Fakaleleiʻi ʻe he Siasí e Feituʻu ne Fakafoki Mai ai e Lakanga Fakataulaʻeikí

Kuo fanongonongo ʻe he Kau Palesitenisī ʻUluakí e ngaahi palani ke toe fakaleleiʻi e feituʻu fakahisitōlia ko ia ne ʻiloa ki muʻa ko Hāmoní (ofi ki Sesikuehana ko ia ʻo e ʻaho ní), Penisolovēnia, ʻi he USA, ʻa ia ne liliu ai ʻe he Palōfita ko Siosefa Sāmitá ʻa e konga lahi ʻo e Tohi ʻa Molomoná pea ko e feituʻu ia ne fakafoki mai ai ʻe Sione Papitaiso ʻa e Lakanga Taulaʻeiki Faka-ʻĒloné ʻi he 1829.

ʻE kau ʻi he ngāué ni ʻa hono langa ʻo ha ngaahi fale fakahisitōlia pea mo e faama ʻi Hāmoní pea pehē ki he ongo maka fakamanatu ʻo hono toe fakafoki mai ʻo e ongo Lakanga Taulaʻeiki Faka-ʻEloné mo Faka-Melekisētekí ʻi he 1829. ʻOku ʻamanaki ke fakahoko e tanupoú ʻi he 2012, pea ʻoku fakafuofua ʻe taʻu ua hono fakahoko ʻo e ngāué.

Ko Hāmoni, Penisolovēnia ʻa e feituʻu ne liliu ai ʻe Siosefa Sāmita ʻa e konga lahi ʻo e Tohi ʻa Molomoná ʻi he vahaʻa ʻo e taʻu 1827 mo e 1830. Naʻe maʻu ai ʻe he palōfitá ʻa e ngaahi fuofua fakahā ʻe 15 ʻoku ʻi he Tokāteline mo e Ngaahi Fuakavá.

ʻI he feituʻu tatau pē, ʻo hangē ko ia ne hiki ʻi he Siosefa Sāmita—Hisitōlia 1:66–75, ne maʻu ʻe Siosefa Sāmita mo ʻŌliva Kautele ʻi he 1829 ʻa e Lakanga Taulaʻeiki Faka-ʻĒloné meia Sione Papitaiso. Hili mei ai ha taimi nounou ne foaki ʻe Pita, Sēmisi mo Sione ʻa e Lakanga Taulaʻeiki Faka-Melekisētekí kiate kinaua ʻi ha feituʻu ofi mai pē.

Ne pehē ʻe Maʻake Sitake, ko ha tokotaha māʻolunga ʻi he kulupu ʻo e vaʻa fekumi ʻi he ngaahi feituʻu fakahisitōlia ʻo e Potungāue Hisitōlia ʻo e Siasí kuo ʻosi kamata e fekumi fakaʻakiolosiá ke ʻilo e ngaahi feituʻu totonu ne tuʻu ai e niʻihi ʻo e ngaahi fale ʻi he feituʻú ni.

Naʻá ne pehē, “ ʻOku mau ʻamanaki ke fakaleleiʻi e ʻapi ko ia ne nofo ai ʻa Siosefa mo ʻEma ʻi Hāmoní pea pehē ki he feituʻu ne fāʻeleʻi ai ʻa ʻEma Sāmitá pea mo hono ʻapi fakafāmilí.”

Kuo ʻosi ʻi ai foki ʻi he feituʻu ʻeka ʻe 90 (hekitea ʻe 36) ha tā tongitongi ʻo e Palōfita ko Siosefa Sāmita mo ʻŌliva Kautele ʻi heʻena maʻu ʻa e Lakanga Taulaʻeiki Faka-ʻĒloné. ʻOku lolotonga ʻi ai foki ha palani ki ha ongo maka fakamanatu foʻou. ʻOku ʻi ai foki mo ha palani ke langa ha senitā takimamata ʻi he feituʻú ni.

Kuo fakaafeʻi ʻe he kau taki ʻo e Siasí ʻa e kāingalotu ʻoku nau fie fakahoko ha foaki tuʻo taha ki he ngāué ke nau fai ia. ʻE lava ke fai ʻeni ʻaki hano fakafonu ʻi he laʻi foaki vahehongofulú ʻi he “Ngaahi Foaki Kehé” ʻa e “Priesthood Restoration Site” ʻa ia ʻe lava ke maʻu mei he kau pīsopé mo e palesiteni fakakoló.

Ko Hono Tauhi ʻo e Hisitōlia ʻo e Siasí he funga Māmaní

ʻOku fengāueʻaki ha ngaahi potungāue ʻo e Siasí mo ha kau fai hisitōlia, ʻākiteki, kau saienisi ʻo e ngaahi feituʻu ʻo e kuonga muʻá (archaeologists), loea, mataotao fakaʻaati, konitulekitoa, mo ha kau tauhi ʻapi ke nau tokangaʻi e ngaahi feituʻu ʻoku mahuʻinga fakahisitōlia ʻi he Siasí. ʻOku fakafaʻahinga e ngaahi feituʻú ni ki ha kalasi ʻe tolu:

• Ko e ngaahi feituʻu fakahisitōliá ko ha ngaahi feituʻu ne hoko ai ha ngaahi meʻa mahuʻinga ʻi he hisitōlia ʻo e Siasí, hangē ko e faama ʻa Siosefa Sāmitá pe ko e feituʻu fakahisitōlia ko Ketilaní. ʻOku ʻi ai ha ngaahi feituʻu nai ʻe uofulu tupu ʻi he ʻIunaiteti Siteití, pea ʻi ai ha feituʻu ʻe taha mavahe mei he ʻIunaiteti Siteití—Ko e Falelotu Katifila ʻElimí ʻo Uosesitaá, ʻa ia ko e fuofua falelotu ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ʻIngilaní.

• Ngaahi Fakaʻilonga Fakahisitōlia, ʻa ia ʻoku ʻi ai e ngaahi temipale, tāpanekale mo ha ngaahi falelotu ʻe fāngofulu tupu ʻoku makehe honau fōtungá pe ʻi ai hono mahuʻinga fakaʻātí.

• Fakaʻosí, koeʻuhí he ʻikai lava ke toe fakafoʻou e ngaahi feituʻu mahuʻinga kotoa pē, ko e ngaahi fakaʻilonga fakahisitōlia—ʻoku nau lahi hake he 100— ʻoku nau fakailongaʻi ʻa e ngaahi feituʻu kehe ʻoku fakaʻamu e Siasí ke tauhi ʻi he manatu mo e loto ʻo e Kāingalotú. ʻE lava foki ʻe he ngaahi fakaʻilonga fakahisitōliá ʻo fakaʻilongaʻi e ngaahi feituʻu (hangē ko e feituʻu ʻo e Temipale Hihifo Mamaʻó) ʻa ia ʻoku ʻikai ke lahi ha fakamatala feʻunga ke fakaleleiʻi totonu ʻa e feituʻu ko iá. ʻOku ʻi ai ha ngaahi fakaʻilonga fakahisitōlia fakavahaʻapuleʻanga ʻe hongofulu tupu.

ʻOku toe langa foʻou foki ha feituʻu ʻeka ʻe 90 (hekitea ʻe 36) ʻi Penisolovēnia ke fakamanatu hono toe fakafoki mai ʻo e lakanga fakataulaʻeikí mo hono liliu ko ia ʻo e Tohi ʻa Molomoná.