Konga Makehe kau ki he Fakalakalaka Fakatāutahá
Ko e Fakalakalaka Fakatāutaha ʻa Homa Ongo Fāmilí
Naʻe tokoniʻi ʻe he Fakalakalaka Fakatāutahá ha ongo finemui ʻi Kaivi ʻi ʻIukuleini, ke fai ha lilliu lelei ʻi heʻena moʻuí pea ʻi he moʻui ʻa hona ongo fāmilí.
ʻOku pehē ʻe Katea Kalasikouva mei Kaivi ʻi ʻIukuleiní, “Taimi ʻe niʻihi ʻe lava pē ʻe ha tokotaha ia ʻo liliu e ngaahi meʻa ʻi hono ʻātakaí. Kamata pē ʻiate koe—kapau ʻokú ke loto toʻa ke ke kamata pē ʻiate koe—ʻe aʻu pē ki ha taimi kuo liliu e meʻa kotoa pē ʻi ho ʻātakaí ʻiate ia pē.”
Naʻe maʻu ʻa e loto toʻa ko iá ʻe Katea Kalasikouva mo ʻIvana Lupanisuki ʻo e Uooti Vosikesenikí ʻi he tuí mo e Fakalakalaka Fakatāutahá, ʻo na maʻu ai ʻa e faingamālie ke fakamālohia hona ongo fāmilí pea mo teuteu ki he temipalé.
Ko Hono Fakahoko ha Liliu
Ne fakatou kau e fāmili ʻo Kateá mo ʻIvaná ki he Siasí hili pē ha taimi nounou mei hono fokotuʻu ʻo e Misiona Kaivi ʻIukuleiní ʻi he 1992. Naʻe iku māmālohi pē ʻa e ongo fāmilí fakatouʻosi ʻoku teʻeki ai ke taʻu motuʻa feʻunga e ongo tamaikí ke papitaiso.
ʻI he taʻu 13 ʻa ʻIvaná naʻe hiki ai hono fāmilí ki ha ʻapi naʻe ofi pē ki ha falelotu ʻo e Siasí. ʻI heʻena lue ʻo fakalaka atu aí, naʻe manatuʻi ʻe heʻene faʻeé ʻa e lelei ne ʻomi ʻe he Siasí ki heʻene moʻuí. Naʻá ne fakalotolahiʻi ʻa ʻIvana ke ʻalu ki he lotú. ʻOku pehē ʻe ʻIvana, “Naʻe ʻiloʻi ʻe heʻeku faʻeé ko e meʻa lelei pē ʻe akoʻi kiate au ʻi he Siasí, ʻi hono fakafehoanaki atu ki he meʻa ʻe akoʻi ʻe māmaní.” Naʻe kamata leva ke ʻalu mo e ongo faifekaú ki he lotú mo e ngaahi ʻekitivitií mo e ngaahi fakatahaʻangá, pea ʻi hono ʻeke ange ʻe he ongo faifekaú pe ʻe fie papitaisó, naʻá ne loto ki ai.
Ko e Talanoa ʻo Kateá
Naʻe foki mai ʻa Katea, ko hono taʻu 15 ia, mei ha fononga mo ha kulupu toʻu tupu mei honau tukui koló. Naʻá ne ʻohovale ʻi hono talaange ʻe heʻene tamaí kuó ne ʻosi fakaafeʻi mai e ongo faifekaú ke akoʻi ia. Naʻá ne fakamahinoʻi ange kia Katea ʻe lelei ka fie fanongo, ka ko iá ʻoku ʻikai pē te ne fie fanongo.
Naʻe fokotuʻu ʻe Katea ha taimi ke feʻiloaki ai mo e ongo faifekaú. Ko ʻene fakamatalá ʻeni, “ʻI heʻeku fakafanongó, naʻá ku ongoʻi ko e hala totonu ʻeni ke u fou aí. Naʻá ku manatuʻi ʻa e ngaahi ongo naʻá ku maʻu ʻi heʻeku ʻalu ki he lotú heʻeku kei siʻí. Pea hili pē ha taimi siʻi naʻá ku loto ke papitaiso au.”
Ko e Fakalakalaka Fakatāutahá
Naʻe pau ke fakatou fai ʻe he ongo finemuí ha ngaahi liliu ka na kau ki he Siasí, pea naʻe tokoni ʻa e Fakalakalaka Fakatautahá ʻi heʻena fakahoko e liliu ko ʻení. Ko e manatu ʻeni ʻa Katea ki aí, “Naʻá ku kei tupulaki pē. Naʻe ʻi ai pē hoku ngaahi ʻulungāanga ʻoʻoku. Naʻa mo e faʻahinga vala naʻá ku tuí naʻe fie maʻu ia ke fetongi. Naʻe tokoniʻi māmālie pē au ʻe he Fakalakalaka Fakatāutahá ke u liliu. Naʻá ne ʻomi kiate au ʻa e mālohi ke u hoko ko e ʻofefine ʻo e ʻOtuá, ʻo ʻikai ʻi he lotú pē kae ʻi he ʻaho kotoa pē.”
ʻI he Fakalakalaka Fakatāutahá naʻe lava ke fokotuʻu ai ʻe ʻIvana mo Katea ha ngaahi ʻulungāanga te ne fakamālohia fakalaumālie kinaua, hangē ko e lotú, ako folofolá mo e sio he mītia ʻoku tāú. Naʻá na ako foki mo e founga akoʻi ʻo e ngaahi lēsoní mo e tokoni ki he kakai kehé. ʻI hono fakakātoá, naʻe tokoni ia ke na toe ofi ange ki he ʻOtuá peá na hoko ko ha faʻifaʻitakiʻanga lelei ange ki hona ngaahi fāmilí.
ʻOku pehē ʻe ʻIvana, “Naʻe tokoniʻi au ʻe he Fakalakalaka Fakatāutahá. Ne u tupulaki ʻi he ngāue kotoa pē naʻá ku fakakakato; naʻe toe lahi ange ai ʻa e ʻilo mo e loto toʻa naʻá ku maʻú. Naʻe lelei ʻaupito ʻeni kiate au he naʻe ʻikai mālohi he Siasí ha tokolahi ʻo hoku fāmilí.”
Ko e Taki ʻAki ʻa e Faʻifaʻitakiʻangá
Naʻe tokoni e ngaahi liliu naʻe hoko kia ʻIvana tupu mei he Fakalakalaka Fakatāutahá ke ne hoko ko ha faʻifaʻitakiʻanga ki hono fāmilí. Ko e fakamatala ʻeni ʻa ʻIvaná, “Kuo mamata ʻeku ongomātuʻá he taimi ko ʻení ki heʻeku liliú. Naʻá na fiefia heʻeku ʻalu ki he lotú.” Naʻá ne ʻalu toko taha pē ki he lotú mo e ngaahi ʻekitivitií, ka ʻi he ʻaho ʻe taha naʻe fakakaukau ai ʻene faʻeé ke na ō ki he houalotu sākalamēnití. Ko e taimi ní ʻokú na maʻulotu fakataha.
Naʻe ʻaonga foki ʻa e faʻifaʻitakiʻanga ʻa Kateá ki he moʻui hono fāmilí. Taimi nounou pē mei he kau ʻa Katea ki he Siasí, naʻe kamata haʻu ʻene faʻeé mo ia pea hoko mai mo ʻene tamaí. Naʻe fakatokangaʻi ʻe he ongo fāmili ʻo e ongo finemuí ni ʻa e lelei kuo fai ʻe he Fakalakalaka Fakatāutahá mo e mālohi he Siasí ki he moʻui ʻa Katea mo ʻIvaná. Naʻa nau sio ki heʻena fiefiá pea nau fie maʻu ke nau kau mo kinautolu he fiefia ko iá.
Ko e Hū ki he Fale ʻo e ʻEikí
Naʻe fakautuutu ai pē ʻa e lahi e fiefia ʻa Katea mo hono fāmilí. ʻI he kau ʻa Katea ki he Fakalakalaka Fakatāutahá, naʻá ne fakatokangaʻi e nofo taha ʻa e tokangá ʻi he mahuʻinga ʻo e temipalé. “ʻOku ʻi ai e konga kakato ia ʻoku fakamatala pē ki he ʻalu ki he temipalé, pea naʻá ku fie maʻu moʻoni ke u ʻalu ki he temipalé ka naʻe teʻeki ai mateuteu ʻeku ongomātuʻá ki ai.”
Ka neongo ia, naʻe lava ʻa Katea ʻo ʻalu mo ʻene kalasi seminelí ki he temipalé. Ko ʻene manatu ʻeni ki aí, “Ko e fuofua taimi ʻeni ke u fakahoko ai ha ngāue fakatemipalé. Naʻa ku fiefia lahi, pea naʻá ku loto ke u toe ʻalu. Naʻá ku fie maʻu moʻoni ke ʻalu ki ai hoku fāmilí ʻo sila ki ʻitāniti.”
Naʻe teuteu e fāmili ʻo Kateá pea faifai pē ʻo nau ongoʻi kuo nau mateuteu ke ʻalu ki he temipalé. Hili ha taʻu ʻe ua mei he taimi naʻe fuofua ʻalu ai ʻa Katea ki he temipalé, naʻá ne toe foki ki ai, pea ko e taimi ko ʻení, naʻá ne ʻalu ai mo hono fāmilí. ʻOkú ne pehē, “Naʻe mahino kiate au ko ha feituʻu moʻoni ia ʻe lava ke hoko ai e ngaahi fāmilí ʻo taʻengata.” Naʻa nau sila ʻi he Temipale Falaipeeki Siamané.
Hokohoko Atu ʻi he Tuí
ʻOku hounga kia Katea mo ʻIvana ʻa e Siasí, pea kuó na fakatou maʻu ha ngaahi lelei mei he ngaahi meʻa ʻokú ne ʻoange kiate kinauá, fakatautefito ki he Fakalakalaka Fakatāutahá. “Ko ʻeku fakamoʻoni ki he Fakalakalaka Fakatāutahá, ʻokú ne ngaohi kitautolu ke tau toe mālohi ange pea ʻoku tokoni ia ki hono fakahaohaoaʻi kitautolu ʻi he tapa kotoa pē ʻo ʻetau moʻuí,” ko e fakamatala ia ʻa Kateá.
ʻOku ongoʻi ʻe ʻIvana kuo tokoniʻi ia ʻe he Kau Finemuí mo e ngaahi houalotu ʻa e Siasí ke ne teuteu ke hoko ko ha faifekau. ʻOkú ne loto ke ngāue fakafaifekau. Ko ʻene fakamatalá ʻeni, “ʻOua ʻe loto foʻi, kae hoko maʻu pē ko ha faʻifaʻitakiʻanga ʻo e founga kuo liliu ai ʻe he Siasí ʻetau moʻuí. ʻOku tau fiefia ai, pea ʻoku fie maʻu ʻe he tokotaha kotoa pē ke fiefia. Pea kapau te tau ʻave ʻa e kakaí pea fakaʻaliʻali kiate kinautolu ʻa e fiefia ko iá, te nau muimui leva ʻi heʻetau faʻifaʻitakiʻangá. ʻE lava maʻu pē ke tau tokoniʻi e kakai ko iá—ʻi ha fanga kiʻi founga iiki—fai ha ngāue maʻanautolu, pea ʻe ʻi ai pē ha foʻi momeniti fakaʻofoʻofa kuo nau mateuteu ai.”
Naʻe maʻu ʻe Katea Kalasikouva ʻa e ʻiló ʻi heʻene ngāueʻi ʻa e Fakalakalaka Fakatāutahá, ʻa ia naʻe tākiekina ai ʻene mātuʻá ke na ō mo ia ki he lotú. Peesi hanga maí: Ko Katea mo hono kaungāmeʻa ko ʻIvana Lupanisukí ʻi he tafaʻaki ki muʻa ʻo e Temipale Kaivi ʻIukuleiní.
ʻŪ taá naʻe fai ʻe Lucas McGraw mo Trevor Mcdonald
ʻOku fakamālō ʻa ʻIvana ko hono tokoniʻi ia ʻe he Fakalakalaka Fakatāutahá ke tā ha sīpinga lelei maʻa hono fāmilí. ʻOku ʻalu fakataha ʻeni ʻa ʻIvana mo ʻene faʻeé ki he lotú.