ʻI he Ongoongó

Fakalahi ʻe he Liahoná ʻa e Ngaahi Meʻa ʻOku Lava ʻo Maʻu ʻi he ʻInitanetí

ʻOku lolotonga ngāue ʻa e Siasí ke fakaleleiʻi ʻa e lava ko ia ke maʻu e ngaahi nāunau kuo liliu ki he ngaahi lea fakafonua makehe mei he lea faka-Pilitāniá ʻi he ʻInitanetí, tautautefito ki he Liahoná, ʻa e makasini fakavahaʻapuleʻanga ko ia ʻa e Siasí.

Ko e taumuʻá ke aʻu ko ia ki he fakaʻosinga ʻo e 2011, ko e māhina takitaha ʻoku paaki ai e Liahoná ʻi ha lea fakafonua pau, ʻe lava ʻe he kāingalotu ʻo e Siasí ʻo maʻu ʻa e pulusinga kakató ʻi he ʻInitanetí ʻi he founga PDF pea pehē ki he ngaahi konga fakafoʻituitui ʻo e makasiní ʻi he founga ʻoku taipeʻi pē. ʻE ʻaonga pē ʻeni ki he ngaahi makasini ne paaki ʻo kamata ʻi ʻEpeleli 2011 ʻo hokohoko atu.

ʻOku lolotonga ngāue foki e Siasí ke paaki maʻu pē ʻa e ongo Pōpoaki ʻa e Kau Palesitenisī ʻUluakí mo e Faiako ʻAʻahí ʻi he ʻInitanetí ʻi ha ngaahi lea fakafonua ʻe 80. ʻOku angamaheni ʻaki hono fakakau e ongo pōpoakí ni ʻi he Liahoná pe paaki ko ha nāunau makehe maʻá e ngaahi lea fakafonua ko ia ʻoku teʻeki ke lava ʻo maʻu ai e Liahoná.

Ne kamata ʻi he pulusinga ko ia ʻo Sune 2011, ko e ngaahi nāunau kotoa ʻo e ongó ʻa ia ʻoku paaki ʻi he Liahoná ʻe hiki pea ʻoatu ia ʻi he ʻInitanetí ʻi he lea faka-Sipeiní mo e Faka-Potukalí. Tanaki atu ki aí, ko e ʻuluaki pulusinga ko ia ʻe fā ʻo e 2011 ʻe hiki tepi mo ia. ʻE vave foki hano tuku atu e ngaahi tatau ʻi he ongó kuo hiki tepiʻi ʻo e Liahoná ʻi ha ngaahi lea fakafonua kehekehe.

ʻOku fakaʻau ke lahi ange ʻa e ngaahi nāunau mei he konifelenisi lahí kuo liliú pea lava ʻo maʻu ʻi he ʻInitanetí. Ne liliu e ngaahi lea ʻo e konifelenisi lahi ko ia ʻo ʻEpeleli 2011 ki he ngaahi lea fakafonua ʻe 92. ʻOku lava ke maʻu ʻa e ngaahi tatau ʻi he ongó kuo hiki tepiʻí ʻi he conference.lds.org ʻOku paaki e Liahoná ʻi ha ngaahi lea fakafonua ʻe 33. ʻOku lava foki ke toe maʻu kinautolu mei he peesi fakahokohoko ʻo e Liahona ʻo Mē 2011 ʻi he liahona.lds.org

ʻOku lolotonga fakahoko ha ngāue ke pulusi ʻi he ʻInitanetí ʻa e ngaahi nāunau mei he konifelenisi ʻo e 1990 ki he lolotongá ni ʻi ha lea fakafonua ʻe 25. ʻE kamata mei he 1990 ʻo faai mai, kapau ne pulusi ha fakataha ʻo e konifelenisi lahí ʻi he ngaahi makasini ʻo e Siasí ʻi he taha ʻo e ngaahi lea fakafonua ko ia ʻe 25, ʻe faitaaʻi (scanned) pea ʻai ia ki he ʻInitanetí ʻi he founga PDF mo e HTML.

Paaki e Hingoa ʻo e Siasí ʻi ha Ngaahi Lea Fakafonua ʻe 100

ʻI hono tuku atu ko ia ʻa e hingoa ʻo e Siasí ʻi he lea faka-Posinia, Masetōnia, Monitenekelini, Pēsia, Silupa, mo e faka-Iepisí, kuo lava ai ʻo pulusi e hingoa kuo ʻiloa ʻaki e Siasí ʻi ha lea fakafonua ʻe 100 tupu.

Ne kamata e ngāué ʻi Tīsema ʻo e 1995 ʻi he taimi ne fai ai ʻe Palesiteni Kōtoni B. Hingikelī (1910–2008) ha fakahinohino ke fokotuʻutuʻu foʻou e founga hono tohi e hingoa ʻo e Siasí. Ne toe fokotuʻutuʻu foʻou e hingoá ke toe ʻasi lahi ange ʻa e hingoa ʻo e Fakamoʻuí ʻa ia ʻoku hā ko e hingoa ia ʻoku ʻiloa ʻaki e Siasí pea kuo talu mei ai mo hono liliu ia mo e anga hono fokotuʻutuʻu ʻi hono taipeʻí (typeset) ki ha ngaahi lea fakafonua kehekehe.

Koeʻuhí kuo hoko ʻa e fōtunga mo e hingoa ʻo e Siasí ko ha ongo meʻa mahuʻinga ʻoku ʻiloʻi ʻaki e Siasí—pea ko ha ongo fakaʻilonga ia kuo lesisita pe maluʻi fakamāmani lahi—kuo hanga ai ʻe he Siasí ʻo faʻufaʻu ha fakahinohino ki hono fakaʻaongaʻi totonu ʻo e fōtunga mo e hingoa ʻo e Siasí.

ʻE lava ke fakaʻaongaʻi ʻe he ngaahi ʻiuniti fakalotofonuá ʻa e fakalea ʻo e hingoa ʻo e Siasí (ʻikai ko e fōtunga ʻo e hingoá) ʻo kapau ʻoku aʻusia ʻa e ngaahi tuʻunga kotoa ko ʻení:

• Ko e ʻekitivitī pe ko e meʻa ʻoku faí ʻa ia ʻoku fekauʻaki mo e hingoá, ʻoku fakalele ʻe he ʻiunití—hangē ko ʻení, ko ha polokalama houalotu sākalamēnití.

• Ngāue ʻaki e hingoa ʻo e ʻiuniti fakalotofonuá ʻo muʻomuʻa ia ʻi he hingoa ʻo e Siasí.

• ʻOku ʻikai faʻifaʻitaki pe faitatau ʻa e mataʻi taipé mo e fōtunga totonu ʻo e hingoa ʻo e Siasí.

Ko e fōtunga totonu ʻo e hingoa ʻo e Siasí ʻe toki fakaʻaongaʻi pē ʻi ha ngaahi meʻa kuo ʻosi fakangofua ʻe he Potungāue Fakafekauʻaki (Correlation Department) ʻi he hetikuota ʻo e Siasí,ʻo hangē ko e ngaahi meʻa ko ʻení:

• Ngaahi tohi totonu ʻa e Siasí mo ha ngaahi ʻuluʻi tohi

• Pine hingoa fakafaifekaú

• Ngaahi hingoa he tuʻa falelotú

ʻOku ʻikai totonu ke fakaʻaongaʻi e fōtunga hingoa ʻo e Siasí ko ha meʻa teuteu pe ke fakaʻaliʻali he komipiutá he taimi ʻoku ʻikai fakaʻaongaʻi aí. ʻOku ʻikai totonu ke fakaʻaongaʻi foki ia ʻi ha faʻahinga meʻa fakatāutaha, fakakomēsiale pe ʻi ha founga tuʻuaki.