Ko e Teuteu ki he Papitaiso maʻá e Kau Pekiá
ʻI hoʻo taʻu 12, te ke maʻu ʻa e faingamālie ke ʻalu ki he temipalé ʻo papitaiso mo hilifakinima maʻanautolu kuo pekia teʻeki ke nau maʻu ha faingamālie ke tali ʻa e ongoongoleleí. Ko ha ngaahi founga ʻeni ʻe niʻihi ke teuteu ai ke hū he temipalé pea ongoʻi ʻa e Laumālie Māʻoniʻoní ai.
Founga Teuteú
-
Maʻu ha tui kia Sīsū Kalaisi. Papitaiso pea hilifakinima ko e mēmipa ʻo Hono Siasí. Kuo pau ke maʻu ʻe he fānau tangatá ʻa e Lakanga Taulaʻeiki Faka-ʻĒloné.
-
Tauhi e ngaahi fekaú pea fai e ngaahi fili ʻoku leleí. Fakatomala ʻi he taimi ʻokú ke fai ai ha faʻahinga meʻa ʻoku halá.
-
ʻInitaviu mo hoʻo pīsopé pe palesiteni fakakoló. Kapau ʻokú ke moʻui taau, te ne ʻoatu haʻo lekomeni temipale fakangatangata.
-
Kapau ʻe lava peá ke tokoni ki hono fai ʻo e hisitōlia fakafāmilí koeʻuhí ke ke lava ʻo ʻave ha ngaahi hingoa fakafāmili ki he temipalé.
-
Ako e folofolá mo e ngaahi tohi ʻa e Siasí (hangē ko e Liahona ʻo ʻOkatopa 2010) ʻa ia ʻe tokoni atu ke mahino kiate koe ʻa e ngāue fakatemipalé.
ʻI he ʻAho Ko Iá
-
Tui ho vala lotú. ʻAi ke ke maʻa mo ke teuteu lelei.
-
Lau e folofolá pe ngaahi makasini ʻa e Siasí, pe fanongo ki ha mūsika ʻoku fakatupulakí.
-
Lotu ke ke ongoʻi ʻa e Laumālie Māʻoniʻoní ʻi hoʻo ʻi he loto temipalé.
-
ʻOua ʻe ʻave ha ʻū tohi, ngaahi meʻa fakaʻilekitulōnika, pe mūsika ʻi hoʻo ʻalu ki he temipalé ʻa ia ʻe ʻikai tokoni atu ke ke ongoʻi ʻapasiá.
ʻI he Temipalé
-
ʻE ʻoatu ha teunga hina ke ke fetongi ki ai. Ko e hinehiná ko e fakaʻilonga ia ʻo e haohaoá mo e maʻá.
-
Te ke lava ʻo mamata ki hano papitaiso ʻo ha niʻihi kehe maʻá e kau pekiá ʻi he faiʻanga papitaisó.
-
ʻE lava ke ke lotu mo fakalaulauloto lolotonga hoʻo tatalí. Ko e temipalé ko ha feituʻu makehe ia ʻe lava ke ke ofi ai ki he Tamai Hēvaní.
-
ʻE hilifakinima koe maʻá e kakai kuo ʻosi fakahoko maʻanautolu e papitaisó.
-
Fakakaukau ki he niʻihi naʻá ke papitaiso mo hilifakinima maʻanautolú pea mo e ngaahi tāpuaki ʻe lava ke nau maʻu he taimí ni koeʻuhi ko hoʻo ngāue tokoni ʻi he temipalé.
Tā fakatātaaʻi ʻo e ʻatá ʻe Christina Smith