Agai Pea ma Agai i Luma

Saunia e Michelle Guerra

Na ou tatalo mo le malamalama pe faapefea ona faamaloloina se loto momomo. Mai lea vaega i lea vaega, na ou iloa ai o le isi ituaiga loto momomo o le tali lea.

Faatoa uma ona ou oo i ni faamasaniga tiga ma sa faaalu le tele o le taimi i lou uso. E le maalofia na ma iu i le aiina o meaai le lelei, matamata le TV, ma momoe. I le ala mai se tasi o nei malologa, na ou fai atu, “Ou te manatu e le lelei ta’ua mo le isi.” Na ma tōē, ae o lena po na ou faafetai i le Tama Faalelagi mo le iloaina na ou faaaogaina lou uso o se ie palanikeke mo le saogalemu, ma tatalo mo le malamalama sili atu mo le mea atonu e tatau ona ou faia ia agai ai i luma lou olaga. I nai isi masina na sosoo ai, na taliina mai lena tatalo, a o ou mauaina le malamalama faasolosolo.

O le aso na sosoo ai, a o auai atu i se fonotaga a le Aualofa, na ou iloa ai se mau patino: “O isi o le a faaoleole e ia, ma faamoemoe malie ese atu i latou i le saogalemu faaletino, o le a latou fai mai: Ua lelei mea uma i Siona; ioe, ua manuia Siona, ua lelei mea uma. … O le mea lea, oi Talofa ia te ia e nofonofo filemu i Siona!” (2 Nifae 28:21, 24). E masani ona ou faitau i nei fuaiupu o faamatalaina ai le faamaualuga o loo i ai i gaoioiga o le tapuai. Ou te lei manatu lava ia te au o loo nofo filemu i Siona e ala i le faaaluina o le tele o taimi i lou uso. Ae na ou iloaina nai lo le sailia o le faamalologa, na ou sailia le mafanafana. Na ou filifili loa e taumafai atili e aluese mai lou sone mafanafana.

Na fesoasoani le faaiuga, ae o le laa ese mai lou sone mafanafana na ou iloa atili ai ou vaivaiga, ia na taitai atu ai au i le faitioina o au lava ia. Ina ua ou tau atu nei lagona i sau uo, na ia fai mai, “Pe le maoae ea le faamagaloina o i tatou lava ia?” O lana faamatalaga na fesoasoani ia te au ia manao e sili atu le faamagalo o au lava ia i ou vaivaiga—e aunoa ma le avea ma se e nofoai e pei o i latou o loo “nonofo filemu i Siona.”

I se tasi aso na taia ai au e le Mamona 2:13–14: “O lo latou faanoanoa sa le tupu mai le salamo, ona o le agalelei o le Atua; ae o se faanoanoa o tagata tausalaina, ona e le tuua pea i latou e le Alii i taimi uma ia latou fiafia i le agasala. Ma sa latou le o mai ia Iesu ma le loto momomo ma le agaga salamo.” Na iu ina ou malamalama o ou lagona o le toilalo na taotaomiaina lou alualu i luma patino, ma na amata ona ou manatunatu po o le a le faanoanoa talafeagai e manaomia. O le Aoga Sa na ou maua ai lau tali.

Na tusi e le faiaoga se laina i luga o le laupapa, na faaigoaina le tasi pito, “Soona saua ia i tatou lava” a o le isi itu, “Aai, feinu, ma ia fiafia.” Na matou talanoa i le aloese mai na mea matautia e lua. Na ou mafaufau po o a upu o le a i le totonugalemu o le laina, ma na taitaia ou mafaufauga e le Agaga i le fuaitau “se loto momomo ma se agaga salamo.” Na foliga mai ia te au o le fofo i le taumafai e soona saua ia te oe lava ia atonu e faamatalaina o se agaga salamo—se tasi ua salamo, taliaina le fesoasoani a le Alii, ma faafetai mo Lona alofa mutimutivale. O le vailaau mo le nofonofo ma le filemu i Siona e ono taua o se loto momomo—se tasi ua faaosofia moni ia suia ma ia faamaloloina.

Na aoao mai le Faaola, “Ia outou osi mai mo se taulaga ia te au le loto momomo ma le agaga salamo” (3 Nifae 9:20). Ou te faafetai i le iloa a o ou saili le fesoasoani a le Alii ia alo ese mai le nofonofo ma le filemu i Siona, ma alo ese mai le faamasinoina mamafa o au lava ia, ua ou ofoina atu nei se osigataulaga talafeagai ia te Ia—o se osigataulaga e fesoasoani ia te au ia agai i luma i lou olaga.

Ata na tusia e Christina Smith