Nai Otootoga o le Lalolagi

Saunoa Atu Taitai i le Au Paia Latina i le Faasalalauga ia Novema

O Elder Claudio D. Zivic o le Fitugafulu ma Elder Gary B. Doxey, o le Fitugafulu Eria i Iuta i Saute, sa saunoa i se faigalotu sa lagolagoina e le Ekalesia mo le au paia Amerika Latina na faaautuina “En la luz de Su amor” (“I Le Malamalama o Lona Alofa”), sa faia i le Aso Sa, 13 o Novema, 2011.

E faitau afe le au paia a le Ekalesia ma a latou uo e tautatala Faasipaniolo ma Faapotukale sa auai i le faigalotu i le Maota Autu mo Konafesi ma i falelotu i Amerika i Matu, Tutotonu, ma Saute.

Ua valu tausaga o tuuina atu e le Ekalesia ni fuafuaga musuia faaletausaga e taulai atu i le tuputupu ae o tagata Latina o le Au Paia, o se fuafuaga taulamua e aofia ai konaseti o le Kerisimasi, faigalotu, ma tala faatino i luga o tulaga. O le faigalotu i le 2011 na faailogaina ai le taimi muamua na faasalalauina tuusao ai le polokalama faaletausaga i falelotu i fafo atu o le Iunaite Setete.

Feiloai le Tamaitai Sili o Honetura i le Au Peresitene Sili

O le tamaitai sili o Honetura o Rosa Elena Bonilla de Lobo, sa feiloai atu ia Peresitene Thomas S. Monson ma Peresitene Henry B. Eyring, Fesoasoani Muamua i le Au Peresitene Sili, i le Aso Lua, 8 o Novema, 2011, i se fonotaga sa ia ta’ua “o se avanoa maoae.”

I le taimi o lana asiasiga i le laumua o le Ekalesia, sa maimoa faataamilo ai foi i le Lotoa o le Malumalu, Faletusi o Talafaasolopito o Aiga, Maota Autu mo Konafesi, Nofoaga Autu mo Galuega Fesoasoani Alofa a le Ekalesia, ma le Lotoa o le Uelefea.

Sa ia faamatala e faapea, sa fesoasoani atu lata mai nei le Ekalesia i le taimi o lologa i Honetura. “O le lua vaiaso na te’a atu nei sa outou tilivaina atu ai le 90,000 tone [81,600 tonnes] o taumafa mo tagata na aafia i timuga ma lologa, ma o se tasi lenei o mea e tele tou te faia,” na ia saunoa ai. “Ua ou talitonu nei e leai se tuaoi po o se mea e gata mai ai le mafai [ma le] tautino o le Ekalesia e fesoasoani ia i latou e puapuagatia.”

O le tamaitai sili o Honetura, o Rosa Elena Bonilla de Lobo, sa maimoa faataamilo i fale ma fanua o le Ekalesia i le Aai o Sate Leki, Iuta, ISA, i le aso 8 o Novema, 2011.

© IRI