Filifili le Malamalama
“Afai e tau-tasi o outou mata i lou mamalu, o le a faatumulia o outou tino atoa i lou malamalama, ma o le a leai se pouliuli e ia te outou” (MF&F 88:67).
A o avea au ma se tamaitiiti, na ou fefe i nisi taimi i le pogisa. E masani ona ou faalogo i ni leo ese i le po. Ae ou te lei alu ou te moe, ou te lokaina uma faitotoa ma siaki lalo o lou moega. Ou te autilo foi i totonu o lau kapoti. Ou te le mautinoa po o le a le mea ou te fefe ai, ae ou te fefe lava i nisi taimi.
A o ou aoao e tatalo, na ou lagonaina le faamafanafanaina tele ma le filemu. Na ou iloaina se lagona o le malamalama, ma na ou iloaina o le a ou saogalemu ma manuia.
O se tasi o mea ou te manatuaina a o laitiiti o le malamalama foi. A o ou talavou, na faamauina maua ma lou uso i lo ma tina ma lo ma tama i le Malumalu a Sate Leki. Ou te manatuaina lou aiga ma nisi sa laei papae, le malamalama sili i totonu o le malumalu, ma le filemu na ou lagonaina i lena aso.
E ui lava o nei manatuaga e mai tausaga ua leva, ae ou te manatua le faalogona o le fefe i le pogisa ma le olioli na ou lagonaina i le malamalama o le malumalu. Pe a tatou saili atu e ola i le talalelei, e faatumuina i tatou i le malamalama, ma o le a leai se pogisa ia i tatou. O le malamalama ma le faatuatua, e le o faatasi ma le pogisa ma le fefe. Pe a faatumuina i tatou i le malamalama, tatou te lagonaina le fiafia ma le filemu ma le saogalemu. Ou te faamoemoe ia mafai ona tatou filifili i taimi uma le malamalama.
Ata na tusia e Greg Newbold