Amosa 3:7

O lenei fuaiupu ua aoaoina i tatou e uiga i le taua o le matafaioi a perofeta.

7 E le faia lava se mea e le Alii o Ieova, ae faaalia Lona finagalo i Ana auauna o perofeta.

Le Alii Le Atua

“Talu ai e alofa lo tatou Tama i lana fanau, o le a ia le tuua tatou e taumateina mea e aupito taua i lenei olaga, e tusa ai ma mea tatou te uai atu i ai e mafai ai ona maua le fiafia, po o le le manatu mamafa i ai ma aumaia ai le faanoanoa. O nisi taimi na te tau sao atu ai i se tagata mea faapena, e ala i musumusuga. Peitai, e le gata i lena, na te tauina mai nei mea taua e ala mai i ana auauna. … Na te faia lenei mea ina ia oo lava ia i latou e le mafai ona lagona musumusuga ona iloa, afai o le a faalogo, o le a latou iloa le upu moni ma lapataiina ai.”

Peresitene Henry B. Eyring, Fesoasoani Muamua i le Au Peresitene Sili, “O le Aiga,” Liahona, Oke. 1998, 12; Ensign, Fep. 1998, 10.

Na Te Faaalia

E faapefea ona fesootai mai le Alii i Ana perofeta? E tele auala, e aofia ai:

Musumusuga e ala mai le Agaga Paia (tagai i le 2 Peteru 1:21).
Faaaliga ma miti (tagai i le Numera 12:6; 1 Nifae 8:2).
Asiasiga a avefeau mai le lagi (tagai i le Iosefa Samita—Talafaasolopito 1:16–17; MF&F 110:8).

Lona Finagalo Lilo

O le uluai upu Eperu o loo faaaogaina i le Tusi Paia mo le finagalo lilo o le uiga moni lava o le “fautua,” o lona uiga e faatatau i fuafuaga a le Alii po o faamoemoega.

O Ana Auauna, o Perofeta

“Ua atu fia ona faailoa mai e tusitusiga paia e faapea e tuuina mai e le Alii Ana poloaiga i le fanau a tagata e auala mai i perofeta soifua. E leai se komiti, faapotopotoga, po o se isi lava pule ua i ai le aia tatau e faatonu atu ai ia te ia mataupu e feteenai ma Lana tulafono. O faamanuiaga e faavavau a le Atua e faalagolago i luga o lo tatou usiusitai ma faalogo atu i le afioga a le Alii, o loo faapea ona faaali mai e auala mai i Ana perofeta paia.”

Elder L. Tom Perry o le Korama a Aposetolo e Toasefululua, “Matou Te Talitonu i Mea Uma Lava Ua Faaalia Mai e le Atua,” Liahona, Nov. 2003, 88.

O a ni mea na talosaga mai ai perofeta soifua talu ai nei ia i tatou ia faia? Iloilo le konafesi aoao sili ona lata mai (tagai i le conference.lds.org) ma mafaufau e tusi i lau api o talaaga mea e te lagona ua uunaia oe e fai o se taunuuga o mea na saunoa ai auauna a le Alii.