Ngaahi Talanoa ʻo Sīsuú
Ko Hono Akoʻi ʻe Sīsū ʻa e Tōʻonga ke Fai ki he Niʻihi Kehé
Mei he Luke 10:25–37.
Naʻe ʻikai ke vālelei e kakai Siú mo e kakai Samēliá. Naʻe ʻikai ke saiʻia e kakai Siú ʻi he kakai naʻe nofo ʻi Samēliá. Naʻá nau pehē ʻe kinautolu ʻoku nau lelei ange ʻi he kakai Samēliá pea nau feinga ke ʻoua naʻa nau fou atu ʻi honau fonuá. Kapau naʻa nau sio ki ha kau Samēlia, naʻe ʻikai ke nau feleaʻaki.
Ka naʻe akonaki ʻa Sīsū ke ke fai ki he kakai kehé ʻa e meʻa te ke loto ke nau fai kiate koé. ʻOku ʻuhinga nai ʻeni ke angalelei ki he kakaí neongo naʻe ʻikai te ke ʻiloʻi kinautolu pe ko ha kau Samēlia kinautolu?
Naʻe pehē ʻe Sīsū ʻoku totonu ke ʻofa ʻa e kakaí ʻi honau kaungāʻapí. Ka ko e kaungāʻapí pē nai ha taha naʻe nofo ofi atu pe ha taha ʻokú mo tatau? Naʻe fai ʻe Sīsū ha talanoa ke tokoni ki he kakaí ke mahino kiate kinautolu ʻa e meʻa ʻoku totonu ke nau fai ki he niʻihi kehé.
Ko e talanoá naʻe ʻi ai ha tangata Siu naʻe fononga he hala mei Selusalemá ki Selikoó. Ko ha hala fakatuʻutāmaki ʻeni naʻe ʻalu hake ʻi ha ʻotu moʻunga māʻolunga. Naʻe faʻa toitoi e kau kaihaʻá ʻi mui ʻi ha ngaahi fuʻu maka lalahi pea nau toki feinga ke taʻofi e kau fononga he halá ʻo kaihaʻasi ʻenau koloá.
Naʻe ʻohofi ʻe he kau kaihaʻa ʻa e tangatá pea nau fakalaveaʻi lahi ia. Naʻa nau vete hono valá pea tuku ia ʻi he veʻehalá ke mate.
Naʻe fononga atu ha taulaʻeiki ʻi he halá ʻo ne mamata ki he tangata naʻe laveá. Ka naʻá ne fakavave atu ki he kauhala ʻe tahá ʻo hoko atu ʻene fonongá.
Naʻe hoko atu ai ha tangata Livaite ʻo mamata ki he tangata naʻe laveá. Naʻá ne ʻalu foki mo ia ki he kauhala ʻe tahá, pea ʻikai ke ne tuʻu ʻo tokoni.
Naʻe haʻu fakamuimui ha tangata mei Samēlia. ʻI heʻene mamata ki he tangata Siu naʻe kafó, naʻá ne ongoʻi manavaʻofa peá ne tuʻu ʻo tokoni.
Naʻe fufulu pea nonoʻo ʻe he Samēliá e ngaahi lavea ʻo e tangatá, fakaheka ia ki heʻene ʻasí, pea ʻave ia ki ha fale talifononga ke ne mālōlō ai mo kai. Naʻe totongi ʻe he tangata Samēliá ʻa e tokotaha tauhi ʻo e fale talifonongá ke ne tokangaʻi ʻa e tangata naʻe laveá kae ʻoua leva ke ne sai.
Naʻe fakahā ʻe he tangata Samēliá ʻa e angalelei mo e ʻaloʻofa ki he tangata naʻe laveá. Naʻá ne tokangaʻi ia hangē hano kaungāʻapí.
ʻOku fie maʻu ʻe Sīsū ke tau fai ki he niʻihi kehé ʻa e meʻa tatau naʻe fai ʻe he tangata Samēliá.
Samēlia
Vaitafe Soataní
Selusalema
Selikō
Konga naʻe toʻo mei he Ko Kalaisi mo e Talavou Pule Koloaʻiá, ʻi he angalelei ʻa e C. Harrison Conroy Co.; ngaahi tā fakatātā ʻa Dan Burr; tā fakatātaaʻi ʻo e ʻatá ʻe Cody Bell