Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga.O nai faataitaiga nei.

“Ua Ou Faia Ea Se Lelei i le Asō?” itulau e 14: Mafaufau e amata i le usuina o le viiga “Ia Viia Oe, le Atua” (Viiga, nu. 10). Faitau faatasi le tusiga pe filifili a o lei amataina ia vaega e sili ona e fiafia i ai e faitau. Fai atu i tagata o le aiga po o a ni mea ua latou aoaoina e uiga ia Peresitene Thomas S. Monson. Tufa atu penitala ma pepa e tusi ai e tagata uma a latou molimau e uiga ia Peresitene Monson o le perofeta soifua. Ia valaaulia tagata o le aiga e faamalosia lenei molimau e ala i le tatalo faamaoni. Mafaufau e faaiuina i le usuina o le viiga “Ua Ou Faia Ea Se Lelei i le Asō?” (Viiga, nu. 17).

“O Se Valaau mo Tagata e Faia Faasinoupu o Igoa i le Lalolagi Atoa,” itulau e 34: Faitau muamua le tusiga a o le’i faia le afiafi faaleaiga. I le taimi o le afiafi faaleaiga, ia faamalamalama atu le mafuaaga ua avea ai le faia o faasinoupu o igoa a le FamilySearch o se vaega taua o le galuega o talafaasolopito o aiga ma le mafuaaga ua manaomia ai ni tagata se toatele e faamaopoopoina igoa. Afai o loo i ai sau komepiuta ma mafai ona faaaoga le Initoneti i le fale, alu i le indexing.familysearch.org. Seti ni faitotoa mo tagata o le aiga o e e le’i faia muamua se faasinoupu o igoa ma faaalu sina taimi e galulue faatasi ai i le faiga o faasino igoa.

“Mulimuli i le Perofeta,” itulau e 42: Otooto le tusiga mo lou aiga. Atonu e te manao e faitau faatasi le vaega mulimuli o le tusiga, “Aoao e Faalogo i Upu Faaperofeta.” Toe faamanatu ia fuaitau o loo faapea mai ai Elder Bennett e mafai ona fesoasoani ia i tatou e iloatino ai le taitaiga e tuuina mai e le perofeta ia i tatou. Ia valaaulia tagata o le aiga e faalogo mo nei fuaitau i le konafesi aoao i le masina a sau. Mafaufau e faaiu i lau molimau e uiga i le mulimuli i le perofeta.

“Tuuatoatasi ae le o Tuulafoaiina,” itulau e 54: Amata i le fesili atu pe lagona e tagata o le aiga le tuuatoatasi a o latou taumafai e ola i tulaga faatonuina a le Alii. E faapefea ona latou faafetauia nei lagona? Faasoa atu le tala ia Juan Cabrera. Mafaufau e valaaulia se tagata e faasoa atu le ala na ia tausia ai poloaiga ae le tausia e isi ma le auala na faamanuiaina ai o ia ona o lena usiusitai.

“Filifili Nei Loa,” itulau e 66: A uma ona faitau le tusiga, ia outou taliina faatasi ma lau fanau fesili o loo i lalo o le “Ioe po o le Leai?”. Ona mafaufau lea i nisi o tulaga e manaomia ai le filifili i le va o le sa’o ma le sese ma fesili atu po o le a se mea latou te faia i na tulaga taitasi.

Musuia e le Tusi Lesona a le Vasega Pepe

O le afiafi faaleaiga e aupito sili ona ou manatua na amataina i se gaoioiga i le tusi lesona a le vasega pepe. Sa matou faatinoina faatasi ma le ma fanau teine latiti, ma lo’u toalua se fuaitau o le gaoioiga. Sa matou faitauina: “Afai e te umi, umi lava, e iloa ma e alofa le Tama Faalelagi ia te oe. Afai e te laitiiti, laitiiti lava, e iloa ma alofa le Tama Faalelagi ia te oe. Umi, Laitiiti, Umi, Laitiiti, e iloa ma e alofa le Tama Faalelagi ia i tatou uma lava.” A o matou faitau, sa matou faapupuu faalaiti pe tetee faauumi ma faasino po o le a lava o matou tulaga, e alofa le Tama Faalelagi ia i matou. (Tagai i le Vaai Ia i Outou Tamaiti [2008], 9.)

Ona ō lea o lo’u toalua ma le ma fanau teine e aumai ni pai fualaau laiti, ma matou aai faatasi ai. Sa matuai fiafia lava teineiti sa latou mananao ai e toe fai le gaoioiga laitiiti-ma le umi i le aluga o le vaiaso.

O le matagofie o afiafi faaleaiga o lona maufetuutuunai. O a matou afiafi faaleaiga e masani lava ona pupuu ma faigofie mo lo matou aiga laiti, ae matou te taumafai e aoao le ma fanau teine i mataupu faavae taua e pei o le alofa, agalelei, ma le tatalo faatasi.

Valentina Portolan Simonovich, Italia