Naʻe Liliu ʻeku Fakakaukaú

Sēsika Pakisesi, ʻAitahō, USA

Ko hoku taʻu 21 ia pea naʻá ma fakalele ha fale ngaohi ʻulu mo ha taha kehe. Naʻá ku faiako ʻi ha kalasi Palaimeli he lotú. Naʻe lele lelei ʻeku moʻuí ka ne u ongoʻi taʻefiemālie pē. Hangē naʻe ʻi ai mo e meʻa kehe ia naʻe fie maʻu ke u fai—ka ne ʻikai ke u ʻiloʻi pe ko e hā.

ʻI he ʻaho Sāpate ʻe taha naʻe ui au ʻe heʻeku pīsopé ki hono ʻōfisi peá ne fehuʻi mai pe kuó u fakakaukau nai ke u ʻalu ʻo ngāue fakafaifekau. Naʻe ʻikai ke u ʻamanaki ki he fehuʻi naʻá ne fai maí. Ko e taʻu ua pē ʻeni ʻeku kau ki he Siasí pea ne teʻeki ai pē ke u fakakaukau ngāue fakafaifekau.

Naʻá ku talaange ki he pīsopé naʻe ʻikai ke u fakakaukau au naʻe feʻunga ke u ngāue fakafaifekau. ʻI heʻeku hū atu mei hono ʻōfisí, naʻá ne pehē mai, “Ka liliu leva hoʻo fakakaukaú pea tala mai.” Ne u pehē ʻe au ko ʻene ʻosí ia, ka ne kei ongo mai pē ki hoku ʻatamaí e ngaahi lea ʻa e pīsopé.

Ne u fehuʻi loto pē kiate au pe ʻe lava fēfē ke u ngāue fakafaifekau. Ko au pē ʻi hoku fāmilí naʻe kau ki he Siasí. Ko e hā ha ongoʻi hoku fāmilí? ʻE fēfē leva hoku fale ngaahi ʻulú? Te u lavaʻi nai e ngāue ʻi he taʻu ʻe taha mo e kongá?

ʻI heʻeku fakakaukauloto ki he ngaahi fehuʻi ko ʻení, naʻe ueʻi au ke u lau e Tohi ʻa Molomoná. Ne u toʻo hake ia ʻo huke ki he vahe valu ʻo e tohi ʻa ʻAlamaá. ʻI heʻeku lau kau ki he ngāue fakafaifekau ʻa ʻAlamā mo ʻAmulekí, naʻá ku ʻiloʻi naʻe fie maʻu foki ke u “fakahā ʻa e ngaahi folofola ʻa e ʻEikí” (veesi 30). ʻI he Sāpate hokó ne u talaange ki heʻeku pīsopé kuo liliu ʻeku fakakaukaú pea naʻá ku fie ʻalu ʻo ngāue fakafaifekau.

Naʻe poupou mai hoku fāmilí, pea naʻe lava ke u fakatau atu ʻa ʻeku konga ʻi he fale ngaahi ʻulú. Naʻá ku ngāue ʻi Kalākasi ʻi Venesuela, pea ʻoku kei hokohoko atu pē ʻeku maʻu ʻa e ngaahi tāpuaki ʻo e ngāue lelei maʻá e ʻEikí.