O Le Faataitaiga Maoae a Aleki
Mo Aleki Esikopa, o le uuina i luga o lana lamepa ua faia ai se eseesega e faavavau mo lona aiga.
I le valu tausaga talu ai, a o faiaoga Aleki Esikopa i le Perisitua Arona, sa ia tautino atu ai e faamisiona talai. O le taimi lena, na te lei mafaufauina lava o le a avea lona tama ma ona epikopo i le taimi e ulufale atu ai i le galuega faamisiona.
Ona ua silia ma le sefulu tausaga e lei toe lotu le tama o Aleki. Ae o Aleki, o lē sa alu lava na o ia i le lotu, e lei fiu lava o ia i lona tama—po o lona aiga uma.
“Na ou aoaoina e a’u lava ia le taua o se faataitaiga,” o lana tala lea.
Na O Mai o’u Taitai e Sue A’u
E faapefea ona malosi se alii talavou i le Lotu e aunoa ma le lagolago mai o lona aiga? O Mario Saia, o lē sa avea ma epikopo a o avea Aleki ma se Perisitua Arona, na te faafetaia le molimau a Aleki ma ona taitai tuuto o Alii Talavou. Sa ioeina foi e Aleki.
“Afai ou te le lotu i le Aso Sa, e o mai o’u taitai e sue au,” o lana tala lea. “Sa auauai i sia mea itiiti i sia mea itiiti ona ou aoaoina le talalelei seia oo ina ou maua se molimau malosi. O le isi mafuaaga sa ou alu ai pea i le lotu ona sa ou iloaina, e na o le talalelei lava a Iesu Keriso e mafai ona matou fiafia ai e faavavau o se aiga.”
O le ausia o lena sini, o lona uiga o le tumau malosi ai e tusa lava pe na faavaivai nisi o ana uo o le lotu i Korotopa, Atenitina.
“Ese le tele o faaosoosoga ia soli le Upu o le Poto ma le tulafono o le ola mama,” o le tala lea a Aleki, o lē sa maua mai lona malosi mai fautuaga a Epikopo Saia. “Fai mai o ia, ‘Na pau lava le auala e agavaa ai mo se toalua agavaa o lou agavaa o oe lava.” Na fesoasoani tele lena saunoaga ia te a’u.”
Sa faamalosia atili le molimau a Aleki ina ua uma ona ia faia o se miti lea sa valaauina ai o ia e faamisiona talai. Sa amata ona sauniuni o ia ae sa le’i faatali seia 19 ona tausaga ona amata lea ona ia faasoa atu le talalelei, sa amata atu i lona lava aiga.
“Sa tatalo Aleki i taimi uma mo lona aiga ma faamalosiau ia i latou,” o le tala lea a Epikopo Saia. “Ma na te uunaia foi i taimi uma ona uso laiti e o mai i le lotu. Sa faamanuiaina le taumafaiga e toe aumai lona aiga ona o Aleki.”
“O A’u le Tagata sa Faaulumalo”
Ina ua toe tepa i tua le tamā o Aleki, o René, i le 13 tausaga sa i fafo ai ma le Ekalesia, e tagitu’i o ia ona o mea na ia misia.
“O na tausaga sa matuai faigata lava,” o lana tala lea. “O nisi taimi sa le mafai ona aveese lo’u mafaufau i taimi sa maumau e ala i lo’u misia o le fiafia i le olaga matagofie o loo ofoina mai e le talalelei.”
Sa auai le aiga o Esikopa i le Ekalesia i Korotopa a o laitiiti ia Aleki. Sa malolosi lava i le ekalesia seia oo ina latou toe siitia atu i lo latou atunuu moni o Polivia a o le’i leva ona uma le papatisoga o Aleki. A o i ai i Polivia, sa galo ia i latou “le uiga o le talalelei i o matou olaga,” o le tala lea a René.
Ina ua latou toe foi ane i Korotopa i le lua tausaga mulimuli ane, sa tai tasitasi lava ona auai atu le tina o Aleki o Carmen, i le lotu faatasi ai ma le la fanau e toafa. Ae sa faaaluina e René, o se tagata e naunau e taalo lakapi, ia Aso Sa e moe ai ona o le lelava mai i taaloga i Aso Toonai ma gaoioiga na faia ai—o gaoioiga sa masani ona solia ai le Upu o le Poto.
“O a’u le tagata sa faaulumalo,” o lana tala lea. “Na i ai taimi sa ou mafaufau ai e faapea, ua matuai ou leiloa lava, o o tatou manatu ia pe a tatou le toe maua le mafutaga ma le Agaga.”
O le mea sa iu ina suia atoa ai René o le iloaina o ana faataitaiga sa tiga ai lana fanau. “Sa pei o’u atalii o ni tamaiti matuaoti o e sa o i le lotu na o i latou ona sa le malosi lo latou tama,” o lana faamatalaga lea.
“Sa amata ona ou iloiloina lo’u olaga ma taunuuga o au faataitaiga i la’u fanau,” o le tala lea a René, o lē sa faafetai ona o le mana o le Togiola a Iesu Keriso na faatagaina ai o ia e salamo. “Sa ou iloaina sa ou le ola i o’u tiutetauave o se tama. O nei mea uma sa fesoasoani ou te manatua ai le Alii, alu ifo i o’u tulivae, ma ole atu ia te Ia e fesoasoani mai ia ou toe foi mai.”
A o tuputupu ae le faamaoni ma le molimau a René’s, sa sosoo ane ai ma se faasologa o valaauga. O ni nai tausaga talu ona ia toe taliaina le talalelei, sa ia maua ai se musumusuga ua saunia o ia e le Alii mo se valaauga fou taua.
“O le taunuuga, o lo’u tama o lo’u epikopo,” o le tala lea a Aleki.
O Le Taua o Faataitaiga
A o auauna atu Aleki i le Misiona a Atenitina Resistencia, na misia o ia e tagata uma, ae sa latou faafetai sa ia faasoaina atu lana faataitaiga i isi. Ma ua latou faafetai ua faamauina i latou i le Malumalu o Buenos Aires Atenitina i le 2009.
“O Aleki le tagata sa matou galulue i taimi uma faapea ma tagata o le uarota e fai ai ma o matou sui,” o le tala lea a Carmen. “Sa latou fai mai sa tatalo o ia i taimi uma mo ona matua ia toe foi mai i le lotu. Matou te faafetai ona sa le’i fiu o ia ia i matou.”
Ua fiafia Epikopo Esikopa ona o Aleki le faifeautalai muamua ua ia auina atu i le galuega faamisiona ina ua uma ona valaauina o ia e fai ma epikopo. “E ese le manaia o le i ai o se atalii o auauna atu, o lana tala lea. “Matou te misia uma lava Aleki, ae o a’u le tagata e sili ona ou misia o ia. O ia le tagata sa lagolagoina a’u.”
Afai e avea tagata o le Au Paia o Aso e Gata Ai ma ni faataitaiga lelei, o le tala lea a Aleki, o le a iu lava ina matau mai e isi tagata. “Afai tatou te fiafia ma faamalieina i le Ekalesia, o le a mananao foi isi e tofo i lo tatou fiafia. Afai tatou te tutumau ma agai pea i luma, e mafai ona tutupu vavega.”
Ata na pueina e Michael R. Morris