O Le Tagata Taalo Lakapi Sili ona Lelei
“Fetalai mai o Iesu; ia alofa atu” (Tusipese a Tamaiti, 39).
Na uu au moto, u lou laugutu, ma kiki le polo o loo taavale mai ia te au. Ona ou faauu lea a o vaai atu ua lele atu i fafo nai lo le alu i totonu o le pou.
Sa tutu se teine e igoa ia Na i le pa ma matamata i la matou taaloga. Na ia tamoe e aumai le polo, ma see ai i lona fiafia. Na featai tagata uma. E leai se tasi na faafetai ia te ia a o ia togiina mai le polo ia i matou.
Na ou lagona le tausalaina. Na ou iloa na manao Na e taalo, ae ou te lei manao e avea ma tagata e valaauliaina o ia.
O Na e filemu, ma se lauulu migimigi enaena, ma se vaaiga tioata mafiafia, ma se leo ii. E leai sana uo se toatasi i le matou vasega atoa. E le faapea ou te le fiafia ia te ia. Ou te lei tautala lava ia te ia.
I lena aoauli na faailoa mai ai e lo matou faiaoga o le a ia fesuiaia a matou kesi. O le a ia faia se siata fou o nofoaga.
Na pisapisao le potu i le fiafia. Na ma featai ma lau uo sili, o Liana.
Ona faalagolago mai lea o Kaloline ia te au. “Na ou faalogo o fai atu Nan ia Mrs. Matini e fia nofo i ou tafatafa. Isa!”
Na ou nofo ma le te’i. “Aisea ua manao ai ia au?” sa ou tomanatu ai. Ou te lei agaleaga lava ia Na, ae ou te lei agalelei foi ia te ia.
“Tau i le faiaoga e te le fia nofo i ona tafatafa,” o le musumusu atu lea a Kaloline. “A le o lena, o le a leai se isi e fia nofo i ou tafatafa.”
Na ou tilotilo atu ia Na. Sa punou lona ulu. Atonu na ia iloaina le mea o loo mafaufau i ai tagata uma lava o loo i le potu.
Na valaau mai au e Mrs. Matini i lana kesi. Na ou iloa o Na o se afafine o le Atua ma na fetalai mai Iesu e alofa i tagata uma. Ae afai o le a ou faauo atu ia Na, o le a faapea uma tamaiti ou te vasi.
“O ai e te fia nofo i ona talane?” na fesili mai ai Mrs. Matini ia te au.
“O Liana,” na ou fai atu ai. Na faigofie lava.
Na ata mai Mrs. Matini. “Pe mata e mafai foi ona e nofo i talaane o Na?”
Na ou tilotilo i lalo i le fola ma musumusu atu, “E sili pe a leai.”
Na vaaia le ofo o Mrs. Matini. “Ua e mautinoa, Angie?”
“Ioe,” na ou memumemu atu ai.
O le aso na sosoo ai na fesuiai ai matou kesi. Na ou nofo i talaane o Liana. Sa i le isi itu o le potu Na. Sa toso ese e teine na nonofo i ona talaane a la kesi ma na foliga mai sa ia nofo toatasi. Na foliga mai o le a tagi o ia.
O ni nai vaiaso na sosoo ai na suia ai le aoga a Na. Sa aoga i lena aoga se teine mai lau uarota, ma na ou fesili atu ia te ia pe na feiloai i se teine fou e igoa ia Na.
“Pei a. E faapei ona foliga?” na ia fesili mai ai.
“Ia, e filemu lava o ia. E veuveua lona lauulu, ma e fai sana vaaiga mafiafia. E leai se isi i la’u vasega na fiafia ia te ia.”
“E mo’i? “Masalo e le o le teine lena,” na ia fai mai ai. “O le teine fou ou te iloa e ese le fiafia. E fiafia uma i ai tagata. O ia o se tagata taalo lakapi maoae.”
Na ou mafaufau i le aso na matamata mai ai Na a o matou taaalo lakapi. Pau lava le mea na ia manaomia o se avanoa ma se uo. Ma na tatau ona ou tuuina atu na mea uma ia te ia.
O le aso lena na ou faia ai se folafolaga ia te au lava ia, ia ou agalelei i taimi uma i soo se tasi ma aua le tuuina atu se teine e pei o Na e mou ese atu ma au, e aunoa ma le taumafai e avea ma ana uo.
Ata na tusia e Brad Clark