti mai na nodra vuli era sa kune cakacaka. E rauta ni 78 na pasede vei ira era sa cakacaka era kaya ni nodra cakacaka ena gauna oqo sa vinaka cake sara mai na kena ni ra se bera ni vuli. Na ivakatautauvata ni isau ni sa oti na vuli vei ira na vakayagataka na LVV e rauta ni vakatolu se vakavataki na kena ni ra se bera ni vuli, sa dua kina na toso levu ena kedra ituvaki vakailavo.
Matavuvale kei na iTikotiko
“Era na vakamau ka toso ki liu ena kila vakacakacaka ka na rawa kina ni rawa ka vakavinaka ka ra tu ena veitutu vakaitikotiko me ra cau kina vakalevu sara,” e kaya kina o Peresitedi Hinckley.3 E sivia ga vakalailai na dua na ikatolu ni iwiliwili ni vakaitavi ena LVV era sa vakamau ena gauna oqo.
E kaya o Elder John K. Carmack, na dairekita liu ni LVV: “E dua na ka veivakayaloqaqataki e vu mai na LVV sai koya na kena sa kune na inuinui vei ira na itabagone. Na inuinui oqori e solia vei ira na yalo me ra vakamau ka toso ki liu ena nodra bula.”
Ni ra vakayacora vakakina, era sa nanamaki kina na nodra matavuvale ki na veisiga ramase mai liu.
Lotu kei na Veiliutaki
“Ni ra lewe ni Lotu yalodina, era na sauma na nodra ikatini kei na isolisoli, ka na kaukauwa cake kina na Lotu ena veivanua era tiko kina ena vukudra,” e kaya o Peresitedi Hinckley.4
Ena veivanua eso sa cici tiko kina na LVV me vica na yabaki, sa rauta ni 10 ki na 15 na pasede ni veiliutaki ni Lotu ena gauna oqo o ira na a vakaitavi ena LVV.
“Era sa veivakauqeti o ira era vakaitavi kina vei ira tale eso na itabagone me ra dinau ena LVV ka me ra lako tani mai na bula dravudravua,” e kaya o Rex Allen. “Ni oti e 10 na yabaki eda raica ni sa rabailevu cake na iwirini ni inuinui ena nodra sa wasea na veivakalougatataki o ira era sa vakalougatataki vei ira na kena vo.”
Revurevu ena Nodra Bula e Vuqa
“Ena yaco [na LVV] me ka ni veivakalougatataki vei ira ena tara yani na nodra bula—vua na cauravou kei na goneyalewa, ki na nodrau matavuvale mai muri, ki na Lotu ka na vakalougatataki ena qaqa ni nodra veiliutaki ena nodra veivanua,” e yalataka o Peresitedi Hinckley.5
E sivia ni 47,000 na tamata era sa vakaitavi ena LVV me tekivu mai na vulaimago ni 2001. Oqori e sega ni wili kina o ira na lewe ni matavuvale era sa tokoni ka vakauqeti tiko mai vei ira na lewe ni matavuvale era vakaitavi ena LVV, na veitabanalevu kei na tabana ka na yaga vei ira na nodra veiqaravi kei na cau vivinaka, kei na bula vakailavo ena veivanua ni ra gadrevi o ira sa tu vei ira na kila vakacakacaka me rawa ni tubu cake kina.
“Vakasamataka na kena rabailevu ni o raici ira ena tarai ira na kena revurevu,” e kaya o Baraca Allen. “Oqo ena yaco yani vei ira era cau ki na LVV—o ira na cau, nodra matavuvale, nodra tabanalevu kei na tabana—era na vakalougatataki taucoko mai na nodra cau.”
“Sa toka ena iqaqalo ni liga ni Yalododonu Edaidai yadua na nona rawa ni solia e veigauna e dua na ka ki na ilavo oqo ka vakakina ki na veisasaga yaga tale eso,” e kaya o Elder Carmack. “na nona veisureti o Peresitedi Hinckley era vukei kina o ira era cau ki na LVV ka vakakina o ira [era vakayagataka] me ra vakatorocaketaki ira kina ka toro voleka vua na iVakabula.”
Tomani na Tubu
Sa qai matata mai na raivotu vakaparofita nei Peresitedi Hinckley me baleta na iLavovure ni Vuli ni sa teteva yani na vuravura raraba na veivakauqeti ni parokaramu vakauqeti oqo, ena toso tikoga na kena kilai ni sa toso tikoga na cau ka saumi lesu na dinau, ka na rawa kina vei ira na itabatamata vou era na vakayagataka me ra vakatorocaketaki ira kei na kedra ituvaki.
Mo ni kila eso tale na ka me baleta na iLavovure ni Vuli yalovinaka lako ki na pef.lds.org.
Na iLavovure ni Vuli, ka tekivu ena 10 na yabaki sa oti, sa vukei ira e 47,000 era vakaitavi kina.
iTaba mai vei Brian Wilcox