ʻOku Mau Lea ʻia Kalaisi
Ko Hono Maʻu ʻo e Melinó ʻi he Ngaahi Taimi Faingataʻá
Mei he “Fiemālie Homou Laumālié,” Liahona, Nōv. 2010, 101–2.
“Haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu” (Mātiu 11:28).
ʻOku ʻi ai ha hala lahi he loto kolo ʻo Kōtenipeeki ʻi Suetení ʻoku fakaʻofoʻofa e ʻuluʻakau he ongo kauhalá. Ne u ʻilo ʻi ha ʻaho ʻe taha ha foʻi ava he fuʻu tefitoʻi ʻakau ʻe taha peá u fakasio ki loto ʻo ʻilo ʻoku ava kotoa.
Ne u ʻohovale he kei tuʻu ʻa e fuʻu ʻakaú. Ne u sio hake ki ha laʻi kapa naʻá ne takaiʻi e konga ki ʻolunga e sinoʻi ʻakaú, pea haʻi ki ai ha ʻū uaea ʻo fakamaʻu ki ha ngaahi fale ofi mai. Ne ʻasi tatau pē mo e ʻuluʻakau kehé mei he mamaʻó; ko ʻete toki sio pē ki loto pea ʻilo naʻe ava ka naʻe ʻikai ko ha sinoʻi ʻakau fefeka mo mālohi. Ne aʻu ki ha taimi ne ʻikai toe lava ke fakahaofi e fuʻu ʻakaú pea pau ke tuʻusi ia.
Kae hangē ko e tuputupu māmālie hake ha kiʻi fuʻu ʻakau ʻo hoko ko ha fuʻu ʻakau mālohí, te tau lava foki ʻo tupu māmālie hake ʻo fefeka, kuo fakafonu kitautolu mei loto ki tuʻa ʻo faikehekehe ia mo e fuʻu ʻakau naʻe ava ʻa lotó. Te tau maʻu e mālohi ke tuʻu hangatonu mo ʻaliʻaliaki ʻi he Fakalelei fai fakamoʻui ʻa Sīsū Kalaisí, pea ke fakafonu hotau laumālié—ʻaki e maama, mahino, fiefia, mo e ʻofa.
ʻOku mālohi ʻetau ʻamanakí ʻi he tui mo muimui ki he ngaahi akonaki ʻa Sīsū Kalaisí, ʻa ia ʻe hoko ko ha taula fefeka ki hotau laumālié. ʻE lava ke tau tuʻu maʻu mo taʻeueʻia. ʻE lava ke tau maʻu ha melino ʻoku tolongá ʻi hotau lotó; ʻe lava ke tau hū ki he mālōlōʻanga ʻo e ʻEikí. Ka tau tafoki mei he māmá mo e moʻoní, te tau ongoʻi ko e fuʻu ngeʻesi pē hotau laumālié, ʻo hangē ko e fuʻu ʻakaú.
Tau tokanga muʻa ki he ngaahi meʻa te nau tauhi ke tolonga e melinó ʻi he ʻatamaí mo e lotó. Pea “ʻe [toki] ʻāsili mālohi ʻa [ʻetau] falalá ʻi he ʻao ʻo e ʻOtuá” (T&F 121:45). ʻOku ʻikai fakataimi pē ʻa e talaʻofa ke hū ki he mālōlōʻanga ʻo e ʻEikí, mo maʻu e meʻafoaki ʻo e melinó. Ko ha meʻafoaki fakalangi moʻoni ia: “ʻOku ou tuku ʻeku melinó kiate kimoutolu, ko ʻeku melinó ʻoku ou foaki kiate kimoutolú: ʻoku ʻikai hangē ko e foaki ʻa māmaní ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia” (Sione 14:27). ʻOkú ne maʻu e mālohi ke fakamoʻui mo fakamālohia e lotó. Ko Sīsū Kalaisi Ia.
“Pea haʻu ʻa e kakai tokolahi kiate ia, pea nau ʻomi ʻa e pipikí, mo e kuí, mo e noá, mo e laveá, mo e tokolahi kehe, ʻo tuku ʻa kinautolu ki he vaʻe ʻo Sīsuú; pea fakamoʻui ʻe ia ʻa kinautolu:
“Ko ia naʻe ofo lahi ai ʻa e kakaí, ʻi heʻenau mamata kuo fakalea ʻa e noá, pea fakahaohaoa ʻa e laveá, pea fakaʻeveʻeva ʻa e pipikí, pea fakaʻā ʻa e kuí; pea nau fakamālō ki he ʻOtua ʻo ʻIsilelí” (Mātiu 15:30–31).
Fakaʻā ʻo e Kuí, tā ʻe J. Kirk Richards