Ui ki he Ngāué: ʻA Koe
Kuo kole ʻe he Kau Palesitenisī ʻUluaki ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki he ngaahi ʻiuniti kotoa ʻo e Siasí ke fakmanatu ʻa e taʻu 75 ʻo e palani uelofea ʻa e Siasí ʻaki haʻanau fokotuʻutuʻu pē ʻe kinautolu ha ʻaho ngāue tokoni lolotonga e taʻu 2011.
ʻOku fakalea ha tohi mei he Kau Palesitenisī ʻUluakí ʻo pehē, “ ʻE lava ke fakahoko e ngāue tokoní ʻi ha faʻahinga taimi pē he toenga ʻo e taʻu ní pea ko hono lōloá ʻe makatuʻunga pē ia he ngāue tokoni ʻoku fakahokó.”
ʻOku ʻomi e ui ko ʻeni ke tokoní hili ʻa e lea ʻa Palesiteni Henelī B. ʻAealingi he fakataha ko ia ʻo e pongipongi Tokonaki ʻo e konifelenisi lahi ko ia ʻo ʻEpelelí.
Naʻe pehē ʻe Palesiteni ʻAealingi ko e Tokoni ʻUluaki ʻi he Kau Palesitenisī ʻUluakí, “ ʻE hanga ʻe he ongoʻi uouangatahá ʻo liunga lahi ʻa e ʻaonga ʻo e ngāue ʻoku mou faí. Pea ʻe tupulaki e ongoʻi uouangatahá ʻi he ngaahi fāmilí, ʻi he Siasí, pea ʻi he tukui koló pea ʻe hoko ia ko ha tukufakaholo ʻe tuʻuloa hili ia ha taimi fuoloa mei he ʻosi ʻa e ngāue tokoní” (“Ngaahi Faingamālie ke Fai Lelei,” Liahona mo e Ensign, Mē 2011, 25).
Ne fokotuʻu mai ʻe he Kau Palesitenisī ʻUluakí ha ngaahi fakahinohino ki he kāingalotu ʻoku nau fokotuʻutuʻu e ngaahi ngāue tokoní, ʻo kau ai hono fakaafeʻi ʻa e kakai ʻo e koló mo e kau faifekau taimi kakató ke nau kau atu pea fokotuʻutuʻu e ngaahi ngāué ke lava e ngaahi fāmilí mo e fakafoʻituituí ʻo kau atu ki ai. Ne poupouʻi foki ke hikiʻi hake hono tokangaekiná mo e mahuʻingaʻia aí.
Kuo ʻi ai e ngaahi uooti, kolo, vahefonua mo e ngaahi siteiki lahi kuo kamata ʻenau tali ʻa e ui ko iá. Ne ʻi ai ha kau ngāue ne nau tui e ngaahi falani engeenga ʻo e Nima Fie Tokoni ʻo e Māmongá pea ko e niʻihi ne nau ngāue pē, ne lahi e tokoni ʻa e kāingalotú, mei he foaki ki he pangikē totó ki hono fakaleleiʻi ʻo ha ngaahi fale ʻi he tukui koló.
ʻOku tokangaʻi ʻe ʻEletā Uolotā F. Konisālesi ʻo e Kau Palesitensī ʻo e Kau Fitungofulú ʻa e ngaahi ngāue ʻa e Siasí ʻi he ʻĒlia Noate ʻAmelika Tonga Hahaké. Naʻá ne fuofua fakatukupaaʻi ʻa e ngaahi faiʻanga lotu kotoa ʻi hono ʻēliá ʻi he 2009 ke nau fakahoko ha ngāue tokoni.
Talu mei ai mo hono fakahoko ʻe he kāingalotu ‘i he fakasaute ʻo e ʻIunaiteti Siteití ha ʻaho ngāue tokoni he taʻu kotoa pē. Naʻe pehē ʻe ʻEletā Konisālesi ʻokú ne fiefia ke ʻilo ʻoku maʻu ʻe he kāingalotu ʻo e Siasí ʻi he funga ʻo e māmaní ʻa e faingamālie ko iá he taʻú ni.
Naʻá ne pehē, “ ʻOku tau ngāue tokoní he ko ha ʻulungāanga faka-Kalaisi ia, pea ko ha faingamālie ia ke hangē ai ko Iá, ke fakatupulaki ha ʻulungāanga ʻo e ngāue tokoní—ko ha tōʻonga fakanatula ʻo e fie tokoni. ʻI heʻetau tokoni ʻo ʻikai ha toe fakakaukau ki ha tui fakalotu, siasi pe matakali, ʻe hoko ʻetau nima fie tokoní ko ha fehokotakiʻanga, ʻo fakatupulaki e ngaahi vā fetuʻutaki mo e tukui koló.”
ʻI Siakisonivila, Folōlita, ʻi he USA, ne tali ai ʻe ha faiʻanga lotu ʻe 11 ʻa e ui ke ngāue tokoní ʻaki haʻanau foaki ha meʻakai pea mo e toto ʻi he ʻaho 16 ʻo ʻEpelelí. Ne fakaʻaongaʻi ha ngaahi falelotu ʻo e Siasí ke tānaki ki ai e ngaahi meʻatokoni ne foakí pea fakaʻaongaʻi e niʻihi ke fai ai e toʻo totó.
Ne fakataha atu ha kāingalotu ʻo e Uooti Sōnasipolo ʻi Siosiā, ʻi he USA, mo ʻenau ngaahi mīsini tutuʻu ki he Stately Oaks Plantation, ʻa ia ko ha feituʻu ʻiloa ne fai ai e faiva Gone with the Wind ʻi he ʻaho 14 ʻo Meé ke fetukutuku e ngaahi ʻakau kuo holó.
ʻI he uike fakaʻosi ko ia ʻo ʻEpelelí, ne ngāue fakataha ai e Kāingalotu ʻi Kalefōnia mo Hauaiʻi ʻi he USA mo ha kau ngāue tokoni mei he tukui koló ke fakahoko e ʻaho fakataʻu ʻo e Nima Fie Tokoni ʻo e Māmongá.
ʻI Seni Tieko Kalefōnia ʻi he USA, ne tokoni ai ha kau ngāue tokoni ʻe toko 150 ke fakamaʻa ha ngaahi maka fakamanatu ʻe 3,000 ʻi he Fort Rosecrans Memorial Park [Paʻake Fakamanatu ʻo Footi Losekalaní], ʻa ia ko ha faʻitoka maʻá e kau sōtia ne mālōlō he taú.
Ne ngāue fakataha e Kāingalotu ʻi Palo Veate, Kalefōnia ʻi he USA mo ha kautaha ʻoku ʻikai ngāue ke fakatupu paʻanga ʻoku ui ko e Clean San Pedro [Tauhi ʻa Seni Petelō ke Maʻa], ke tafi mo fakamaʻa e ngaahi hala mo e saitiuoka ʻi he loto kolo ʻo Seni Peteloó ʻo nau tānaki ai ha veve ne lahi hake ʻi he toni ʻe tahá (kilo ʻe 900).
Ne pehē ʻe Sitivi Kalainisani ko e pule ʻo e Clean San Pedro, “ ʻOku mau saiʻia he ngāue mo e Siasi ko ʻení. ʻOku tokolahi maʻu pē ʻa e kau ngāue tokoni ʻoku haʻú.”
Ne tali ʻe he kāingalotu ʻo e Siteiki Sālote Kalolaina Noaté (USA) ʻa e ui ko ia ʻa e Kau Palesitenisī ʻUluakí ke ʻi ai ha ʻaho ngāue tokoni ʻi he 2011 ʻaki ʻenau ngāue fakataha mo ha kautaha ngāue tokoni ʻofa ke ʻai ha ngaahi kato ke tānaki ha faʻahinga meʻa pē ʻe ala faʻo aí ke foaki ki he niʻihi ʻoku hiki foʻou mai ki he ʻēliá.
Ne lahi hake ʻi he ngaahi tangai pepa ʻe 2,000 ne ʻosi fakapipiki ki ai ha lisi ʻo e ngaahi fie maʻu vivilí pea tuku ia ʻi ha ngaahi feituʻu ʻi he tukui koló. Hili ha uike ʻe taha ne foaki ai ʻe ha kau ngāue tokoni ʻe meimei 130 ha houa ʻe 150 ke tānaki e ngaahi tangai pepá pea foaki ia mo e ngaahi koloa ʻi lotó ki he ngaahi fāmili ʻoku nau lolotonga fai ha ngāue ke liliu mei he nofo tukuhausiá ki ha ʻapi foʻou.
Ne ngaohi ʻe he fānau Palaimeli ʻo e siteikí ha ngaahi fakaʻilonga “ ʻOku Talitali Lelei Koe ki ʻApí Ni” maʻá e ngaahi fāmilí.
ʻI Siosiā, ʻi he USA, ne fakataha mai ai e Uooti Kilifiní ʻi he ʻaho Tokonaki, 21 ʻo Meé ke fakamaʻa ʻa loto mo tuʻa ʻo ha fale fakakolo maʻá e kau tukuhausiá, ʻa ia ʻoku ui ko e Fale ʻo e ʻAmanaki Leleí.
ʻI Kilinitoni, Mīsuli ʻi he ʻIunaiteti Siteití ne fakataha e Kāingalotú ke ʻai ke hā matamatalelei e Jackson Zoo, kau ai hono fakafoʻou ʻo e kelekele ki he ngoue matalaʻiʻakaú, vali pea mo monomono ʻo e ngaahi meʻangāué.
Ne fakamamafaʻi ʻe ʻEletā Konisālesi ʻe faitāpuekina ʻe he ngāue tokoní ʻa kinautolu kāingalotu ʻo e Siasí pea mo kinautolu ʻoku ʻikai kau ki he Siasí fakatouʻosi.
Naʻá ne pehē, “ʻOku lahi e ngaahi founga ke ngāue tokoni aí pea fakahoko ha ngaahi fehokotakiʻanga ʻi he tukui koló. Pea ʻi heʻetau ngāue tokoni ki he niʻihi kehé, te tau vakai ai ki he toʻukupu ʻo e ʻEikí ʻi he moʻui ʻa hotau kāingalotú.”
Ko e fakamaʻa ʻe he kāingalotu ʻi Kalefōnia, ʻi he USAʻa honau koló.
© IRI