O Le Aganuu Faaletalalelei
O lenei tusiga na sii mai se lauga na tuuina atu i se konafesi faarisone ma faaleitu na faasalalauina i Aferika i le aso 21 Novema, 2010.
O lenei aganuu faaletalalelei e sau mai le ata o le faaolataga, o poloaiga a le Atua, ma aoaoga a perofeta soifua. Ina ia fesoasoani i tagata o le ekalesia i le lalolagi atoa, ua aoaoina i tatou e le Ekalesia ina ia faamatuu atu soo se aga masani patino pe faaleaiga po o ni faatinoga e le o ogatasi ma lenei aganuu faaletalalelei.
I le ata tifaga lauiloa The African Queen, e toalua ni tagata sulufai mai fetauaiga i Aferika i Sasae o le Taua Muamua o le Lalolagi o loo taumafai e ausia le nofoaga saogalemu o le Vaituloto o Victoria. Ina ua mavae le sao mai i le tele o faafitauli, sa paulia le la vaa, The African Queen, i le pala. Sa le mafai ona iloa po o fea le itu o loo tafe agai i ai le vai ma sa siomia i le tele o laau maualuluga, na amata ona le mautonu ma faavaivai ia tagata sulufai e toalua. I le muta ai o le la malosi ma le faatuatua, sa toetoe lava a faavaivai i laua ma feoti.
Ona oo lea, i sina taimi mataina lava, o mea pueata lea sa matou matamata atu ai i le tulaga lamatia, faatasi ai ma se vaaiga fou sa matou iloa atu ai lo la nofoaga moni. Sa la leiloaina, ae na o ni nai mita lava sa mamao ese ai mai ia i laua, sa i ai ia vai faamalolo ua leva ona sailia o le Vaituloto o Victoria.
O loo faamalamalama mai ia i tatou e le talalelei a Iesu Keriso la tatou malaga i le olaga faaletino ma faailoa mai lo tatou taunuuga i le faavavau. E pei o le au sulufai i le The African Queen, o loo tatou sosola ese mai le amioleaga ma mala. O loo i ai faafitauli o siomia ai i tatou. Tatou te galulue malosi ina ia ausia a tatou sini. O nisi taimi tatou te le iloa atu ni faailoga o le alualu i luma. E mafai ona tatou lelavava ma faavaivai. Atonu e oo lava ina tatou le iloaina lo tatou taunuuga. Ae peitai e le tatau ona tatou faavaivai. Pe ana mafai lava ona tatou vaai i luga atu o tatou tulaga o i ai nei, ma iloa lo tatou nofoaga moni i le malaga i le ola e faavavau, o le a tatou iloa ai le maoae o le tulaga o lo o i ai lo tatou alualu i luma.
Faalagolago i le Agaga Paia
O le mea e lelei ai, na tuuina mai ia i tatou e lo tatou Faaola se mea e iloa ai le ala ma se taiala, lea o le a fesoasoani ia i tatou e tusa lava pe tatou te le mafai ona vaai i tua atu o faafitauli faavaivai loto. Peitai, e tatau ona tatou naunautai e faaaoga ma faalagolago i lenei meaalofa paia, ma e tatau ona tatou tausiaina lelei.
Na aoao mai e Peresitene Wilford Woodruff (1807–98), le na auauna atu o se Peresitene o le Ekalesia i le vaitaimi sa i ai foi nisi taimi sili ona faigata, le taua o le Agaga Paia: “O alii ma tamaitai uma o e ua ulufale mai i totonu o le ekalesia a le Atua ma papatisoina mo le faamagaloina o agasala [ma maua le meaalofa o le Agaga Paia] e i ai lana aia e maua ai faaaliga, le aia i le Agaga o le Atua, e fesoasoani ia i latou i a latou galuega.”1
Na faamalamalama mai e Peresitene Woodruff, “o lenei Agaga e faailoa mai, i lea aso ma lea aso, i tagata taitoatasi o e faatuatua, mea uma e aoga ia te ia.”2 O le meaalofa lenei na tuuina mai e le Atua e fesoasoani ia i tatou i la tatou malaga faigata i le olaga faaletino pe afai tatou te savavali ma le faatuatua.
Afai tatou te mauaina lenei taiala taua, e tatau ona tatou tausia ia poloaiga. Na aoao mai Peresitene Woodruff: “O le Agaga Paia e le mafai ona nofo i malumalu e le paia. Afai e te fiafia i le mana ma meaalofa atoatoa a lau lotu, e tatau ona e mama. Afai e te sese i ou vaivaiga, lou valea ma agasala, e tatau ona e salamoina na mea; o lona uiga e tatau ona e matua lafoa’ia na mea.”3
Ua poloaiina i tatou e le Alii ina ia auai i le sauniga faamanatuga i vaiaso uma e aai ma feinu i le faamanatuga (tagai i le MF&F 59:9–12). Pe a tatou faia lena mea, o le salamo mai ia tatou agasala ma toe faafou a tatou folafolaga ina ia auauna atu i le Alii ma manatua pea o Ia ma tausi Ana poloaiga, ua tatou maua le folafolaga taua o le a tatou “maua pea lona Agaga e faatasi ma i [tatou]” (MF&F 20:77). O le auala lenei e mafai ai ona tatou vaai i tua atu o faafitauli ma faanoanoaga o lenei olaga ina ia taitaiina atu i tatou i lo tatou aiga faalelagi.
Ua faailoa mai e Peresitene Thomas S. Monson faapea: “Ua siomia i tatou i le ola le mama, o ponokalafi po o tusi ma ata mataga, o faiga malolosi ma le matautia, o fualaau oona, ma le anoanoai o mea leaga ua mafatia ai le lalolagi i nei ona po. Ua feagai i tatou ma le lui, faapea foi ma le tiutetauave, e le gata ia tausia i tatou lava ‘ina ne’i pisia mai le lalolagi’ (Iakopo 1:27) ae ia taialaina foi a tatou fanau ma isi o i lalo o la tatou tausiga, ia saogalemu mai vasa louloua o le agasala o loo siomia ai i tatou, ina ia i ai se aso tatou te toe foi atu ai e nonofo faatasi ma lo tatou Tama Faalelagi.”4
E moni tatou te manaomia le taitaiga a le Agaga, ma e tatau ona tatou filiga e fai nei mea e manaomia ina ia maua le mafutaga o lena Agaga. Aemaise lava, e tatau ona tatou tausia ia poloaiga, tatalo, suesue i tusitusiga paia, ma salamo i vaiaso uma pe a tatou fetagofi atu i le faamanatuga.
O Se Auala Uiga Ese o le Olaga
O se auala e fesoasoani ai ia i tatou e tausia ia poloaiga a le Atua, ua i ai i tagata o Le Ekalesia a Iesu Keriso o le Au Paia o Aso e Gata Ai se mea ua taua o le aganuu faaletalalelei. O se auala uiga ese o le olaga, o se seti o ni tulaga faatauaina ma ni faamoemoega ma faatinoga masani i le au paia atoa. O lenei aganuu faaletalalelei e sau mai le ata o le faaolataga, o poloaiga a le Atua, ma aoaoga a perofeta soifua. E taitaia i tatou i le auala tatou te tausia ai o tatou aiga ma ola ai i o tatou olaga taitoatasi. O mataupu faavae o loo faailoa mai i le folafolaga i le aiga o ni lagona faaalia matagofie ia o lenei aganuu faaletalalelei.5
Ina ia fesoasoani i ona tagata i le lalolagi atoa, ua aoaoina i tatou e le Ekalesia ina ia faamatuu ese atu ni aga masani patino pe faaleaiga po o ni gaoioiga e le ogatasi ma aoaoga a le Ekalesia a Iesu Keriso ma lenei aganuu faaletalalelei. O lea tatou te usitaia ai le lapataiga a le Aposetolo o Paulo, lea na fai mai e le tatau ona tatou faatagaina se tasi e “faatagataotauaina i [tatou] … i le poto le aoga e faasese ai … e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso” (Kolose 2:8).
Afai tatou te oo atu i le tulaga o le faamatuu ese atu o aga masani sese, tatou te viia la tatou tupulaga talavou mo lo latou tulaga o le fetuutuunai ma le alualu i luma, ma e tatou te talosaga atu i tagata matutua o le ekalesia e faamatuu ese atu ni aga masani tuai po o ni gaoioiga faaleaiga e taitai ese ai i latou mai le ala o le tuputupu ae ma le alualu i luma. Tatou te talosagaina i latou uma ina ia feeei i nofoaga maualuluga o le aganuu faaletalalelei, i gaoioiga ma aga masani ua mauaa i le talalelei toefuataiina a Iesu Keriso.
O le tele o tu masani a Aferika e talafeagai ma le aganuu faaletalalelei ma e fesoasoani i o tatou tagata e tausia ia poloaiga a le Atua. O le aganuu malosi faaleaiga i Aferika e maualuga atu nai lo le tele o atunuu i le itu i Sisifo, lea ua faaleagaina ia tulaga faatauaina faaleaiga. Matou te faamoemoe o le a fesoasoani ia faataitaiga o le alofa ma le faatuatuaina o aiga Aferika tatou te aoao atu ai i isi nei tu masani i le aganuu faaletalalelei. O le tauagafau o le isi lea malosiaga o Aferika. Matou te aioi atu i le autalavou i soo se nofoaga ina ia tauagafau e pei o le toatele o tagata talavou tatou te vaai i ai i Aferika.
I se faatusatusaga, o nisi o tu masani faaleaganuu i ni vaega o Aferika e le lelei pe a fua i aganuu faaletalalelei ma tulaga faatauaina. O le tele o nei popolega tau sootaga faaleaiga—po o le a se mea e faia i le taimi e fanau mai ai, i le taimi e faaipoipo ai, ma pe a oti. Mo se faataitaiga, e i ai i tamaloloa Aferika le manatu sese faapea, e malolo tamaloloa ae fai uma e fafine le tele o le galuega i le fale, po o le faapea foi o fafine ma tamaiti o ni auauna ia a le tamaloa. E le o se mea lea e fiafia i ai le Alii, aua e faalavelave i le auala o le ituaiga o fegalegaleaiga faaleaiga lea e tatau ona i ai i le faavavau, ma e taofia ai le tuputupu ae lea e tatau ona tupu iinei i le fogaeleele, pe afai o le a tatou agavaa mo faamanuiaga o le faavavau. Suesue i tusitusiga paia ma o le a e vaai ia Atamu ma Eva, o tatou uluai matua, o le faatusa mo i tatou uma, na tatalo faatasi ma galulue faatasi (tagai i le Mose 5:1, 4, 10–12, 16, 27). E tatau ona avea lea ma a tatou mamanu mo le olaga faaleaiga—o le fefaaaloaloai o le tasi i le isi ma galulue faatasi i le alofa.
O le isi tu masani le lelei faaleaganuu o le tulaga lea o le lobola, po o le faatauina o tamaitai faaipoipo, lea e matuai matautia lava le faalavelave i alii ma tamaitai talavou o loo tausia poloaiga o le talalelei toefuataiina a Iesu Keriso. Afai o se alii talavou ua uma lana misiona ma ua tatau ona ia faatauina lona toalua mai le tamā [o lea tamaitai] i se tau taugata, o le a tele tausaga e faaputu ai, ma e le mafai ona ia faaipoipo pe le mafai foi ona faia se isi mea seiloga ua oo i le taimi ua toeitiiti toeaina. O le a feteenai lenei tulaga ma le fuafuaga o le talalelei e faatatau i le mama mai tulaga feusuai i fafo atu o le faaipoipoga, mo faaipoipoga, ma mo le fanauina o se fanau. E tatau i taitai perisitua ona aoao mātua ina ia faamuta lenei tu masani, ma e tatau i tupulaga talavou ona mulimuli i le mamanu a le Alii e uiga i faaipoipoga i le malumalu paia e aunoa ma le toe faatali mo le totogiina o le tau o se tamaitai faaipoipo.
O nisi foi tu faaleaganuu po o ni tu masani e ono feteenai ma aganuu faaletalalelei, o faaipoipoga ma maliu. Ou te talosaga atu ia te outou ia aua nei faia ni fuafuaga e fesootai ma ni faaipoipoga ma ni maliu o le a mafua ai ona tele se aitalafu. Alo ese mai femalagaaiga mamao ma ‘aiga taugata. O aitalafu tetele o le a faavaivaia ai pe taofia mai ai lou malosi e totogi le sefuluai, auai i le malumalu, ma auina atu lau fanau i misiona. Fai ni fuafuaga o le a faamalosia ai—ae le faavaivaia ai—lou toaga i le Ekalesia i le lumanai.
O Le Taua o le Faaipoipoga
O loo tatou ola i se lalolagi amioleaga. O le fai atu ai o lenei mea, ou te manatu muamua ai i le aveesea ma le loto i ai o le ola, lea e tupu soo i fetauaiga a tagata i le lotoifale ma malo i totonu o Aferika ma soo se nofoaga. Ua poloaiina mai foi le Atua e le tatau ona tatou aveesea mai i tagata ni a latou meatotino e ala i le gaoi po o le taufaasese. O le isi amioleaga maoae o le solia lea o le poloaiga “Aua e te mulilua” (Esoto 20:14) ma poloaiga uma ia e faatatau i ai ua faaalia mai e le Atua o mana foafoa maoae—ua tuuina mai mo Lona faamoemoega—ua na o totonu lava o pa puipui o le faaipoipoga e tatau ona faaaoga ai. O se agasala le faatinoina o ni fesootaiga faalefeusuaiga i fafo atu o le faaipoipoga.
Ua tatou ola i se vaitaimi lea e vaai atu ai i le faaipoipoga o se filifiliga, ae le o se tulaga manaomia. Mo se faataitaiga, na fanauina e tina e lei faaipoipo le 40 pasene o tamaiti uma ua fananau i le taimi lenei i le Iunaite Setete. E toatele tagata e nonofo faatasi e aunoa ma le faaipoipo. O tamaiti e fananau mai i na sootaga, e le maua le puipuiga a matua ua tautino atu ai le tasi i le isi e ala i le faaipoipoga na faauuina e le Atua mo o tatou uluai matua i le Faatoaga o Etena.6
E taua le faaipoipoga, ae i Aferika ma isi malo, e tatau ona tatou fesili ifo, o le a le ituaiga faaipoipoga? E i ai faaipoipoga aloaia ua faatagaina e le tulafono, ma o loo i ai foi le tele o faaipoipoga o tu masani pe faaleaganuu e mafai ona faataunuuina ma toe tatala e aunoa ma le tele o feuiaiga. O le tulaga faatonuina a le Alii—ua aloaia i tulaga manaomia mo le faamauina o se faaipoipoga i le malumalu—o se faaipoipoga ua sili ona tumau i tulafono e mafai ona faia e tagata.
Ou te toe faamaonia le fautuaga a taitai o le Ekalesia lea na tuuina atu i tane ma ava e le tatau ona valavala mo ni vaitaimi uumi, e pei o le galue ai i se galuega e mamao po o se atunuu ese. O le tele lava o nei tulaga, o ia ituaiga nonofo valavala e sosoo atu ai lava ma le agasala ogaoga. O le nonofo valavala e taitaiina atu ai i le solia o feagaiga e faavavau, lea e mafua ai le faanoanoa ma le leai o ni faamanuiaga. I se faaaliga faanei ona po ua poloai mai ai le Alii, “Ia e alofa i lau ava ma lou loto atoa, ma ia e pipii atu ia te ia ae le o se isi” (MF&F 42:22). Afai tatou te mulimuli i poloaiga a le Alii ma fautuaga a taitai e faatatau i le faaipoipoga, e mafai ona tatou valaau atu ia te Ia ina ia faamanuia i tatou i isi mea uma.
O Faamanuiaga o le Sefuluai
O le sefuluai o se poloaiga o loo i ai faatasi ma se folafolaga. O upu a Malaki, ua toe faamaonia mai e le Faaola, ma ua folafola mai mo i latou o e aumai a latou sefuluai i le faleteuoloa a le Alii o le a “toina … pupuni o le lagi, ma sasaa atu le manuia mo [latou], ina seia silisili ona tele.” O faamanuiaga na folafola mai e faaletino ma faaleagaga. Mo tagata e totogi sefuluai, ua folafola mai e le Alii o le a Ia “aoai atu, ona o outou, le na te aina mea” ma o le a “faaamuia foi ia te outou e nuu uma lava; aua e fai outou ma nuu e moomia” (Malaki 3:10–12; tagai foi i le 3 Nifae 24:10–12).
Ou te talitonu o nei folafolaga e faatatau i atunuu o loo tatou nonofo ai. Afai e taofia e le nuu o le Atua a latou sefuluai ma taulaga, e faafanoina e le Atua le “nuu uma lava” (Malaki 3:9). E faapena foi ona ou talitonu, pe afai e toatele tagata o se nuu e faamaoni i le totogiina o le sefuluai, latou te aumaia faamanuiaga o le lagi i luga o lo latou nuu atoa. Ua aoao mai le Tusi Paia “e faafefeteina le paluga falaoa uma lava i sina mea itiiti e faafefete a’i” (Kalatia 5:9; tagai foi i le Mataio 13:33) ma o le “amiotonu e viia ai le nuu” (Faataoto 14:34). O lenei faamanuiaga ua matua manaomia tele, e mafai ona oo mai ona o le faamaoni i le totogiina o le sefuluai.
O le totogiina o le sefuluai e aumai ai foi ni faamanuiaga uiga ese faaleagaga faapea foi ma le faaletino i le tagata o loo totogiina le sefuluai. I le vaitaimi o le Taua Lona Lua o le Lalolagi, sa tausia ai e lou tina ua nofo toatasi lana fanau laiti e toatolu i se totogi laitiiti faafaiaoga. Ina ua ou malamalama o loo matou ola e aunoa ma nisi o mea mananaia ona sa le lava le matou tupe, sa ou fesiligia lo’u tina pe aisea e faaalu ai le tele o lona totogi i le sefuluai. E le galo lava ia te au lana faamalamalamaga: “Dallin, atonu e i ai nisi tagata e mafai ona latou ola e aunoa ma le totogiina o le sefuluai, ae o tatou e le mafai ona tatou te matitiva. Ua filifili e le Alii e aveese atu lou tama ae tuu au e tausi outou. E le mafai ona ou faia lena mea e aunoa ma faamanuiaga a le Alii, ma ua ou mauaina na faamanuiaga e ala i le totogiina o le sefuluai. A ou totogiina la’u sefuluai, ua ou maua le folafolaga a le Alii o le a Ia faamanuiaina i tatou, ma e tatou te manaomia na faamanuiaga ina ia tatou ola lelei.”
I le avea ai ma tagata o loo faaauau pea ona maua na faamanuiaga, ou te molimau atu i le agalelei o lo tatou Atua ma le anoanoai o Ana faamanuiaga i Lana fanau totogi sefuluai.
Fausiaina o le Ekalesia
A o tatou saili e faatulaga le Ekalesia i Aferika ma isi atunuu, e tatau ona i ai i la tatou taitaiga ma tagata auai se augatupulaga faamaoni o le tolu ma le fa o aiga o le Au Paia o Aso e Gata Ai. O le siitia atu i se isi atunuu o le Au Paia o Aso e Gata Ai faamaoni, o le a vaivai ai le Ekalesia i lo latou atunuu moni. E moni e le o faasaina e le Ekalesia le fesiitai solo o ona tagata mai lea nofoaga i lea nofoaga ina ia faaleleia atili ai i latou lava, ae ua loa tausaga talu ona uunaia lea ituaiga femalagaiga.
O le vaitaimi ua leva, sa uunaia ai le Au Paia o Aso e Gata Ai e faapotopoto i Siona i Amerika e faatulaga le Ekalesia ma fausia ni malumalu iina. O le taimi nei ua malosi le Ekalesia i ona nofoaga autu o siteki, matou te fautua ai tagata o le ekalesia ina ia tumau, ma fausia le Ekalesia i o latou nuu moni. Ua matou uunaiaina lenei tulaga e ala i le fausiaina o malumalu i le lalolagi atoa.
O le mulimuli i le ala a le Alii e le faigofie. Ua lapataia pea lava pea i tatou e le Alii, tuusao mai ma auala mai i Ana auauna, o le a inosia i tatou e le lalolagi i le ese o lo tatou faatinoina o mea—i le ala a le Alii (tagai i le Ioane 15:19).
O le tala fiafia, pe a tatou faia le galuega a le Alii i le ala a le Alii, ua faamautinoa mai ia i tatou Ana faamanuiaga e fesoasoani ia i tatou. “O le a Ou alu muamua atu i o outou luma.” Na Ia fetalai mai ai. “O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (MF&F 84:88).
Alofa le Tasi i le Isi
Oka so tatou faafetai atu mo le talalelei toefuataiina a Iesu Keriso. Ua tau mai ia i tatou po o ai i tatou. Afai tatou te malamalama i lo tatou sootaga ma le Atua, ua tatou malamalama foi i lo tatou sootaga ma isi. E aofia ai foi ma o tatou sootaga ma o tatou taitoalua ma fanau—sootaga e faavavau pe afai tatou te tausia poloaiga ma osia ma tausia feagaiga paia o le malumalu.
O alii ma tamaitai uma o lenei lalolagi o ni fanau a le Atua, uso ma tuafafine agaga, po o le a lava lo latou lanu po o tagatanuu. Leitioa foi na poloaiina i tatou e le Alo e Toatasi o le Atua na Fanaua ina ia tatou fealofani. Oka se eseesega o le a i ai le lalolagi, pe afai o le a laasia e le alofa faaleuso ma fesoasoaniga le manatu faapito i luga o tuaoi uma o ituaiga tagata, malo, talitonuga, ma lanu. O lea ituaiga alofa o le a le aveesea ai feeseeseaiga uma lava o manatu ma amioga, peitai o le a taitaiina ai i tatou taitoatasi ina ia taulai atu a tatou taumafaiga i gaoioiga tuufaatasi ma o tatou tuaoi nai lo le feitagai po o le feteenai ma i latou.
Ou te faamautu atu le upumoni sili, e alofa lo tatou Tama Faalelagi i Ana fanau uma. O se manatu maoae ma mamana lea e mafai e fanau ona amata malamalama i ai e ala i le alofa ma osigataulaga a o latou matua faalelalolagi. O le alofa o le uunaiga sili ona malosi i le lalolagi. Ou te tatalo ina ia tuuina atu uma e matua lenei ituaiga faataitaiga o le alofa, lea e uunaia ai le tupulaga faiae ina ia malamalama i le alofa o le Atua mo i latou, ma le naunautaiga sili a lo tatou Tama Faalelagi ina ia faia e Ana fanau uma i le lalolagi mea uma e agavaa ai mo faamanuiaga silisili o le faavavau.
Ua tatou maua Lana talalelei, ma e manaomia lo tatou tausia o poloaiga ina ia fiafia ai i Ana faamanuiaga silisili. Ou te molimau atu ai i lenei mea ma talosagaina i o outou luga taitoatasi ia faamanuiaga a lo tatou Tama Faalelagi.
Ata na tusia e Richard M. Romney
Tauagavale: ata na tusia e Matthew Reier; taumatau: ata na tusia e Richard M. Romney
Tauagavale: ata na tusia e Juan Pablo Aragon Armas; taumatau: ata na tusia e Christina Smith
Tauagavale: ata na tusia e Robert Milne; taumatau: ata na tusia e Howard Collett