O se Valaau mo Tagata e Saunia Faasinoupu o Igoa i le Lalolagi Atoa
Talu mai le faailoaina mai o le faasino igoa i le FamilySearch i le 2006, ua sili atu ma le 800 miliona faamaumauga ua faamaumauina faakomepiuta. Ae peitai e lei maea le galuega, ma o loo faateleina le manaomia o tagata e saunia le faasinoupu o igoa i le lalolagi atoa.
Ina ua foi mai Hilary Lemon o Iuta, ISA, mai lana misiona, toe o ni nai masina ona toe amata lea o lana aoga. I le sailiga o ni auala e faaaoga ai ma le tatau lona taimi, na amata ai ona ia fesoasoani i le initoneti i le faasinoupu o igoa i le FamilySearch. Na amata ona ia galue i le faasinoupu o igoa i le Igilisi, ae na vave ona ia iloaina o loo i ai avanoa mo le faasinoupu o igoa i isi gagana—e i ai le faaPotukale, le gagana na ia aoaoina i lana misiona.
“Ona sa ou faamisiona i Potukale, na ou fiafia i galuega faatino o le faasino igoa o loo lisiina mo Pasila ma Potukale. Na faaosofia lou fiafia ina ua ou vaai i se galuega faatino mai Setupale, i Potukale, o se tasi o eria na ou auauna ai,” le tala a Hilary.
O Hilary o se tasi o volenitia o loo fesoasoani e taulimaina le manaoga faateleina o le FamilySearch ina ia saunia se faasinoupu e faia ai faamaumauga i gagana e ese mai le Igilisi. E pei o isi volenitia e 127,000 o loo galulue nei, o loo pikiina mai e Hilary igoa ma mea na tutupu ia i latou ua maliliu ina ia mafai ai e tagata lotu ona maua faamatalaga o loo latou sailia ma faataunuuina galuega mo sauniga o o latou tuaa i le malumalu.
O le a Le Faasino Igoa?
O le faasino igoa i le FamilySearch o se faagasologa o le faitauina o vaega ua faamaumauina i komepiuta o faamaumauga ua maua—e pei o tusiga igoa, tulaga taua, uili, ma faamaumauga a le ekalesia—ma taina faamatalaga o loo maua ai i faamaumauga i se faila e mafai ona sueina i le initoneti. E ala atu i lenei galuega, o volenitia i le faasino igoa, ua mafai ai e tagata o le ekalesia ma isi tagata sailiili i le FamilySearch ona saili ma faigofie ona maua faamatalaga o o latou tuaa i luga o le initoneti.
Ua faafaigofieina e le faasino igoa ma faia se faamama avega i galuega o talafaasolopito o aiga. “I taimi ua tuanai afai o loo e sailia ni tagata o lou aiga, e tatau ona e viliina se lisi ninii uumi o faamaumauga. Pe a e mauaina se tagata o le aiga na e sailia, e ono mafai ona e mauaina ni igoa e fesootai i ai. O lona uiga e tatau ona e toe viliina pea lava pea i tua ma luma le lisi umi o faamaumauga,” le tala a József Szabadkai, o se tagata faasino igoa i Hungary.
O le taimi lenei ua faaauau e le FamilySearch ona ao mai faamaumauga tuai mai malo ma faamaumauga a le au teu fale i le salafa o le lalolagi. Ae peitai nai lo le pueina o faamaumauga ma faia ni ata ia maua e tagata sailiili, ua mafai ona pueina e tagata faigaluega o le FamilySearch ma tuuina i totonu o le polokalama o le faasino igoa. E toina mai e volenitia nei ata i a latou komepiuta ma taina faamatalaga e pei ona latou vaaia. I lenei auala, o faamatalaga ua tuuina i le komepiuta e mafai ona maua i le polokalama o le sailiga i le FamilySearch.org a o saofafai tagata sailiili i le mafanafana o o latou lava fale.
O le a le Tulaga ua Oo i ai le Faasino Igoa?
Talu mai le faailoaina o le Faasino Igoa a le FamilySearch i le 2006, ua maoae tele le alualu iluma o volenitia faasino igoa—ua faaliliuina nei e tusa ma le 800 miliona faamaumauga. Ae peitai e lei taitai lava ona maea le galuega. O le Granite Mountain Records Vault i le Aai o Sate Leki, o loo teuina ma puipuia ai faamaumauga, o loo i ai ni faamaumauga pe 15 piliona—ma le tele naunau o faamaumauga o loo faaopoopoina pea. O nei faamaumauga o loo i ai faamatalaga e uiga i le fia piliona o tagata mai le sili atu ma le 100 atunuu, ma e aofia ai le sili atu ma le 170 gagana.
O Robert Magnuski, o se faifeautalai mo auaunaga a le Ekalesia ma o se tagata o loo galue i le faasino igoa mai Polani, ua aoao e ia mai lona poto masani le manaomia tele o volenitia e ese mai le Igilisi a latou gagana. “Ona o le vavaeina o le atunuu mai le 1772 i le 1918, na tausia ai faamaumauga a Polani i gagana e fa: Rusia, Siamani, Latina, ma le gagana Polani,” na ia faamalamalama mai. Ona o le tele o tagata galulue i le faasino igoa i Polani e tautatala i le gagana Polani, o lea na latou amata ai i le faasino igoa i faamaumauga i le gagana Polani. O loo taatia pea la galuega e tatau ona fai mo faamaumauga i le gagana Rusia, Siamani, ma le Latina. E mafai ona maua e tagata o loo sailia talafaasolopito o aiga i le lalolagi atoa o latou tuaa, i le fesoasoani a volenitia i le salafa o le lalolagi, o loo i ai le poto masani i gagana eseese—e tusa lava po o le a le gagana na faamaumauina ai faamatalaga.
Ina ia maua nei faamaumauga, o loo maua le polokalama o le faasino igoa i le initoneti i gagana e 11: gagana a Take, Igilisi, Farani, Siamani, Italia, Iapani, Polani, Potukale, Rusia, Sipaniolo, ma le Suetena. O tagata e tautatala i soo se gagana o nei gagana—pe o lana gagana masani pe na maua mai le galuega faafaifeautalai, aoga, po o se isi aoaoga—ua uunaia e saini i luga o le initoneti ma amata ona galue i le faasino igoa i faamaumauga.
E Faapefea Ona Ou Amata?
O le amataina o se volenitia faasino igoa e vave ma faigofie. Mulimuli i faatonuga i le indexing.familysearch.org ina ia sii mai le polokalama i lau komepiuta. Sosoo ai, faatulaga sau faitotoa [account], ona filifili lea o se vaega, po o se “poloka”, o faamaumauga e faia se faasinoupu. Ua faavasegaina faamaumauga i ni poloka tai 20 i le 50 igoa ina ia maua ai e volenitia se taimi sili ona laitiiti po o le tele foi latou te mananao e fai ai le faasino igoa. O poloka taitasi e alu le 30 minute e faamaea ai, ae e mafai lava ona e taofi i le ogatotonu ma toe foi mai i ai mulimuli ane aua e sefe e le polokalama le galuega na e galue ai. Afai e te le faamaeaina le poloka o igoa i totonu o le vaiaso, o le a avanoa loa mo isi e faamaeaina.
O poloka mai atunuu i le salafa o le lalolagi ua saunia mo le faasino igoa a o mauaina faamaumauga mai na atunuu e le FamilySearch. O Uso Szabadkai e mai Hungary, ae na ia amata ona galue i le faasino igoa i le Igilisi ma le faaAferika seia maua mai faamaumauga mai lona lava atunuu. “O se taimi sili ona fiafia ina ua faailoaina aloaia mai le poloka muamua i le gagana Hungary i le amataga o le 2011,” le saunoaga a Uso Szabadkai. “Ua toatele tagata Hungary—talavou ma matutua—ua resitala ma ua pei e “valelea” i le faiga o le faasino igoa talu mai lena taimi.” Na faaosofia le fiafia o Uso Szabadkai ona o le faamoemoe o le tele o ona lava tuaa o le a mauaina pe a faaliliuina nei faamaumauga. “A o matou fausia lenei polokalama maoae, o le a mafai ai ona matou maua le tele o igoa o matou aiga, e faasaoina le taimi ma fesoasoani e vave maua ai sauniga faaola o matou tuaa.”
Ae Faapefea pe Afai Ou Te Le Maua le Tekinolosi Fou?
I vaega eseese o le lalolagi, o le mauaina o se komepiuta ma le faaaogaina o le Initoneti e aumaia ai se luitau mo nisi o loo naunau e faia le faasino igoa. O le tulaga lenei na feagai ma taitai o le Siteki o Saraemila o le Aai o Mekisiko ina ua latou filifili e faaaafia le autalavou laiti i le faasino igoa. Ona e le maua uma e talavou ni komepiuta i o latou aiga, na filifili taitai o le siteki e faaavanoa potu o komepiuta a le aoga o le lotoifale i le manava o galuega mo i latou e faaaogaina.
Ona galulue loa lea o le autalavou i le faasino igoa mai faamaumauga o le tusigaigoa a Mekisiko mai le 1930. “A o iloiloina e le autalavou faamatalaga,” le saunoa mai a Epikopo Tario Sapata Viva, “na latou vaai faalemafaufau i tagata o malaga mai lea fale i lea fale e aoina nei faamatalaga uma e aunoa ma le iloaina o la latou taumafaiga o le a fesoasoani i le galuega a le Alii i se aso e ‘aumaia le tino ola pea ma le ola faavavau o le tagata’” (Mose 1:39).
Ua ala atu i taumafaiga atamai a taitai o le siteki ina ia maua le tekinolosi na manaomia, na mafai e le autalavou ma isi tagata o le siteki ona faia le faasino igoa e sili atu ma le 300,000 faamaumauga i le masina e tasi.
E pei ona faaalia e le autalavou a le siteki a Saraemila, afai e leai sa oe lava komepiuta, e mafai lava ona e auai. E mafai ona faataunuuina le polokalama o le faasino igoa i soo se komepiuta e mafai ona maua ai le Initoneti, e aofia ai fale o isi tagata o le ekalesia, nofoaga autu o talafaasolopito o aiga, falelotu, ma e oo foi i aoga po o faletusi pe a faatagaina.
O Faamanuiaga o le Faasino Igoa
O faamatalaga faaPotukale na faasino igoa ai Tuafafine Hilari Lemoni o ni faamaumauga o papatisoga i le silia ma le lua seneturi ua mavae. Ua le manino itulau ma sa faigata ona faitau le tusilima fegauiai, ae na ia punouai i le galuega faatino a o ia mafaufau, o igoa i luga o itulau o tagata o loo faatali mai mo a latou galuega ina ia faataunuuina i le malumalu.
“E sili ma le tasi le taimi a o ou faasino igoa, na ou lagona ai se faalogona matagofie, e i ai se aso o le a tatala ai e se tagata Potukale o le Au Paia o Aso e Gata Ai lena faamaumauga o papatisoga na ou faasino igoa ai ma maua ai lona tuaa,” le tala a Hilari. “O lenei la ua fuafuaina le malumalu mo Lisbon, i Potukale, ou te iloa o le a oo mai le aso o le a maua ai e tagata o le ekalesia iina o latou tuaa ona o le galuega na faia e ala atu i le faasino igoa i le FamilySearch.”
Faatasi ai ma le fesoasoani a volenitia e pei o Tuafafine Lemoni, o le a tele atu faamaumauga e faasaoina ma o le a tatalaina le avanoa mo i latou ua maliliu ia maua ai faamanuiaga atoatoa o le talalelei.
Tua o le ata na saunia e Bradley Clark; ata pue o maa faamanatu saunia e David Stoker; agavale: ata na tusia e Cody Bell; taumatau: ata na tusia e Robert Casey © 2005 IRI
Agavale: ata na tusia e Welden C. Andersen