Elder LeGrand R. Curtis Jr.

Ena Vitusagavulu

E kila o Elder LeGrand Raine Curtis Jr. ni “gadreva na Turaga na yalo sa malumalumu ka talairawarawa” (V&V 64:34).

“E taleitaka o koya na veiqaravi ena Lotu, ka dau vakayacora vakakina ena cakacaka vakaukauwa kei na ivakarau ni bula e lomasoli,” e kaya na watina o, Jane Cowan Curtis, ka a vakamautaka ena Valetabu e Salt Lake ena ika 4 ni Janueri, 1974. “E dau diva o koya na veiqaravi ka nona gagadre levu duadua.”

A sucu o Elder Curtis ena Okosita ni 1952, mai Ogden, Utah e Amerika vei rau o LeGrand R. kei Patricia Glade Curtis. A yaco o tamana ena dua na gauna e muri me lewena na iKarua ni Kuoramu ni Vitusagavulu (1990–95).

Ni bera ni kacivi ki na iMatai ni Kuoramu ni Vitusagavulu, a veiqaravi o Elder Curtis Jr. ena Tabana ni Kaulotu na Italy North ka bisopi, lewe ni matabose e cake, peresitedi ni iteki, peresitedi ni Tabana ni Kaulotu e Italy Padova, ka Vitusagavulu ni iWasewase. A veiqaravi tiko ena iKalima ni Kuoramu ni Vitusagavulu ena iWasewase e Salt Lake City ena gauna e kacivi kina ki na iMatai ni Kuoramu.

A tauri ivola mai na Brigham Young University o Elder Curtis ena koroi ni economics ka rawata na nona juris doctorate mai na Univesiti e Michigan. Ena gauna e kacivi kina, a cakacaka tiko vakaloya ka itokani ena dua na kabani ni loya. Me ikuri ni lako tiko ki vuli kei na cakacaka, erau sa susuga cake o Elder Curtis kei na watina e lima na gone.

Ni oti na nona veiqaravi ena Vitusagavulu ni iWasewase mai na 2004 ki na 2011, e kaya o Elder Curtis ni dau taleitaka na madigi me cakacaka vata kei ira na Vitusagavulu ni iWasewase. “Au sa vakalougatataki ena noqu cakacaka vata kei ira eso na iliuliu uasivi ena Lotu,” e kaya o koya. “Sa dua na galala cecere me da saravi ira ka vuli mai vei ira.”

E kaya o Sisita Curtis ni dau tu vakarau o Elder Curtis ena ligana kei na yalona. “Na nona ivakarau ni bula e dau, ‘Au na cakava,’” e kaya o koya.

Na Vunau kei na Veiyalayalati 64:34 e tini ena veimalanivosa oqo: “Ia ko ira sa yalomalumalumu ka talairawarawa era na kania na veta ni vuata ena vanua ko Saioni ena siga mai muri.” Erau kaya o Baraca kei Sisita Curtis ni ratou sa vakalougatataki vakavinaka sara kei ira na luvedrau kei na makubudrau ena nodra qarava na Turaga.