Naʻe Fakahoko ʻEne Talaʻofá
Teti Peinipilisi, Kololato, USA
Lolotonga ha kalasi fakataha ʻa e lakanga fakataulaʻeikí mo e Fineʻofá ʻi he 2009, naʻe fakamatala e kulupulita ʻo ʻemau kau taulaʻeiki lahí ki he fie maʻu ʻe heʻemau kau palesitenisī fakasiteikí ke ʻave ʻe he tokotaha lahi kotoa pē ha hingoa fakafāmili ki he temipalé he taʻu. Naʻá ne fakafeʻiloaki mai ha ngaahi polokalama fakasiteiki mo fakauooti ʻe tokoni ke lavaʻi ai ʻe he kāingalotú ʻa e taumuʻa ko iá. ʻI he fakaʻosi ʻene leá, naʻá ne fai ha talaʻofa koeʻuhi ko hono fatongia ʻi he polokalama hisitōlia fakafāmilí, kapau te tau feinga ke aʻusia e taumuʻa ʻa e siteikí, te tau lavaʻi ia.
ʻI he ʻosi ʻa e fakatahá naʻá ma aleaʻi ʻa e talaʻofá mo hoku uaifí peá ma pehē he ʻikai ʻaonga ia kiate au; kuo ʻosi ʻa e taʻu ʻe 40 mo ʻemau fakatotoloʻi ʻa e vaʻa kotoa pē ʻo homau fuʻu ʻakau fakafāmilí. Naʻe faingataʻa hono kumi ʻeku ngaahi kuí, pea kuo taʻu lahi mo e ʻikai ha fakalaka ki muʻa. Naʻá ma tui ʻoku ʻikai pē ha toe meʻa ia ʻe lava ke fai. Neongo iá, naʻe kei ongo mai pē ki hoku ʻatamaí e talaʻofa ʻa e kulupulitá ʻi he ngaahi ʻaho hoko maí. Ne u fakakaukau ke u ʻahiʻahiʻi ange ʻene talaʻofá. Naʻá ku kamata ʻi he mape ʻo ʻeku ngaahi kuí ʻo fakakaukauʻi e meʻa ʻe lava ke u faí.
Hili haʻaku fakakaukauʻi fakalelei ia ʻi ha ʻaho ʻe tolu, naʻe ueʻi au ke u kumi ʻi ha feituʻu pau ʻa e fakamatala kau ki ha kakai ʻi he laine fakaʻosi ʻo ʻeku mapé. Naʻá ku fekumi ʻi he ʻInitanetí pea teʻeki ai vaeua e ʻahó kuó u ʻiloʻi naʻe ʻi ai ha tangata ʻe taha naʻá ne fakatotoloʻi e hingoa fakafāmili ko iá ʻi ha feituʻu ʻi ʻIngilani. Ko e taha ʻo e ngaahi hingoa naʻá ne ʻilo fakamuimuitahá ko e tokotaha ia ʻi he laine fakaʻosi ʻo ʻeku mapé. Naʻá ku fakaʻaongaʻi ʻene fakamatalá ʻo u aʻu atu ki ha toʻu tangata kehe ʻe nima—naʻe foki ʻeni ʻo aʻu ki he 1650—pea naʻe kau ai e hingoa teʻeki mali ʻo ha kau fafine tokolahi ʻi hoku lainé pea pehē ki ha hingoa ʻo ha kakai tangata mo fafine tokolahi. Naʻá ku ʻohovale mo fiefia mo hoku uaifí.
Ne u kamata fekumi kimui ai ki ha fakamatala ʻi he ʻInitanetí kau ki heʻeku kui tangata hono tolú naʻe ʻikai ke maʻu. Naʻá ku maʻu ia hili haʻaku kiʻi fakatotolo nounou pē. Naʻá ku ʻiloʻi ai naʻe taimi nounou pē mei he mālōlō ʻa hono uaifi ʻuluakí pea hiki ia mei Penisolovēnia ʻi he USA ki Uisikonisini pē ʻi he USA. Naʻá ku maʻu mo ha toe hingoa ʻe 400 tupu ki heʻeku hisitōlia fakafāmilí mei he fakamatala mei ha ngaahi lekooti ʻi Uisikonisiní.
Ne u toki ʻilo kimui haʻaku ngaahi kui ʻe toko 100 ne kau ʻi he Tau Fakalotofonua mo e Tau Sivile ʻa ʻAmeliká. Ne u fakatotoloʻi e laine ʻe ono ʻo aʻu ki he ngaahi taʻu ʻo e 1600.
Lolotonga e taʻu ʻe 40 ne fai ai ʻeku fakatotolo ki muʻá, kuó u lekooti ai ha hingoa ʻe 65 nai ʻi heʻeku mape tohi hohokó pea meimei ko ha hingoa ʻe 3,000 ʻi heʻeku komipiutá. ʻI he māhina ʻe 20 hili ʻa e talaʻofa naʻe fai ʻe he kulupulita ʻo e kau taulaʻeiki lahí, kuó u tānaki atu ha hingoa ʻe 70 tupu ki he mapé pea laka hake he hingoa ʻe 17,000 ki he komipiutá, kau ai ha ongo palesiteni ʻo e ʻIunaiteti Siteití!
ʻOku folofola mai ʻa e ʻEikí “ʻe fakamoʻoniʻi hono kotoa [ʻEne folofolá] neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38). Ko e moʻoni, naʻe fakamoʻoniʻi ʻa e talaʻofa ʻa e Tamai Hēvaní naʻe fakafou mai ʻi ha taki lakanga fakataulaʻeiki kuo fakamafaiʻi pea ueʻi ʻe he Laumālié.