Ua Aoao Apu i le Faamaoni
“Faamaoni e tatau ona amata ia te au, i mea uma ou te tautala ai, ma mea uma ou te faia” (Tusi Pese a Tamaiti, 149).
Sa nofonofo Apu i fafo ma matamata i tagata o savavali ane i le auala i luma o lona fale. Na matuai fiaai lava Apu. Sa latalata ane Mariana, o loo faatau ana masi suamalie, o loo savali i tua ma luma o le auala. Na foliga manaia mai masi i o latou pepa iila felanulanuai. Na ave e Mariana ia masi i se apa i luga o lona ulu. Na matuai manao lava Apu i se pepa o na masi. Na ia iloa o le a matuai manaia lava.
Na tu Mariana ma tuu i lalo masi i luma tonu lava o Apu.
“Na ia iloa ua ou fiaai ma ua ia tuuina masi iinei mo au!” na ia mafaufau ai. Na ia faavave lava ona aumai se pepa masi.
Na iloa atu o ia e lona tama, i le taimi lava lena. “Apu, o le a le mea lena e ia te oe?” na ia fesili mai ai.
“Papa, ua ou fiaai lava! Ou te manaomia ni masi,” na fai atu ai Apu.
Na opo mai e Papa, ma le alofa, Apu i ona lima. “Apu, ou te manao ia i ai ni au masi,” na ia fai atu ai. “Ae le mafai ona e aveina ni mea mai isi tagata e aunoa ma le faanoi pe totogi mo na mea. Pe na e fesili atu ia Mariana pe mafai ona ave ma oe ni ana masi?”
“Leai,” na fai atu ai Apu, a o punou i lalo.
“Sei ta toe faafoi ia Mariana lenei pepa masi lapoa, ma o le a ou faatauina se pepa laitiiti mo oe. Ou te manao ia e aoao ia faamaoni. Pe e te iloa le uiga o lena mea?”
“Tau mai ia te au, Papa,” na fai atu ai Apu.
“O lona uiga o le faia o le mea sao,” na fai atu ai Papa. “O lona uiga ia totogi mo mea nai lo le gaoi. O lona uiga o le faia o le mea ua e fai atu o le a e faia. O lea la, o le a ta totogiina Mariana mo se pepa o ana masi. E manaomia e Mariana le tupe e faatau ai meaai mo lana fanau. Ou te alofa ia oe, Apu, ma e alofa foi le Tama Faalelagi ia te oe. Ma e fiafia o Ia pe a e faia le mea sao.”
“Ou te alofa foi ia te oe, Papa,” na fai atu ai Apu. “Ou te fia faamaoni i taimi uma.”
Ata na tusia e Don Seegmiller