Toʻu Tupú
Lelei, Lelei Ange, Lelei Tahá
Naʻe lea ʻa ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he konifelenisi lahi ʻo ʻOkatopa 2007 ʻo kau ki he ngaahi ʻekitivitī ʻoku “lelei, lelei ange, mo lelei tahá.” Naʻá ku tangutu pē ʻi hoku nofoʻangá mo ʻeku ongoʻi halaia ʻi he taimi naʻá ne lea ai ʻi he konga kau ki he “fuʻu lahi e taimi ʻoku fakapolokalamaʻi maʻá e fānaú.”
Ne u ʻiloʻi e fuʻu lahi e meʻa naʻá ku faí. Naʻá ku kau ki he ngaahi koniseti fakaakó, fai e ngaahi kalasi faingataʻa ʻi he akó, peá u kau ʻi he ngaahi ʻekitivitī lahi kehe. Naʻe ʻikai ke u faivelenga ʻi he ngaahi ʻekitivitī ʻa e Kau Finemuí, peá u faingataʻaʻia ʻi he ngaahi ʻaho Sāpaté ʻi hono feingaʻi ke ʻosi ʻeku ngāue fakaako mei ʻapí ne toki tufa mai. Kuo ʻikai kei fakafiefia e ako mūsiká ia mo hono ʻētitaʻi e nusipepa ʻa e akó ka kuo hoko ia ko e ngāue.
Ne ʻai ʻe he lea ʻa ʻEletā ʻOakesí ke u vakavakaiʻi fakalelei ʻeku taimi-tēpilé. Ko e ngaahi ʻekitivitī lelei ne u faí ka naʻe fuʻu lahi. Kuo pau ke u fili e ngaahi ʻekitivitī lelei tahá. ʻI heʻeku feinga ko ia ke fili e ngaahi ʻekitivitī ke tukú, ne u ʻiloʻi ko e ongoongolelei ʻo Sīsū Kalaisí ʻa e meʻa lelei taha ʻe lava ke fakamuʻomuʻa ʻe ha tahá. Ne u hiki ʻi ʻolunga heʻeku lisí ʻa e lotú mo e ako folofolá, pea talu mei ai mo e lele lelei ange ʻeku moʻuí.
Ne akoʻi kiate au ʻe ʻEletā ʻOakesi ko e taimi ko ia ʻoku tau fuofua fai ai e meʻa ʻoku finangalo ki ai ʻa e ʻEikí, ʻe tonu leva e meʻa kotoa. Kapau te u ako ʻeku folofolá peá u toki vaʻinga kimuʻa pea fai ʻeku ngāue fakaako mei ʻapí, ʻe lava e meʻa mahuʻinga kotoa pē. ʻI he taimi ʻoku makatuʻunga ai ʻeku moʻuí ʻi he finangalo ʻo e ʻEikí, ʻo ʻikai ke u toki fakakaukau ki ai hili e ngaahi meʻa kehé, ʻoku toe lahi ange ai ʻa e melinó mo e lavameʻá ʻi heʻeku moʻuí.
ʻOku ou fuʻu tokanga ʻaupito he taimí ni ke u fakafanongo ki he faleʻi ʻoku fakahoko mai ʻi he konifelenisi lahí!
Tā fakatātaaʻi ʻe Paul Mann