Hoko ko ha Taha Langa Fāmilí
Ko au ko e tangata langá, langa e fāmilí. (“Ko Hoku Fāmili Taʻengatá,” Fokotuʻutuʻu ki he Taimi Feʻinasiʻakí mo e Polokalama Sākalamēniti ʻa e Fānaú ʻi he Houalotu Sākalamēniti ki he 2009, 10–11).
Kuo ʻi ai ha taimi te mou fakakaukau ai ki he ngaahi fāmili ʻoku mou kau ki aí? ʻOku mahuʻinga ʻa e ngaahi fāmili kotoa ʻoku fakamatalaʻi he ngaahi peesi ko ʻení pea ʻoku nau tokoni ke mou tupulaki. Ki he fāmili takitaha, fili ha fakatātā ʻe ua ʻi lalo ʻokú ne fakahaaʻi ha founga ʻe lava ke ke hoko ai ko ha tokotaha ke langa hake ʻa e fāmilí.
Ko e Fāmili ʻo e Tamai Hēvaní
ʻOku ʻi ai hoʻo ongomātuʻa fakalangi haohaoa mo taʻefaʻamate ʻokú na ʻofa haohaoa ʻiate koe pea na ʻiloʻi e meʻa kotoa pē ʻoku hoko ʻi hoʻo moʻuí. Te ke kau maʻu pē koe ki he fāmili ko ʻení, pea pehē ki hono kotoa ʻo e fānau fakalaumālie kehe ʻa e Tamai Hēvaní. ʻA ia ʻoku ʻuhinga ʻeni ko ho tuongaʻane pe tuofefine fakalaumālie ʻa e tokotaha kotoa pē ʻi he māmaní.
Ko Ho Fāmilí
Ko e kakai ʻeni ʻokú ke ʻiloʻi lelei tahá—faʻeé, tamaí, ngaahi tuongaʻane, mo e tuofāfiné. Naʻe tuku koe ʻe he Tamai Hēvaní ʻi ha fāmili ke ʻi ai ha kakai ke nau ʻofa ʻiate koe, akoʻi koe, pea tokoni ke ke tupulaki.
Ko Ho Kāinga Ofí
ʻOku hoko kotoa e ngaahi kuí, kinautolu ʻokú ke tokoua ʻakí, ngaahi mehikitangá, mo e faʻētangatá ko e konga ʻo ho kāinga ofí. ʻOku tokolahi ange leva e kakai ke ke ʻofa aí!
Ko Ho Fāmili ʻi he Kahaʻú
ʻE hoko ʻa e tokotaha te ke mali mo ia ha ʻahó mo e fānau te mo maʻú ko e konga ʻo e fāmili mahuʻinga ʻaupito ko ʻení. Palani ke ke sila he temipalé pea moʻui ʻaki e ongoongoleleí ʻi ho ʻapí kae lava ke fakataha ho fāmilí ʻo taʻengata.
Ko Ho Fāmili ʻi he Siasí
ʻOku hangē pē e kāingalotu ʻo ho uōtí pe koló ko ha kau mēmipa ʻo ha fāmili ʻoku nau fetauhiʻaki mo fetokoniʻakí. ʻOku ui ʻe he kāingalotu ʻo e Siasí ʻa e tokotaha kotoa ko e “Tokoua” mo e “Tuofefine” he kuo ʻosi papitaiso kinautolu ki he ongoongolelei ʻo Sīsū Kalaisí. Ko e fuʻu fāmili pē ʻe taha ʻa e kāingalotu kātoa ʻo e Siasí ʻi he māmaní!
Tā fakatātaaʻi ʻe Adam Koford
ʻOku Talitali Lelei Koe ki he Palaimelí