Pe i ai ea se tapulaa i le salamo? Pe afai ou te talosaga atu mo le faamagaloga mo le mea lava e tasi mai lea taimi i lea taimi, pe o le a ou oo ea i se tapulaa i se taimi?

E lua mea ia manatua iinei: (1) o le alofa tunoa o le Atua e moni lava e le iu, ma le (2) o le salamo moni o lona uiga o le lafoaia o au agasala.

I le tasi itu, ona o le Togiola le iu a Iesu Keriso, ua avanoa ai le salamo i tagata uma, e oo lava ia i latou na faia soo mea sese lava ia. E pei ona fai mai le perofeta o Alema, “Faauta, [le Alii le Atua] ua auina mai se valaaulia i tagata uma, ona ua faaloaloa mai ia te i latou aao o le alofa mutimutivale, ma ua ia fetalai: Ia salamo, ona ou talia lea o outou” (Alema 5:33).

I le isi itu, na aoao mai le Perofeta o Iosefa Samita, “O le salamo o se mea e le mafai ona taufaatauvaaina i aso uma. O le solitulafono i aso taitasi, ma le salamo i aso taitasi e le o se mea e malie i le silafaga a le Atua” (Aoaoga a Peresitene o le Ekalesia: Iosefa Samita [2007], 78).

O le a la le ki i le salamo? E pei ona faaalia e le Alii ia Iosefa Samita, “O le mea lenei e mafai ai ona outou iloa pe afai ua salamo se tagata i ana agasala—faauta, e tautau atu e ia i latou ma lafoai i ai” (MF&F 58:43). Ma e pei ona aoao mai Alema, “Ai se e salamo e maua e ia le alofa mutimutivale; ma o ia na te maua le alofa mutimutivale ma tumau e oo i le iuga o ia lava lea o le a faaolaina” (Alema 32:13; faaopoopo le faamamafa).

I se isi faaupuga, e tatau ona e tautau atu ma lafoai au agasala ma taumafai ia faamaoni seia oo i le iuga o lou olaga. Afai o loo faigata ia te oe ona faatoilalo se agasala patino, aua nei e fiu ia te oe lava ia, i le talitonuga sese o loo i ai le tapulaa i le salamo moni. Saili le fesoasoani mai ou matua ma lou epikopo po o le peresitene o le paranesi. O lo latou alolofa, lagolago, ma fautuaga e mafai ona fesoasoani ia te oe a o e tauivi e tuuese le agasala mai lou olaga ma faalatalata atili atu i le Tama Faalelagi ma Iesu Keriso.