Konga Makehe kau ki he Fakalakalaka Fakatāutahá
Ko ha Foʻi Lea ʻe Taha mo ha Lēsoni MAʻÁ E KOTOA ʻEKU Moʻuí
Ko e angatonú ʻa hoʻo tōʻonga ʻi he taimi ʻokú ke pehē ʻoku ʻikai sio atu ai ha tahá.
Naʻe vela ʻaupito ʻa tuʻa, ko e tikilī F ʻe 115 (46˚C), ʻa ia ko e angamaheni pē ia ki ha ʻaho ʻi he faʻahitaʻu māfaná ʻi he faama ʻi Poloulī ʻi Kalefōniá, ʻi he USA. Naʻá ku ʻakahi e vaʻe ʻo e fuʻu loli vaí he ko e tuʻo tolu ʻaki ʻeni ʻene maumau ʻi ha ʻaho ʻe fā. Naʻá ku fakafalala ki heʻeku ngāue he tutuku ʻa e akó ke totongi ʻaki e fakafiefiá, vala akó, pea mo haʻaku hū ki he kolisí. Neongo e vela ʻa e ʻeá, ka naʻe ʻikai ke u saiʻia ke tuku vave ʻeku ngāué, kae naʻe hangē te u toe tuku vave pē he ʻaho ní.
Naʻe lue mai ʻa Tēvita, ko ha mēmipa homau uōtí mo ha kaumeʻa ʻo e fāmilí mei he fale ngaohiʻanga mahoaʻá ʻo sio ki he lolí. ʻI heʻeku fakamatalaʻi ange ki ai ʻeku ʻitá, naʻe ʻalu hake ke u lea ʻaki ha foʻi lea ne u fanongo hono fai ʻe ha niʻihi kehe ʻi he taimi naʻa nau ʻita aí. ʻI he momeniti kimuʻa peá u lea ʻakí, ne u fakakaukau ke ʻoua te u lea ʻaki he naʻá ku ʻiloʻi ko e foʻi lea kovi ia. Ka naʻá ku pehē ʻe sai pē koeʻuhí he ʻikai teitei ʻilo ki ai ha taha. Ne u lea ʻaki e foʻi leá, ka naʻe ʻikai tokoni ia ke u ongoʻi lelei ange.
Ne hanga hake ʻa Tēvita ʻo talamai te na toki ngaohi e lolí mo ʻeku tamaí ʻi ha taimi ʻe toki lava ai. Lolotonga iá, naʻá ku maʻu ha ngāue kehe ke fai ʻi he toenga ʻo e ʻahó.
ʻI he ʻosi ʻa e ngāué ki he ʻaho ko iá, naʻá ku heka ki he loli ʻa ʻeku tamaí peá ma kamata lele ki ʻapi. Ne ʻikai fuoloa ʻema lelé kuo sio mai ʻeku tamaí mo talamai naʻe talaange ʻe Tēvita ʻeku ʻita he maumau ʻa e lolí, mo ʻeku kapekapé. Naʻe pehē mai e tangataʻeikí, “Talamai ʻe Tēvita naʻe ʻikai ʻamanaki ia ʻe haʻu ha lea pehē mei he ngutu hoku ʻofefiné. ʻOkú ne fakaʻapaʻapaʻi lahi koe.”
Ne u punopunou pea vave mo e tafe hoku loʻimatá. Kuó u tuku hifo au ʻi he vakai mai ʻa kinautolu ʻoku nau fakaʻapaʻapaʻi aú. Ka ko e meʻa lahi tahá ʻa ʻeku loto mamahi he meʻa ne u faí peá u ʻiloʻi naʻe loto mamahi foki mo e ʻOtuá. Naʻá ku ʻiloʻi leva ko hono ʻuhinga ia naʻe ʻikai ke u ongoʻi lelei ange ai ʻi heʻeku lea ʻaki e foʻi leá.
Ne u fai ha palōmesi he ʻikai ʻaupito te u toe lea ʻaki e foʻi lea ko iá pe ha faʻahinga meʻa pē ʻe ʻikai fakahōifua ki he ʻOtuá, ʻo ʻikai ko hono ʻuhingá ko e ʻikai ke u loto ke maaʻi au ʻe heʻeku tamaí mo Tēvita, ka koeʻuhi ko e meʻa totonu pē ia ke faí. Ne u ako ʻo ʻiloʻi, ko e angatonú, ko hoʻo tōʻonga ia ʻi he taimi ʻokú ke pehē ai ʻoku ʻikai ke sio atu ha tahá.
Tā fakatātaaʻi ʻe Steve Kropp