Tauyavutaki ni Matavuvale ka Kena iTakele o Karisito
Eda kila ka vakabauta na ituvaki tawamudu ni matavuvale. Na kila kei na vakabauta oqori ena vakauqeti keda meda cakava na veika kece eda rawata ena noda kaukauwa meda tauyavutaka kina e dua na matavuvale ka kena itakele o Karisito.
Ena itekivu ni noqu veiqaravi vakadaukaulotu cauravou ena tabana ni kaulotu e Uruguay kei Paraguay au raica kina ni dua na idre levu vei ira era vinakata tiko me ra kila e vuqa na ka me baleta na Lotu i Jisu Karisito ni Yalododonu Edaidai sai koya na nodra taleitaka na ivunau me baleta na matavuvale. Io na ka dina, ni tekivu ena kena vakalesuimai na Kosipeli i Jisu Karisito, sa dau lauti ira na dauvaqara na dina na ivunau ni rawa ni bula vata na matavuvale me tawamudu.
E dua na tiki bibi sara ni Nona ituvatuva cecere na Tamada Vakalomalagi me baleti ira na Luvena o ya na ivakavuvuli ni matavuvale tawamudu. Na ivakadei ni ituvatuva o ya na noda kila ni tiko na noda matavuvale vakalomalagi ka tiko talega na noda matavuvale vakavuravura. E vakavuvulitaka o Paula na iApositolo ni tama ni yaloda na Tamada Vakalomalagi:
“Me ra vakasaqara na Kalou … ka kunea, …
“Ni da sa bula vei koya, ka yavala, ka rawata mai vua na noda bula; … Sa nona kawa talega koi keda.”1
E dua na ivakavuvuli taumada ni kosipeli i Jisu Karisito sai koya ni da nona kawa e dua na Tamada Vakalomalagi dauloloma, o ira sara mada ga na noda lalai era dau kacivaka na kena dina ena nodra lagata na sere ni lalai, “Au Luve ni Kalou.” Nanuma na qaqana?
Au luve ni Kalou,
E a talai au mai,
Au sucu ka susugi mai
Ka dau karoni tu.
Ni da kila ni tiko e dua na noda matavuvale vakalomalagi ena vukei keda meda kila na ituvaki ni noda matavuvale vakavuravura. E vakavulica vei keda na Vunau kei na Veiyalayalati ni sa ka taumada ena ivakarau vakalomalagi na matavuvale: “Raica ena laki dei tale tu ga mai kea na ivakarau ni noda veimaliwai tu eke; ia sa na uasivi ka lagilagi sara mai kea.3
Na noda kila na ituvaki tawamudu ni matavuvale sa tiki bibi sara ni noda kila na nona ituvatuva tawamudu na Tamada Vakalomalagi me baleti ira na Luvena. Ia, ena yasana kadua, e segata tiko na meca ena nona kaukauwa taucoko me vakarusa na nona ituvatuva na Tamada Vakalomalagi. Ena nona sasaga me vakadruka na ituvatuva ni Kalou, sa liutaka tiko kina e dua na ivakarau vou me ravuta kina na matavuvale. Eso na iyaragi kaukauwa e vakayagataka tiko ena nona ravuravu sai koya na sega ni veinanumi, kocokoco, kei na iyaloyalo vakasisila.
E sega. ni oka ena nona inaki o Setani na noda marau tawamudu. E kila o koya ni dua na idola bibi me ra rarawa kina vakataki koya na tagane kei na yalewa sai koya me vakuwai ira mai na isema vakamatavuvale ka na rawati kina na tawamudu. E kila tiko o Setani ni na kune ena matavuvale na marau dina ena bula oqo kei na veigauna tawamudu, sa cakava tiko na veika kece ena nona kaukauwa me vakarusa.
Na parofita ni gauna makawa o Alama e vakatoka na Nona ituvatuva na Kalou me baleti ira na Luvena me “yavu cecere ni veivakabulai.”4 Eratou sa solia mai vei keda na Mataveiliutaki Taumada kei na Kuoramu ni iApositolo Le Tinikarua, ka da dau tokoni ira me ra parofita, daurairai, ka dauvakatakila, na ivakasala vakauqeti oqo me baleta na marau kei na bula vakamatavuvale: “Na matavuvale e lewa vakalou. Sa yaga ki na Nona ituvatuva tawamudu na nodrau vakamau e dua na tagane kei na yalewa. E nodra dodonu na gone me ra mai sucu ena loma ni ivau vakaveiwatini, ka me ra susugi cake mai vua e dua na tama kei na tina ka ra dau rokova ena yalodina na nodrau yalayala. Ena rawati na bula marau ena matavuvale ni yavutaki ena ivakavuvuli i Jisu Karisito.”5
Na marau ka tukuna tiko o Alama kei iratou na Mataveiliutaki Taumada kei na Kuoramu ni iApositolo Le Tinikarua ena dua na gauna lekaleka sa oti e rawa ni vakadeitaki ni na kunei ena itikotiko e vakamatavuvale. Ena kunei vakalevu sara kevaka eda cakava na veika kece ena noda kaukauwa meda tara cake kina e dua na vuvale ka kena itakele na Karisito.
Keirau a vulica kei Sisita Maynes eso na ivakavuvuli bibi sara ena neirau tekivuna na iwalewale me tauyavutaki e dua na vuvale ka kena itakele na Karisito ni keirau se qai vakawati ga. Keirau tekivu ena neirau muria na nodra ivakasala na neirau iliuliu vaka-Lotu. Keirau kauti ira vata mai na luvei keirau ka vakayacori na lotu vakamatavuvale vakamacawa ka vakakina na masumasu kei na vuli ivolanikalou e veisiga. E sega ni dau rawarawa, logavinaka, se rawa vakavinaka e veigauna, ia ni toso na gauna sa yaco me gauna vakamareqeti ni matavuvale na gauna oqori.
Keirau vulica ni ra na sega beka ni nanuma na gone na veika kece me baleta na lesoni ni lotu vakamatavuvale ena loma ni macawa, ia era nanuma tiko ni a vakayacori. Keirau qai raica, ena loma ni siga e koronivuli eratou na sega beka ni nanuma na malanivosa yadua ni ivolanikalou se na masu, ia era na nanuma ni keitou a wili ivolanikalou ka masu. Kemuni na taciqu kei na ganequ, e tu na kaukauwa levu kei na veitaqomaki vei keda kei ira na noda itabagone ena noda tauyavutaka na veivalavala vakasilesitieli e vale.
Ena veivuke me tarai e dua na itovo ka rawa ni tiko kina na Yalotabu ena noda vulica, vakavulica, ka vakatovotovotaka na ivakavuvuli ni kosipeli i Jisu Karisito ena noda vuvale. Ena kena tauyavutaki na ivalavala vakasilesitieli oqo ena noda veivale ena rawa kina vei keda meda lakosivita na ivalavala sega ni dodonu ni vuravura ka vulica meda vakaliuca na nodra gagadre kei na nodra kauwai na tani.
Na itavi ni kena tauyavutaki e dua na vuvale ka kena itakele na Karisito e koto vei rau ruarua na itubutubu. Sa nodra itavi na itubutubu me ra vakavulici ira na luvedra ena loloma kei na buladodonu. Era na tarogi na itubutubu mai vua na Turaga ena ivakarau ni nodra qarava na nodra itavi tabu. Era vakavulici ira na luvedra o ira na itubutubu ena nodra vosa vakakina mai na nodra ivakaraitaki. Na serekali oqo nei C.C. Miller ka yacana na “The Echo” e vakaraitaka na kedra bibi kei na mana e tu vei ira na itubutubu ena nodra veivakayarayataki vei ira na luvedra:
‘Na sipi ka sega ni lami
A lakosese ena italanoa nei Jisu,
Na sipi levu ka lako sese
Mai na ciwasagavulu kaciwa.
Ia a cava meda vakasaqara kina na sipi
Ena nuinui kei na masu vagumatua?
Ni rerevaki ke lako cala na sipi:
Era na kauti ira sese na lami.
Dou kila ni lami ena muria na sipi,
Se evei ga e lako kina na sipi.
Ni lako cala na sipi,
Sega ni dede sa cala talega vakataki ira na lami.
Eda vakatakekere kina kei na sipi
Ena vukudra na lami edai,
Ni ra yali na sipi
Sa dredre dina
Na lami ena leqa kina.6
Na kena revurevu vei ira na itubutubu ka ra kauti ira tani na luvedra sa vakotora e matada na Turaga ena Vunau kei na Veiyalayalati: “Raica ko ira na itubutubu mai Saioni … erasegani vakavulici ira na luvedra ni ra sa yabaki walu, io na ivakavuvuli ni veivutuni, na vakabauti Jisu Karisito na Luve ni Kalou bula, na papitaiso kei na isolisoli ni Yalo Tabu ena veitabaki ni liga, … era na cudruvi kina.”7
E dredre meda vosa vakasivia ena bibi ni nodra vakavulica vei ira na luvedra na itubutubu na ivalavala vakasilesitieli ena vosa kei na ivakarau. E tiko talega na nodra itavi bibi na gone ena kena tauyavutaki e dua na vuvale me kena itakele na Karisito. Au wasea mada vei kemuni e dua na vosa lekaleka a wasea o Will, na makubuqu yabaki walu ka vakaraitaki kina na ivakavuvuli oqo:
“Au dau taleitaka na vodo ose ka coricori vata kei ta. Dau duidui na italitali ni dali me kaukauwa kina. Kevaka e dua walega na kena italitali, ena sega ni caka rawa kina na ka e gadrevi. Ia ni levu tu na ka me tali vata, sa rawa ni dau vakayagataki ena vuqa na sala ka na kaukauwa vinaka.
“E rawa ni vaka na dali na matavuvale. Kevaka e dua walega na tamata e cakacaka tiko vakaukauwa ka caka dodonu tiko ena sega soti ni kaukauwa sara na matavuvale me vaka na nodra cakacaka vata na tamata kece ka ra sasaga vata me ra veivukevukei.
“Au kila ena gauna au dau caka dodonu kina au sa vukea tiko na noqu matavuvale. Niu dau caka vinaka vei Isabelle, na ganequ, keirau dau marau vata ka rau marau kina o na kei ta. Kevaka e vinakata o na me caka e dua na ka, au rawa ni vukei koya ena noqu qito vata kei Joey, na taciqu lailai. Au rawa talega ni vukea na noqu matavuvale ena noqu samaka na noqu rumu ka veivuke ena yalomamarau ena gauna e rawa kina. Me vaka niu ulumatua ena noqu matavuvale, au kila ni sa ka bibi sara meu ivakaraitaki vinaka. Au rawa ni tovolea ena kena uasivi duadua meu digitaka na dodonu ka talairawarawa ki na ivakaro.
“Au kila ni rawa vei ira na gone me ra vukea me kaukauwa vaka e dua na dali kaukauwa na nodra matavuvale. Ni ra solia yadua na nodra igu ka cakacaka vata, era na marau ka kaukauwa na matavuvale.”
Ni ra vakatulewa na itubutubu ena nodra matavuvale ena loloma kei na bula dodonu ka vakavulica vei ira na luvedra na kosipeli i Jisu Karisito ena vosa kei na nodra ivakaraitaki, ka vakakina ni ra lomani ira ka tokoni ira na nodra itubutubu o ira na gone ena nodra vulica ka vakatovotovotaka na ivakavuvuli era vakavuvulitaka na itubutubu, sa na tauyavutaki kina na vuvale ka kena itakele o Karisito.
Kemuni na taciqu kei na ganequ, ni da lewena Na Lotu i Jisu Karisito ni Yalododonu Edaidai, eda kila ka vakabauta na ituvaki tawamudu ni matavuvale. Na kila kei na vakabauta oqori ena vakauqeti keda meda cakava na veika kece eda rawata ena noda kaukauwa meda tauyavutaka kina e dua na matavuvale ka kena itakele o Karisito. Au wasea vei kemuni na noqu ivakadinadina, ni da segata meda cakava oqo, sa na taucoko na noda vakayacora na loloma kei na veiqaravi ka a vakaraitaki ena Nona bula kei na Veisorovaki ni noda iVakabula, o Jisu Karisito, eda na vakila kina na lomalagi e vuravura ena noda matavuvale. Ena yaca i Jisu Karisito, emeni.