O Le Polokalama o le Seminare i le Lalolagi Atoa e Taula ai Tagata Aooga i le Talalelei
O Milton Reis o Potukale e alu i le falelotu i le lotoifale. O Frazer Cluff o Tasemenia, Ausetalia, e auai i le seminare i le fale, ma o lona tina o lona faiaoga lea. O Lauren Homer o Iuta, ISA, e kolosi atu i le auala e auai i le seminare i le taimi o le piliota lona lua a le aoga maualuga e fai i le isi aso ae misi i le isi aso; O Ben Gilbert o Vermont, ISA, e faalevaiaso ona auai, e fai a o le’i faia le Mutuale; ma i Alapama, ISA, e auai ai McKenzie Morrill i aso uma lava e ala i talanoaga e fai i le uepi. O Daun Park o Korea e auai i ai i le 10:00 i le po, ae o Jamie Greenwood o Niu Mekisiko, ISA, e ala i luga i le 4:00 i le vaveao, ina ia mafai ona oo atu tonu i le vasega i le 5:15 i le taeao.
O nei talavou uma—ma e toeitiiti atoa le 370,000 o isi e pei o i latou—o loo mulimuli i le fautuaga faaperofeta ina ia fai le seminare ma se mea e faamuamua le taua i o latou olaga.
O le polokalama o le seminare, lea e faamanatuina lona 100 tausaga i le tausaga lenei, ua ese lona faatinoga i le aluga o taimi, ma e oo foi i aso nei o manaoga o tagata taitoatasi ma tulaga i le lotoifale e masani lava ona manaomia ai ni fetuunaiga. Ae i le aluga o le taimi ma le mamao, e tasi lava le mea o loo tumau pea: o le suesueina o le talalelei ua fesoasoani e taula ai le autalavou i a latou molimau i le Faaola ma Lana talalelei.
Ina ua faatoa amata ona auai ia Milton Reis, e 17 tausaga mai Potukale i le seminare, o se vaega toalaiti o le autalavou e feiloai faatasi i aso Toonai taitasi ona o le toatele o i latou e auai i taaloga ma isi gaoioiga faaopoopo lea e manaomia ai ia faataitaiga ma isi gaoioiga i aso taitasi.
Ae peitai, i le taimi nei, ua auai Milton i le seminare i le aluga o le vaiaso—o nisi taimi ao lei amata le aoga pe o le tuua foi. Mo Milton la o lona uiga o le alapo, ma o isi foi tulaga o le lafoai lea o avanoa faaagafesootai i afiafi ina ia auai ai i le vasega.
E oo lava i lea tulaga, e le o vaai Milton i le seminare o se osigataulaga. “Ua sili atu e pei o se faamanuiaga,” o lana tala lea. Ua faamoemoe Milton ina ia mulimuli i tulagavae o lona tuafafine, lea o loo faamisiona, ma o le seminare o se tasi lea o auala o loo ia sauniuni ai. “E ui i le tele o nei mau luitau, ae ou te iloa ua talafeagai ai lava,” o lana tala lea.
O Dia Lacno, e 18 tausaga mai Filipaina, sa papatiso i lona 14 tausaga ma amata ai loa ona auai i le seminare i le taimi lava na sosoo ai. Sa ia mafaufau o le a pei le seminare o se vasega masani i le aoga, lea e i ai meaaoga e fai i le fale, lauga mai le faiaoga, ma le mamafatu lea e oo mai faatasi. Nai lo lena, sa ia fai mai, “o le seminare e aumaia ia te au le malosi e foia ai na avega uma ou te maua mai le aoga. Soo se taimi lava ou te auai atu ai i le seminare, ou te lagonaina le toe faamalosia ma le mafanafana.”
Ina ia faitau i osigataulaga ma le faamanuiaina o tagata aooga seminare i le lalolagi atoa, sue le “O Le Polokalama o le Seminare i le Lalolagi Atoa e Taula ai Tagata Aooga i le Talalelei” i le news.lds.org.
Tagata aooga o loo auai atu i le seminare i Wetterau, Siamani.
© IRI