Manatua ʻo ha Ngaahi Moʻui Maʻongoʻonga
Tulumani O. ʻEnisolo
Ne taʻu lahi e ngāue tā-mape fakatufunga ʻa Tulumani ʻOsipooni ʻEnisolo (Truman Osborn Angell) (1810–87) maʻá e Siasí, ʻo ne palani mo fakahinohino hono langa ʻo ha ngaahi fale fakaʻofoʻofa lahi, kau ai e Temipale Sōlekí. Naʻe loto fakatōkilalo mo talangofua ʻa Tulumani ʻi he ngaahi taʻu kotoa ko ia naʻe ngāue ai maʻá e Siasí.
Naʻe fāʻeleʻi ia ʻi he ʻaho 5 ʻo Sune 1810, ʻi Poloviteni, Louti ʻAilani, ʻi he USA. ʻI hono taʻu hongofulu tupú, naʻe akoʻi ia ʻe ha tangata nimameaʻa ʻi honau fonuá pē ʻi he ngāue fakatufungá mo e fakasanisaní pea mo hono ngāue makehe ʻaki ʻo e papá.
ʻI hono taʻu 22 naʻe fakafeʻiloaki ia ki he Siasí ʻe hono tuofefiné, ʻa ia naʻá ne maʻu ha tatau ʻo e Tohi ʻa Molomoná mei he faifekau ko Tōmasi B. Maasi. Naʻe papitaiso fakataha ʻa Tulumani mo ʻene faʻeé, ko Fīpē, mo hono uaifi ko Polí ʻi Sānuali ʻo e 1833.
Taimi nounou pē mei hono fakanofo ʻo Tulumani ko e mēmipa ʻo e Kōlomu hono Ua ʻo e Kau Fitungofulú, naʻe kole ange ʻa e Palōfita ko Siosefa Sāmitá ke ne langa ha falekoloa ʻi Ketilani, ʻi ʻOhaiō, ka naʻe ʻikai tali ʻe Tulumani ʻo ne talaange ʻoku teuteu ia ke ʻalu ʻo ngāue fakafaifekau. Ka ʻi he ʻaho pē hono hokó, naʻe vakai mamaʻo atu ʻa Tulumani ki he Kau Palesitenisī ʻUluakí pea naʻe ueʻi ia ke ne tali ʻa e ngāue langa naʻe ʻoange ʻe he Palōfitá. Naʻá ne tohi kimui ai, “Ne u fai ki ai ʻo u liliu e meʻa naʻá ku fie faí kau talangofua.”1
Naʻe fekauʻi atu ʻe Palesiteni Pilikihami ʻIongi ʻa Tulumani ʻi he 1856 ke ʻalu ʻo ngāue fakafaifekau ki ʻIulope, pea fakahinohino ia ke ne “ʻave ha ngaahi mape mahuʻinga ʻo ha ngaahi fale” koeʻuhí ke ne “ʻi ha tuʻunga lelei ange ke hokohoko atu” ʻene ngāue ʻi he Temipale Sōlekí mo ha ngaahi fale kehe pē.2
Naʻe uiuiʻi ʻa Tulumani ke hoko ko e tangata tā palani ʻa e Siasí ʻi he 1867. (ʻOku ʻikai ke kei ui ʻe he Siasí ha tokotaha pehē.) Neongo naʻe mahamahaki ʻa Tulumani tupu mei he ngaahi taʻu lahi naʻe ngāue aí, ka naʻá ne tali ʻa e uiuiʻí. Naʻá ne tohi ʻi heʻene tohinoá, “ʻOku ou ongoʻi ongosia lahi ka ʻo kapau ʻoku ongoʻi ʻe he Palesitení mo hoku kau takí ke nau poupouʻi ha tokotaha māʻulalo mo taʻeʻaonga hangē ko aú ke u hoko ko e Tokotaha Tā Palani ʻa e Siasí, tuku ke u feinga ke ngāue maʻanautolu pea ʻoua naʻa fakamāʻi au. ʻOfa ke tokoniʻi au ʻe he ʻEikí ke u fakahoko ia.”3
Naʻe tokangaʻi ʻe Tulumani hono langa ʻo ha ngaahi fale lahi ʻi ʻIutā, kau ai ʻa e Fale Laioné, Fale Punungahoné, Fale Fakapuleʻanga ʻo e Siteiti ʻIutaá, mo e Temipale Seni Siaosi ʻIutaá.
Naʻe ʻikai moʻui ʻa Tulumani ke mamata ʻi hono fakatapui ʻo e Temipale Sōlekí ʻi he 1893, ka naʻá ne ngāue faivelenga ʻi heʻene hoko ko e tangata tā palani ʻa e Siasí ʻo aʻu ai pē ki heʻene mālōlō ʻi he 1887.