Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.
“Ko Hono Maʻu ʻo e Melinó ʻi he Ngaahi Taimi Faingataʻá,” peesi 12: Kimuʻa pea lau ʻa e fakamatalá, mahalo naʻa fie maʻu ke ke kole ange ki ho fāmilí ke nau hiki ha lisi ʻo ha ngaahi faingataʻa pau ʻoku nau fehangahangai mo ia. Fakaʻaongaʻi leva e ngaahi fokotuʻu ko ia ʻa ʻEletā Mamí ke aleaʻi ha ngaahi founga ke maʻu ai ha nonga lolotonga e ngaahi ʻahiʻahí.
“ʻOku Fakafehokotaki ʻe he Ouau Silá ʻa e Ngaahi Fāmilí ke Taʻengata,” peesi 16: Kimuʻa pea lau ʻa e fakamatalá, ʻe lava ke ke fakaafeʻi ho fāmilí ke nau aleaʻi e ʻuhinga ʻo e foʻi lea ko ia ko e talaʻofa. Fakakaukau ke lau ʻa e Tokāteline mo e Ngaahi Fuakava 82:10 pea talanoa ki hono ʻuhinga ʻoku mahuʻinga ai ke fakahoko pea tauhi e ngaahi palōmesi mo e ʻEikí. ʻI hoʻomou lau fakataha ko ia ʻa e fakamatalá, fakakaukau angé ke fai hoʻo fakamoʻoni ʻo kau ki he founga kuo hanga ai ʻe hono tauhi e ngaahi fuakavá ʻo faitāpuekina hoʻo moʻuí.
“Fatongia ki he ʻOtuá, fakataha mo e Tangataʻeikí,” peesi 54: ʻI hono ueʻi fakalaumālie koe ʻe he fakamatalá ni, ʻe lava ke ke kamata ngāue ki ha ʻekitivitī mei he Fatongia ki he ʻOtuá pe Fakalakalaka Fakatāutahá, neongo ʻoku ʻikai haʻo fānau ʻi he taʻu hongofulu tupú (ʻe lava ke ke maʻu e nāunaú ʻi he DutyToGod.lds.org mo e PersonalProgress.lds.org). Kapau ʻoku ʻi ai haʻo fānau ʻi he taʻu hongofulu tupú ʻoku nau lolotonga kau ki ai, fakakaukau ke ngāue e ngaahi tamaí mo e ngaahi ʻōfefiné pea ngāue ʻa e ngaahi faʻeé mo e fānau tangatá.
“ ʻE Malanga ʻAki e Ongoongoleleí ʻi he Māmaní Kotoa,” peesi 64: Makehe mei haʻamou fakahoko ha vaʻinga fakamanatu maʻá e niʻihi kei iiki ange ʻi he fāmilí, ʻe lava ke mou hivaʻi ʻa e “Fanongo ko e ʻEiki ʻOku Ui” (Ngaahi Himí, fika 153). Fakakaukau ke fokotuʻu ha palani ngāue fakafaifekau fakafāmili, fakakau ai ha ngaahi taumuʻa hangē ko hano fakaafeʻi ʻo ha fāmili ki he ʻekitivitī ʻa e Siasí pe faitohi ki ha kau faifekau ʻoku lolotonga ngāue mei homou uōtí.