Konga Makehe kau ki he Fatongia ki he ʻOtuá
Ko Hono Ui ʻo ʻEku Kōlomú
Naʻá ku tokoni ki ha fāmili ʻi hoku uōtí, pea naʻá ku fie maʻu tokoni ke fai e meʻa kotoa pē ke ʻosi.
ʻI he hoʻatā Tokonaki ʻe taha naʻe telefoni ange ai e tamai ʻa ha fāmili naʻá ku faiako fakaʻapi ki ai. Naʻe kole ange ʻa Misa Sitīveni (kuo liliu e hingoá), “Te ke lava nai ʻo tokangaʻi ʻema fānaú ka ma ō mo Sinitī ʻo ʻaʻahi ki heʻene kuifefiné? ʻOku ʻikai ke moʻui lelei, pea ʻokú ma fakakaukau naʻa ko homa faingamālie fakaʻosí pē ʻeni ke ʻaʻahi ki aí.”
Ne u talaange kia Misa Sitīveni te u fiefia ke tokoni ange. Naʻá ne pehē mai, “Mālō ia! Pea ka lava muʻa peá ke fakamaʻopoʻopo ai pē mo fale, he ʻokú ma fakamanatu he ʻahó ni homa ʻaho malí.”
ʻI heʻeku aʻu atú kuo ʻosi tuku mai ʻe Misa mo Sisitā Sitīveni ha nūtolo ke toki haka mo ha lisi ʻo e ngaahi meʻa ke fai ʻi falé. Hili pē iá peá na ō. Naʻá ku ongoʻi ʻe lahi ange ʻa e meʻa te u faí ʻi he tokangaʻi ʻataʻatā pē ʻena fānaú. Ko ha ʻaho faingataʻa ʻeni kiate kinaua, pea naʻá ku loto ke fai ha meʻa ke lelei ange kiate kinaua. Naʻá ku fakapapauʻi te u fai kotoa e ngāue he lisí mo ha toe ngāue lahi ange, kau ai hono fufulu e ipú mo kosi e musié.
Naʻe mahino pē he ʻikai ke u lava ʻo fai kotoa ia mo tokangaʻi ʻena fānau ʻe toko tolú ʻi ha houa pē ʻe tolu, ko ia ne u fakakaukau ke ui ha niʻihi ʻo ʻeku kōlomu ʻo e kau taulaʻeikí. Naʻe taha pē palopalemá: Naʻe ʻikai ke mau fuʻu maheni mo e kau talavou ʻi heʻeku kōlomú. Mau feohi pē kimautolu, ka naʻe ʻikai ke lahi e meʻa naʻa mau tatau aí, tuku kehe pē Siasí. Naʻa mau ako ʻi he ngaahi ʻapiako kehekehe, pea tātātaha ke u sio kiate kinautolu ʻi ha ngaahi meʻa ʻoku fai, mavahe mei he meʻa faka-Siasí. Naʻá ku ongoʻi ngalivale ke ui kinautolu ki ha faʻahinga meʻa peheni.
Naʻá ku telefoni ki he palesiteni ʻo e Kau Talavoú ʻo kole ange pe te ne maʻu mai ha niʻihi ʻo e kau talavoú ke tokoni. Naʻá ne tali mai ko iá ko e ʻetivaisa pē pea ʻoku totonu ke u telefoni kia Pita, ko e ʻasisiteni ʻuluaki ki he pīsopé, he ko hono uiuiʻí ke tokoniʻi au ʻi hoku fatongia fakataulaʻeikí. Naʻá ku ʻosi ʻiloʻi pē ʻe au ko e meʻa ia te ne talamaí.
Naʻá ku tailiili mo kiʻi momou heʻeku tā kia Pita ʻo kole pe ʻe lava ke ne ʻalu angé. Naʻá ne pehē mai, “ʻIo. ʻOku ʻi heni ʻa Sikoti mo Kēvini, pea te mau ō atu mo kinaua.”
Naʻa mau ngaue fakataha ki hono kosi ʻo e musié, fufulu e ipú, mo fakamāʻopoʻopo e falé. Feʻunga pē ʻene ʻosí mo e foki mai ʻa Misa mo Sisitā Sitīvení.
Ne akoʻi au ʻe he meʻa naʻe hokó ʻoku fakatahatahaʻi e ngaahi kōlomu ʻo e lakanga fakataulaʻeikí ʻe he tui kia Sīsū Kalaisí mo e ngāue tokoní, neongo ʻa e faikehekehe hotau ngaahi manakó, ʻulungāangá, pe puipuituʻá.
Tā fakatātaaʻi ʻo e ʻatá ʻe Robert Casey