ʻI he Uepí

ʻOmi ʻe he Uepisaití ʻa e Falekoloa ʻo e Siasí ki he Kāingalotu he Funga Māmaní

ʻI hono toe tānaki atu ha ngaahi lea fakafonua ʻe tolu ki he store.lds.org, ʻoku toe faingofua ange ai ki ha kāingalotu ʻe lauiafe ke maʻu e ngaahi nāunau ʻo e Siasí. Ko e uepisaití, ʻa ia ʻokú ne fetongi ʻa e ldscatalog.com, ne fuofua tuku atu ia ʻi he lea faka-Pilitānia, Lūsia mo e faka-Sipeiní, ka ko ʻeni ʻe toe lava ke maʻu ia ʻi he lea faka-Falanisē, Siamane mo e faka-ʻĪtalí.

ʻOku lava ke fakafolau taʻetotongi atu ʻa e ngaahi nāunau ʻo e ongoongoleleí ʻo hangē ko e—ngaahi tokoni fakaako, mūsika, mītia, ʻaati, kāmeni, vala temipale, mo ha ngaahi maʻuʻanga tokoni kehe—ki he ngaahi feituʻu ko ia ʻoku lava ke maʻu ai ʻa e saití.

Kuo ʻi ai ha palani ke lava ʻo maʻu ʻa e store.lds.org ʻi he lea faka-Siaina, Siapani, Kōlea mo e faka-Potukalí ʻi he kahaʻú.

ʻOatu e Polokalama Fakamuimuitahá ki he Gospel Library App

Kuo tuku atu ʻe he Siasí ʻa e ngaahi polokalama fakamuimuitahá ki he Gospel Library app maʻá e Android, iPad, mo e iPhone ʻi he mobile.lds.org.

Neongo ne siʻi ha ngaahi pulusinga ne ʻoatu ʻi he Android app kimuʻá, ʻoku lava ke ʻoatu ʻe he polokalama fakamuimui tahá ha ngaahi makasini ʻa e Siasí, tohi lēsoni mo ha ngaahi meʻa lahi ange.

ʻI hono ʻoatu ko ia e polokalama app fakamuimuitahá ki he iPad mo e iPhone ʻe lava ai ʻe he tokotaha ʻokú ne fakaʻaongaʻí ʻo fakatatau (synchronize) e ngaahi fakamatala nounou ʻi he folofolá ʻi he mobile app mo e My Study Notebook ʻi he LDS.org, ʻo lava ai ke sio ki he ngaahi fakamatala, meʻa kuo fakaʻilongaʻi mo tag ʻi he ʻInitanetí mo e meʻangāue toʻotoʻó (mobile device).