ngaahi ongoongo nounou mei māmaní
Fakamanatu ʻe he Kāingalotú ʻa e Taʻu 50 e Siasí ʻi he ʻOtu Filipainí
Ke fakamanatua e taʻu 50 ʻo hono toe fakatapui ʻo e ʻOtu Filipainí ke malangaʻi ai e ongoongoleleí, ne fakataha mai ai ha Kāingalotu ʻe toko lauiafe ki Kēsoni Siti ke kau atu ki ha fakaʻaliʻali fakafonua ʻi he ʻaho 30 ʻo ʻEpelelí mo ha konifelenisi fakaʻēlia ʻi he ʻaho 1 ʻo Meé ke fakamanatu e Siupelí.
Ne fakataha mai ha ngaahi siteiki ʻe hongofulu mā hiva ʻi he ʻaho Tokonakí ke fakamanatu ʻi he hiva mo e tauʻolunga ʻa e tukufakaholo fakafonua fakaʻofoʻofa mo e tupu ko ia ʻa e Siasí ʻi he ʻOtu Filipainí. ʻI he ʻaho Sāpate, 8 ʻo Meé ne fakataha mai ai e kāingalotú ki ha konifelenisi satelaite fakafonua mo e kau taki fakalotofonua mo e kau Taki Māʻolungá.
Tokoni ʻa e USNS Comfort ki ha Ngaahi Feituʻu ʻe 12
Ne tukufolau atu ʻi ʻEpeleli e USNS Comfort, ko ha vaka fakafaitoʻo kuo fakanāunau kakato ki ha ngaahi feituʻu ʻe 12 ʻi he ʻOtu Kalipiané, ʻAmelika Lotoloto mo Saute ʻAmelika ke ʻoatu ha tokoni fakafaitoʻo pea ke fakahoko ha ako maʻá e kau ngāue fakafaitoʻó.
ʻE ʻoatu ʻe ha kau ngāue tokoni mei he Siasí, Tau Tahi ʻa e ʻIunaiteti Siteití, mo ha ngaahi kautaha tokoni kehe pē ha ngaahi tokoni ʻofa fakaetangata mo akoʻi e ngaahi pōtoʻi ngāue te ne tokoniʻi e kakaí ke nau lava ʻo tokoniʻi pē kinautolu hili e mavahe ʻa e vaká.
Fakaava e Ngaahi Matapā ʻo e Temipale ʻAtalanitaá hili e Fakafiefia, Toe Fakatapuí
Ne toe fakaava e ngaahi matapā ʻo e Temipale ʻAtalanitā Siosiā ʻi he ʻaho 3 ʻo Mē, 2011 hili ha kātoanga faiva fakafonua he fakaʻosinga ʻo e uiké mo ha ongo fakataha he Sāpaté ʻo toe fakatapui ai ʻe Palesiteni Tōmasi S. Monisoni ke toe hoko atu e ngāue fakatemipalé. Ne ʻi ai fakataha foki mo Palesiteni Monisoni ʻi he toe fakatapuí ʻa ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá pea mo ʻEletā Uolotā F. Konisālesi mo Viliami R. Uoka ʻo e Kau Fitungofulú.
Ne fuofua fakatapui e temipalé ʻi he taʻu 1983, tāpuni ʻi he ʻaho 1 ʻo Sune, 2009, ke fai hano fakaleleiʻi.
Ko e Temipale ʻAtalanitā Siosiā