Fakafeʻungaʻi ʻi he Ngāue he Siasí

Fai ʻe Alice A. Lewis

ʻOku pehē ʻi he Tohi Tuʻutuʻuni Fika 2: Ko Hono Puleʻi ʻo e Siasí, “ʻI hono tāpuekina ʻaki kinautolu e meʻaʻofa ʻo e tauʻatāina ke filí, ʻoku nau maʻu leva e faingamālie mo e fatongia ke fokotuʻu honau takitaha hala, fakaleleiʻi ʻenau takitaha palopalema, mo feinga ke moʻui fakafalala pē kiate kinautolu. ʻOku fakahoko ʻeni ʻe he kāingalotú ʻi he malumalu ʻo e fakahinohino fakalaumālie ʻa e ʻEikí pea mo e ngāue ʻa honau nimá” ([2010], 6.1.1)

Ko hoku taʻu 57 ia, pea toki ʻosi ʻeku veté, pea siʻi ʻeku taukei ngāué pea ne u fuʻu fie maʻu ʻaupito haʻaku ngāue. Kuó u ʻohake ha fānau ʻe toko fā, pea ko ʻeni kuó u toko taha pē hili ia haʻaku nofo mali ʻi ha taʻu ʻe 32, ko e kiʻi ako ia he kolisí naʻe siʻisiʻi peá u fuʻu tailiili ʻaupito ke kumi ngāue ʻi he taʻu motuʻa ʻoku ou ʻi aí.

Ne u tangutu ʻo tatali ki hoku ʻinitaviu ki he lakanga ko ha mataotao ʻi he faʻu taimi-tēpilé mo e polokalamá ʻi he laipeli fakavahé, mo ʻeku fakakaukau mahalo pē ʻoku ou vale ke fakakaukau te u feʻunga mo ha lakanga pehē. Feʻunga pē ʻeku fakakaukau ke u tuʻu ʻo ʻalú mo e ʻasi fakafokifā mai ʻa e sekelitalí ʻo talamai ʻoku nau tatali mai kiate au ʻi he loki konifelenisí. Ne u ongoʻi puke ka ne u tuʻu hake, fai ʻeku lotu lilo, peá u ʻalu atu.

Ne talamai ʻe ha ongomeʻa lea mahino mo anga fakapalofesinale ʻa hono mahuʻinga ʻo e taukei ʻi he ngaahi tafaʻaki pau ki he lakanga ko ʻení pea kamata ke na fakafehuʻi au fekauʻaki mo ʻeku taukei ngāué. Naʻe fie maʻu ki he ngāue ko ʻení ha taha naʻe lava ke ne fokotuʻutuʻu ha ngaahi konfelenisi lalahi ke fai, kau ai hono fai ʻo e ngaahi fanongonongó, ngaahi fakaafé, tokangaʻi e meʻatokoní, mo e fakamāʻopoʻopo hili e konifelenisí. Naʻá ku maʻu nai e taukei naʻe fie maʻú? Ne u fakakaukau au naʻe ʻikai ke u maʻu e taukei ko ʻení mo e fakafokifā ʻeku fakakaukau atu ki ha konifelenisi fakasiteiki ʻa e Fineʻofá. Naʻá ku tokoni ʻi he kau palesitenisī ʻo e Fineʻofa he siteikí. Pea ne u ako mei ai hono fokotuʻutuʻu ha ngaahi fakatahaʻanga lalahi mo e fakatau ʻo e meʻakai maʻá e ngaahi kulupu tokolahi. Naʻe lava ke u talaange totonu ʻeku taukei ʻi he meʻa naʻe fie maʻú.

Ne hoko atu e ongomeʻa fai ʻinitaviú: “ʻOkú ke poto lelei hono ngāue ʻaki ʻo e komipiutá? Te ke fai e ngaahi tohi ki ha kau pataloni pea ʻe fie maʻu ke fakataimi-tēpileʻi hono fakaʻaongaʻi ʻo e loki konifelenisí.” Ne u fakakaukau atu ki heʻeku houngaʻia ʻi he kakai naʻa nau akoʻi au ki hono ngāue ʻaki ʻo e komipiutá ʻo lava ai ke u faʻu ʻa e tohi fanongonongo mo e tohi māhina ʻa e uōtí pea faʻu mo e tohi ongoongo ʻa e siteikí. ʻIo, naʻá ku lava lelei ʻo ngāue ʻaki e komipiutá.

Naʻá na ʻeke mai, “ʻE fie maʻu ke ke faʻu ha ngaahi polokalama mo fokotuʻutuʻu ha ngaahi kalasi maʻá e kakaí. Te ke lava ʻo akoʻi ha ngaahi kalasi ki he fānaú mo e kakai lalahí?” Ne u manatuʻi hake e ngaahi kalasi tauhiʻapi mo e ngaahi ngāue fakameaʻa kotoa ne u fai mo e Kapi Sikautí (Cub Scout). Ne u fakamatalaʻi ange ʻa e ngaahi kalasi maʻá e fānaú mo e kakai lalahi kuó u akoʻi ʻi heʻeku moʻuí. Naʻá ku ʻiloʻi ʻeku lava ko ia ke fakakaukauʻi ha ngaahi meʻa foʻoú mo ʻeku poto he meʻa fakaʻātí peá u ongoʻi fakapapau te u lava ʻo faʻu ha ngaahi polokalama ʻe fakamānako ki he fānaú mo e kakai lalahí.

Ne u fiefia ʻi heʻeku maʻu e ngāué. Naʻá ku saiʻia ai mo feinga ke fai e meʻa tatau pē te u fai ʻi ha fatongia faka-Siasi: fakahoko totonu ʻeku ngāué, ngāue ʻo lahi ange ʻi he meʻa naʻe fie maʻú, pea ʻoua ʻe lāunga ka toe lōloa ange ʻeku ngāué he taimi ngāue totonú. Ne u faʻu ha ngaahi kalasi komipiuta ʻi he lea faka-Pilitāniá pea ʻomai ha talavou ʻoku kei ako ke ne akoʻi e ngaahi kalasí ʻi he lea faka-Sipeiní. Naʻá ku akoʻi e ngaahi kalasi ʻātí mo e ngāue fakameaʻá peá u fakaafeʻi mai mo ha kau faʻu tohi mo ha kakai lea ʻiloa. Naʻá ku teuteuʻi e laipelí ʻi he ʻaho mālōlō kotoa pē peá u fakaʻaliʻali e ngaahi tohi naʻe fekauʻaki mo e ʻaho mālōlō ko iá.

Naʻe telefoni ange ha taha ki he ngāué he ʻaho ʻe taha ʻo talaange ko ʻene tā mei he ʻōfisi ʻo e kōvaná ko e fie ʻilo pe te u fie ngāue ko ha tokoni ki he kōvaná. Ne u kata mo ʻeke ange, “Ko hai ʻeni?” Naʻá ne talamai ko e telefoni fakamātoato ʻeni mo ne fakaafeʻi au ke u ʻalu ange he ʻaho hono hokó ke fai hoku ʻinitaviu. Ne u ʻalu pē mo e tō hifo hoku lotó mahalo ko ha pauʻu ʻeni. Ka naʻe ʻikai. Ne lele lelei e ʻinitaviú, pea naʻe talamai he taimi pē ko iá ʻoku ou maʻu e ngāué.

Ne u fakaʻaongaʻi ʻi heʻeku ngāue foʻoú ʻa e ngaahi pōtoʻi ngāue ne u maʻu ʻi he ngaahi taʻu ko ia ne u lea ai ʻi he siasí. Naʻe ʻikai ke lava e kōvaná ʻo alu ki he ngaahi meʻa kotoa ko ia ne fakaafeʻi ia ki aí; ʻi heʻene peheé, naʻe pau ke ʻalu ʻene kau ngāué ʻo lea ko hono fakafofonga. Kuó u maʻu mei he ngaahi lea kuó u fai ʻi he siasí mo ʻeku ngāue ʻi he ngaahi tuʻunga fakatakimuʻá ʻa e taukei ne u fie maʻu ke u kaungā lea ai mo e kau sēnató, kakai tuʻunga māʻolunga fakalotofonua mo fakapuleʻangá, mo e kakai ʻiloá. Naʻá ku hoko ko e tokoni ki he kōvaná ʻi he taʻu ʻe fitu peá ma toki fakatou maʻu vāhenga mālōlō.

Ne u mei fēfē nai taʻekau ai ʻa e ngaahi taukei kehekehe ne u maʻu lolotonga ʻeku ngāue ʻi he ngaahi fatongia faka-Siasí? Kuo mohu tāpuekina ʻeku moʻuí ʻi he ngaahi meʻa kotoa pē ne u ako ʻi heʻeku hoko ko e kaunanga ʻa e ʻEikí ʻi Hono Siasí. ʻIkai ngata pē ʻi heʻeku tokoniʻi ʻa e niʻihi kehé lolotonga ʻeku ngāué, ka naʻá ku tupulaki lahi ʻaupito ai. ʻOku ou fakamālō lahi koeʻuhi ko e ongoongoleleí pea ʻoku ʻi ai ʻeku fakamoʻoni mālohi ki hono mahuʻinga ʻo e fua fatongia ʻi he Siasí.