Na Latou Saunoa Mai Ia i Tatou
Mulimuli i le Perofeta
O se mama faamau e masani lava o se faailoga o se tautinoga. Ae peitai o maua ma lou toalua, o le leai o se mama faamau o se faailoga o le ma tautinoga i le Alii ma Ana perofeta.
Na ou feiloai atu i le agelu o le a avea ma ou toalua i se pati a le inisitituti i le po lona lua na ou foi mai ai i lau misiona. E ui lava o maua ma Shelley na feola ae i Kanata e fia selau maila e valavala ai ma e lei feiloai muamua lava, ae na ma faamasani lelei ma le isi i masina na sosoo ai. Ina ua faatolu ona ou fesili atu ma te faaipoipo ae le taliaina ona o lana tautinoga e auauna atu i se misiona, ae na iu lava ina ia taliaina lau talosaga ina ua ou folafola atu ia te ia o le a ma auauna atu faamisiona faatasi pe a maea ona tausia se aiga. Na ia taliaina le mama faamau i le aso 22 o Tesema, 1976.
Ae o aso na sosoo ai, na ma lagonaina uma le le mautonu—e le ona o le faaipoipo atu i le isi ae e uiga i le mama. Sei ou faamatala atu.
O se Filifiliga e Mulimuli i le Perofeta
I vaiaso a o loma le ma faamau, na ma faaaluina ma Shelley le tele o le taimi e talanoa ai e uiga i le auala ma te mananao e tausia ai le ma aiga, ma le mea ma te mananao ia avea ai lo ma aiga. O se tasi o mea i le totonugalemu o lena talanoaga, o lo ma naunautaiga ia mulimuli pea i le perofeta.
E lua masina a o lumanai le ma faamau, na ma faalogologo ai i le tele o lauga o le konafesi aoao ia Oketopa,1976 na faamalosia ai mataupu faavae o le ola faalagolago o le tagata ia te ia lava. O le autu lenei na aoaoina pea lava pea e Peresitene Spencer W. Kimball (1895–1985) ma isi mo le tele o tausaga. O maua uma ma Shelley na feola ae ma le iloa o le taua o le totoina o se togalaau, ia i ai se sapalai o meaai, ma le saunia i mea e tele. Ae peitai i lena konafesi aoao, o le autu o le sauniuni na foliga mai e faapitoa le faalauaitele. O nisi failauga na taua le lolovai o le Teton Dam lena na tupu ia Iuni. E aofia ai Barbara B. Smith (1922–2010), le peresitene aoao o le Aualofa, o le na faamamafaina le taua o le ola faalagolago o le tagata ia te ia lava—aemaise lava, le teuina o se sapalai o meaai mo le tausaga, e pei ona fautuaina i lena taimi.1 Na faamanatu mai e Peresitene Kimball, i le sauniga mulimuli o le konafesi, le Au Paia o Aso e Gata ai le mau i le Luka 6:46, o loo faapea mai ai le Faaola, “Se a le mea e taua ai au e outou, le Alii e, le Alii e, a e tou te le faia mea ou te fai atu ai?” Ona fautua mai lea o Peresitene Kimball ia mulimuli atu ia te outou savali o le konafesi i totonu o outou “aiga ma … olaga i le lumanai.”2
Ina ua mavae le ma faamau, a o ma manatunatu i le amataga o le ma faaipoipoga ma le olaga faaleaiga, na tatagi mai nei savali i o ma taliga. E aunoa ma le iloaina e le tasi, na ma mafaufau uma lava e uiga i le amataina o le teuina o meaai mo lo ma aiga. Ina ia usitai i le fautuaga i lena taimi, na manaomia lo ma amataina o le teuina o se sapalai o meaai mo le tausaga. Ae faapefea ona ma faia lena mea? O i maua o ni tamaiti aoga—ma o le a faapena mo le tele o tausaga i le lumanai—ma e le tele ni tupe. Na tuuina mai e le Agaga Paia ia i maua uma, i le tagata lava ia, le tali e tasi: ma te manaomia le faatau atu o le mama faamau.
Ae faapefea ona ou fai atu ia Shelley e fai lena mea? Faatoa uma lava ona ou tuuina atu ia te ia le mama. O le a lona mafaufau pe afai ou te fai atu ia te ia e faatau le mama ina ia mafai ona faatau mai ai ni polesi ma falaoamata ma araisa? A o le taimi foi lena, sa popole foi o ia. O le a lo’u mafaufau, na ia manatunatu ai, pe afai na te tauina mai ia te au e uiga i le faatauina atu o le mama na ou filifilia mo ia? Pe o le a tiga ea o’u lagona?
Ae o le uunaiga na maua e i maua uma na matua malosi lava e le mafai ona le amanaiaina, ma o le tele lava ina mafaufau i ai i maua taitoatasi, o le tele foi lena o le iila mai o le mama taimane. Ina ua faaalia e Shelley le mataupu i ni nai aso ina ua mavae le Kerisimasi, na ou lagona le fiafia ua ia taunuu i le faaiuga lava e tasi na ia te au. I le tele lava o auala, o se faamautinoaga maoae ia i maua uma e uiga i le filifiliga o le tagata e tatau ona ma faaipoipo i ai. I le iloaina o mea ma te faamuamua ma faatauaina e tutusa ma le isi faapea le perofeta a le Atua o se faamaoniga maoae lava. Na ou matuai faafetai lava mo lona naunau e faia se osigataulaga ina ia mulimuli ai i le perofeta.
Faamolemole aua nei faaseseina o outou manatu i lau faamatalaga, ma faamolemole aua le faatauina a outou mama! O le faatauina po o le mamaina o le mama faamau e le sese. O le mea moni, o a ma fanau ua faaipoipo e i ai uma lava mama matagofie ma talafeagai. E tele auala e mafai ai ona tatou mulimuli i perofeta ma aposetolo, ma faaaoga a latou fautuaga i o tatou olaga patino. Ae ona sa faatonuina mai e le Agaga maua ia mulimuli i le perofeta e ala i le faatauina o le ma mama faamau, i lo ma tulaga, o le filifiliga i le va o le tuu o le mama ma le mulimuli i le perofeta. O lenei mea na fesoasoani ia i ma’ua e faatuina ni mamanu se lua i lo ma aiga mai lava i le amataga: o le mulimuli i le perofeta ma le mulimuli i uunaiga patino faaleagaga sa ma mauaina.
O Tali i a Maua Filifiliga
Na tapunia le falemama na ou faatauina mai ai le mama mo le vaiaso ina ua mavae le Kerisimasi, ae o le avanoa muamua lava ina ua toe tatala, na ou alu ai e talanoa i le faimama. Na ou matuai mautinoa lava o le a musu o ia e toe faafoi mai lau tupe; ae maise lava, ua faaaogaina le mama ma ua ta’ua o se mea tuai. Na ou saunia au lava mo lenei tali mai ma na faamoemoe e faatau atu o se mama tuai i se tau maualalo lava. Ae i lou ofo tele, na faamaluluina le loto o le faimama. Na ou savali i fafo ma le tupe i lou lima—ma lou gutu ua tautau ma faamaga i le ofo tele i le auala e tatala ai e le Alii le ala mo i maua ina ia usiusitai.
E lei taliaina lelei e tagata uma le ma filifiliga. Ina ua iloa e a ma uo—e aofia ai i latou o tagata o le Ekalesia—le mea ua ma faia ma vaai i le tamai mama pau na ou lalagaina mo Shelley e mama ai, na latou fai mai ua ma valelea. O isi tamaitai o le tupulaga a Shelley e le talitonu na naunau o ia e fai le mea na ia faia. E toalaiti lava na faamalosiau ma lagolago mai.
Na malosi Shelley ma na iloa o le a lelei mea uma mo ia e tusa lava po o a manatu o tagata; na lototele o ia i le iloaina na mulimuli o ia i le perofeta. Ma na sili atu le taua o lena mea nai soo se isi lava mea. Ae na saunia e le Alii le alofa mutimutivale e ala mai i ni uo se toalua na fesoasoani ia i maua, e lagona e le o tuua na o maua.
Na ma faailoa atu ma lau uo o Bob ia Fran le Ekalesia i le aoga maualuga. Na matou auauna atu faamisiona uma lava, ma ina ua foi mai Fran mai lana misiona, na faamau i laua ma Bob. Ina ua la o mai e faasoa mai le la tala fiafia ia i maua ma Shelley, na ma iloa ai nai lo le faatauina o se mama faamau, na la filifilia foi e faaaoga le tupe e faatau ai meaai e teu. Na mālie lava ia i matou uma e toafa le faatonuina o i matou e le Agaga e faia mea na e tutusa. O le ma tautinoga e mulimuli i le Agaga Paia ma le perofeta soifua na faaopoopoina se malosiaga fou i la ma faauoga, lena na oo atu i le silia ma le 40 tausaga.
Faamanuiaga mai le Usiusitai
Na ma amata ma Shelley ona faatauina meaai autu mo le ma teuga meaai a le aiga ia Ianuari 1977 ma faaauau ai le faatauina mai lea vaega ma lea vaega seia oo ina ma faaipoipo ia Aperila o lena tausaga. A o lei oo i le ma faaipoipoga, na ma teuina meaai i le fale o ou matua.
Na mamaina e Shelley le mama pa’u o se mama faaipoipo mo se taimi umi lava a o ou faamaeaina au aoaoga i le iunivesite, sosoo ai ma le aoga fomai nifo. Ona o le faamoemoega mo le faaauauina o aoaoga, na tele taimi na femalagaai solo ai lo ma aiga. Na ma masani i le tosoina o pakete saito mai lea fale mautotogi i lea fale mautotogi, mai lea fale i lea fale, ma lea aai i lea aai. Na amata ona alofia maua e a ma uo i taimi uma lava ma te malaga ese ai, ae peitai i tausaga mulimuli ane, na ma lagonaina le faafetai loloto mo le mulimuli i fautuaga a taitai o le Ekalesia.
Ina ua ou faauu mai le aoga fomai nifo ma amata se galuega fomai nifo, ua toalua le ma fanau ma Shelley, ma na matuai leai lava se tupe. E faafetai ai, na mafai ona matou ola i se vaega o meaai na ma faatauina ae ma te lei faaipoipo. O lo ma usiusitai i fautuaga faavaloaga, na toe faamanuiaina ai o ma olaga i le sili atu ma le sefulu tausaga ina ua ma faaipoipo, ina ua ou faaiuina nisi aoaoga ma a o i ai i le nofoaga mo fomai nifo e faasasa’oina nifo. Na ma toe oo foi i le leai o se tupe, ma nai lo le totogiina o meaai i kata aitalafu po o tupe nono, na faamanuiaina i maua e fafaga lo ma aiga (lenei ua i ai tamaiti e toafa) mai le ma sapalai.
Talu mai na tausaga, na faamanuiaina i maua i le tele o auala e ala atu i le faalogo i upu faavaloaga. Ua ma aoao e aua le fesiligia le aoga o aoaoga a perofeta ma aposetolo po o le mafaufau pe talafeagai. Ua ma aoaoina o le faia—ma le faia loa lava—o a latou fautuaga, e faamanuiaina ai o tatou olaga.
Aoao e Faalogo i Upu Faaperofeta
Atonu e faapea nisi o a ma gaoioiga o le usitai tauaso. Ae ua ia i tatou le folafolaga patino a le Alii o le a le taitaiina sese lava i tatou e perofeta.3 O le iloaina o lenei mea e fesoasoani ia i tatou e faalogo ai i o latou siufofoga, e pei o tatou faalogo atu i Lona lava siufofoga (tagai i le MF&F 1:38).
Ua ma aoaoina foi e masani lava ona valaaulia i tatou e perofeta e faia ni mea; latou te le faaaogaina soo upu e pei o le poloai po o le apoapoai. O la latou auala e alofa ma agamalu, ae le tuuina mai ai ia i tatou se alofaga e aua le mulimuli ai. Ina ua ma faaaogaina ma Shelley ia valaaulia o ni poloaiga, ua faamanuiaina ai pea lava i maua.
Ua ma aoao foi e filifili a latou faatonuga i le faalogo i faaupuga e pei o le “Sa ou manatunatu loloto …” po o le “O se mea na i ai i lou mafaufau o le …” po o le “Ua ou lagona e tau atu ia te outou …” po o le “Faataga mai au e ofoina atu ni fautuaga e uiga i le …” po o le “O lo’u faamoemoega ia …” O nei faaupuga ma isi e foliga tutusa, o ni faailoilo e fesoasoani ia i tatou e iloa ai mea o loo i mafaufau ma loto o auauna faauuina a le Alii.
O se tasi mea e fesoasoani ia i tatou e faalogo i le siufofoga o le Alii, a o tatou faalogo i perofeta ma aposetolo, o le mataituina lea ma le totoa pe a latou siiina mai saunoaga a isi perofeta po o aposetolo. Na aoao mai le Alii o le a Ia faamautuina upu uma i le mau a le toalua po o le toatolu (tagai i le 2 Korinito 13:1; MF&F 6:28).
Ona o le savali o le ola faalagolago o le tagata ia te ia lava na tuuina mai soo i le tele o taimi i lena konafesi aoao ae ma te lei faamau, na ma lagonaina ai ma lou toalua, o le savali na faapitoa lava le talafeagai mo maua i lena taimi. Na musuia i maua e mulimuli i lena fautuaga i se auala e iloagofie. Ae ui i lea, o le mulimuli i perofeta e le o taimi uma lava e faatatau i le vaaia e tagata o le faatuatuaina; e masani lava o lo tatou usiusitai e faaalia lava i auala laiti, ma sili atu ona faaletagata. E tusa lava pe iloa e isi pe leai lo tatou usiusitai, e silafia e le Alii. Ma o le a Ia faamanuiaina i tatou mo lo tatou usiusitai, ma tatala auala e mafai ai ona tatou faia.
Ua mamaina nei e Shelley se mama faaipoipo e sili atu le moi, ae ua teuina e ia lana tamai mama pau o se faamanatu i ia mau tausaga. Ia i maua o se faailoga lea o le ma faaiuga i le amataga ia avea le mulimuli i fautuaga a perofeta o se vaega tutotonu o lo ma olaga faaleaiga. A o ma vaai i a ma fanau o tausia a latou fanau i le taimi nei, ma te faafetai o le mulimuli ma le faamaoni i le perofeta a le Alii, o Peresitene Thomas S. Monson, o se vaega o o latou foi olaga faaleaiga. Ia i maua o lenei usiusitai o se talatuu matagofie ma e pei lava ona mafai ona pai atu i se faailoga o le tausia o feagaiga e faapena foi ona mafai i se mama faamau.
Ua mamaina nei e Shelley se mama faaipoipo masani, ae ua ia teuina le tamai mama pau (lalo) i nei tausaga uma lava. Ia i maua o se faailoga o le ma faaiuga i le amataga ia mulimuli i le perofeta.
Ata na pueina e John Luke