Tatou Te Lagolagoina o Tatou Taitai

E talitonu le Au Paia o Aso e Gata Ai o Iesu Keriso Lava Ia o le ulu o Le Ekalesia a Iesu Keriso o le Au Paia o Aso e Gata Ai. Na te valaauina, e ala i musumusuga, ia perofeta ma aposetolo e taitaia Lana Ekalesia. Ua tuu atu e le Alii i nei taitai le pule e valaauina ai isi e auauna atu i le Ekalesia, e pei o sui o Fitugafulu. E tuu atu e Aposetolo ma Fitugafulu valaauga i peresitene o siteki, o e valaauina epikopo, o e tofia tagata e galulue i tofiga eseese i a latou uarota. E taitaia e le pule o le perisitua ma faaaliga ia valaauga a le Ekalesia mai tulaga uma o le Ekalesia atoa e oo atu i aulotu i le lotoifale.

Tatou te maua le avanoa e lagolagoina ai—faamalosiau, fesoasoani, tatalo mo—nei tagata taitasi i o latou valaauga. Tatou te faailoa atu lo tatou naunautai e faia lena mea e ala i le siiina o tatou lima taumatau pe a faitau mai o latou igoa i le konafesi aoao, konafesi faalesiteki, konafesi faaleuarota, po o le sauniga faamanatuga. O le siiina o o tatou lima o se faailoga lea ia i tatou, ia i latou, ma le Alii tatou te lagolagoina i latou.

O le siiina o o tatou lima e lagolago ai se tasi e le faapea o loo palotaina ai lena tagata i se tofiga. Ua uma ona valaauina le tagata e le Alii e auauna atu i lena tofiga, e ala atu i se tasi o i ai le pule o le perisitua e tuu atu ai lena valaauga. O le tatou lagolagoina, o se palota o le faatuatuaina o le tagata, aua ua tatou iloaina ua valaauina o ia e le Atua e ala i taitai perisitua ua tatou lagolagoina.

E mafai ona tatou lagolagoina le Pulega Aoao ma o tatou taitai ma au-ofisa i le lotoifale i le tele o auala:

E ala i lo tatou faatuatua ma tatalo mo i latou.
E ala i le mulimuli i a latou fautuaga.
E ala i le fesoasoani atu pe a latou talosagaina i tatou.
E ala i le taliaina o valaauga latou te tuuina mai ia i tatou.

O le lagolagoina o o tatou taitai o se faamaoniga lea o lo tatou agalelei, faatuatua, ma le faaaumea.

Tatou te lagolagoina le Au-Pulega Aoao o le Ekalesia.
Tatou te faailoa atu, e ala i le siiina o o tatou lima, o le a tatou lagolagoina o tatou taitai faalelotoifale faapea ma isi o e ua valaauina e auauna mai ia i tatou.
Tatou te lagolagoina o tatou taitai e ala i le mulimuli i a latou fautuaga.
Tatou te lagolagoina o tatou taitai e ala i le taliaina o valaauga, aua ua tuu mai ia i tatou ni valaauga e “i latou o e o i ai le pule” (Mataupu Faavae o le Faatuatua 1:5).
Tatou te lagolagoina o tatou taitai e ala i le tatalo mo i latou (tagai i le MF&F 107:22).

Pito i lalo: ata na pueina e John Luke; taumatau: ata na pueina e Leslie Nilsson; ata na tusia e Craig Dimond ma Welden C. Andersen