Konga Makehe kau ki he Fatongia ki he ʻOtuá
Fatongia ki he ʻOtuá, fakataha mo e Tangataʻeikí
ʻOkú ke fie maʻu tokoni ʻi hono fakahoko ʻo e Fatongia ki he ʻOtuá? ʻOku ofi pē ia ki ʻapi.
Hili e ʻilo ʻe ʻAleki Mila—ko e palesiteni ʻo e kōlomu ʻo e kau tīkoní ʻi he Uooti Nofu Soá ʻi he Siteiki Venikuva Pilītisi Kolomupiá, ki he tohi foʻou ʻo e Fatongia ki he ʻOtuá ʻi ha faeasaiti he taʻu kuo ʻosí—naʻá ne vēkeveke ke kamata leva. Naʻá ne faʻu mo ʻene tamaí ha taimi-tēpile ke na fakataha ʻi he Sāpate kotoa pē ʻo ngāue fakataha ki ha konga ʻo e tohí.
ʻOku pehē ʻe ʻĀleki, “ʻI he uike kotoa pē, ʻokú ma nofo hifo ai mo ʻeku tamaí ʻo lau ha konga ʻo e tohí. ʻOkú ma kamata ʻaki pē ha lotu, pea toki ako e fakamatalá mo lau e ngaahi potufolofolá. ʻOkú ma tali e ngaahi fehuʻi he konga ko iá peá ma hiki leva e founga te ma lava ke fakahoko ʻaki ʻa e meʻa kuó ma ʻiló.” ʻOku faʻa vahevahe ʻe ʻĀleki ʻa e meʻa ʻokú na ngāue ki ai mo ʻene tamaí. “Naʻá ku talanoa ki heʻeku faʻeé kau ki he sākalamēnití mo hono ʻuhinga e ongo lotu tāpuakiʻi ʻo e sākalamēnití peá u hiki ha ngaahi fakakaukau fekauʻaki mo ha founga te u lava ai ʻo tokoni, ʻi heʻeku hoko ko e tīkoní, ke toe mahuʻingamālie ange kiate ia ʻa e sākalamēnití.”
Hili pē ha ngaahi uike siʻi ʻo e Fatongia-ki he-ʻOtuá-mo e Tangataʻeikí, naʻe fakatokangaʻi ʻe ʻĀleki ha liliu ʻi heʻene moʻuí. ʻOkú ne talamai, “ʻOkú ne ʻai ke u ongoʻi lelei ʻaupito.” ʻOku ʻikai ko e ʻuluaki meʻa ia ʻoku fie fai ʻe ʻĀleki ʻi he hoʻatā Sāpaté ke nofo hifo mo ʻene tamaí ʻo ngāue ki heʻene tohí, “ka ʻi he kamata pē ʻema ako mo laukonga fakatahá, ʻoku ou fiefia ange peá u ongoʻi lelei ange ʻi hono fai iá.”
Kuo fokotuʻu ʻe ʻĀleki ha ngaahi taumuʻa foʻou pea ʻoku toe lahi ange ʻene mahino ki he ongoongoleleí ʻi heʻene ako mo ʻene tamaí. “ʻOku fokotuʻu mai ʻi he taha ʻo e ngaahi konga ʻi he Fatongia ki he ʻOtuá ke mau ako ha tefito ʻe nima ʻi he Ki Hono Fakamālohia ʻo e Toʻu Tupú pea hiki ha taumuʻa ki he tefito takitaha koeʻuhí ke toe lelei ange hoʻo fakahoko iá. Naʻá ku fili ʻe au ʻa e faitotonú. Ko ia ko e taha leva ʻo ʻeku ngaahi taumuʻá ke u tala ki heʻeku ongomātuʻá ʻa e taimi ʻoku ou fai ai ha meʻa ʻoku halá kae ʻoua naʻá ku fakalongolongo pē.”
Ko e tefito ʻe taha naʻe fili ʻe ʻĀlekí ko e akó. “Ko ʻeku taumuʻá ke ʻosi ha māhina kakato he ʻakó ʻoku ʻikai ke u ʻulungāanga kovi he kalasí pea ke ʻosi kātoa ʻeku ngaahi ngāué ʻo ʻikai ke toe haʻaku ngāue fakaako ke fai mei ʻapi. ʻOku lele lelei ʻeni pea ʻoku lahi hoku taimi ʻataá he taimí ni.”
ʻOku fakalotolahiʻi he taimí ni ʻe ʻĀleki e kau tīkoni ʻi heʻene kōlomú ke nau ngāue ke fakakakato honau fatongia ki he ʻOtuá. Pea ʻokú ne fai ʻa e faleʻi tatau ki ha toe talavou pē ʻoku nau fakakaukau ke fakaava hake ʻenau tohí pea kamata ngāue ki ai: “Fai leva ia. Kapau ʻoku ʻikai te ke lava ʻo kamata pē ʻiate koe, fai e meʻa ʻoku ou faí ʻo kole ki hoʻo tamaí ke mo fai fakataha ia.”
Faitā ʻa Paul VanDenBerghe