E Te Tautala i le Gagana Rusia?
Ana Nikitieva, o Sikotilani
E ui lava ma te pisi tele, na ma filifili ma lou toalua, o Tanila, e tatau ona ma toe asiasi tasi atu i le Malumalu o Preston i Egelani ae lei uma le 2009. E manaomia le o i pasi e lua ma toeitiiti lava ono itula e malaga ai i le malumalu mai le tamai taulaga o Sikotilani ma te nonofo ai.
O le taeao na ma fuafua e malaga ai na faamalumalu mai ma timuga, ae na ma fiafia lava o loo ma o i le malumalu. A o ma faatalitali mo le isi itula mo le pasi lona lua i le nofoaga e sui ai pasi, na amata ona maligi tele mai timuga ma ua malulu.
Peitai, o le faamoemoe o le a vave ona ma i ai i totonu o le malumalu na faamafanafanaina ai o ma loto. Ina ua ma taunuu i Preston, na oo mai se lagona malosi e o loa lava i le malumalu. Na ma fia aai ma ua matua susu pala, ae na ma faalogo i le Agaga Paia.
Ina ua ma ulu atu i le malumalu, na fesili mai se tagata faigaluega mata fiafia mo a ma pepa faataga o le malumalu. Na ia to ese lana vaaiga ae toe vaai i igoa o loo i luga o ma pepa faataga o le malumalu.
“Pe lua te o mai i Rusia?” na ia fesili ai ma le ofo.
“Ioe,” le ma tali, ua fai sina tei i ona uiga faaalia.
“O lona uiga la e te tautala i le gagana Rusia?” na ia fesili mai ai.
“O lea lava,” o lana tali mai lea.
Ona ia siiina lea i luga o le telefoni ma valaau atu i se tasi tagata.
Na vave oo mai le peresitene o le malumalu ia i maua. Na mafai ona ma vaaia loimata i ona fofoga, e iloa atu i lana vaaiga. “O oulua o agelu mai le Atua!” lana tala ma le fiafia, ma fai mai ma te mulimuli atu ia te ia. Na ma mulimuli atu ia te ia ma vaaia se faifeautalai talavou le mautonu o loo siomia e tagata faigaluega o le malumalu.
Na iloa ane o lenei faifeautalai e sau mai Amenia ma e tautala faaRusia. Na valaauina o ia e auauna i le Misiona a Egelani i Lonetona ae lei aoaoina lana faaIgilisi. E leai se tagata e tautala faaRusia i le nofoaga autu e aoao ai faifeautalai o loo sosoo ma le malumalu. O lena aso e tatau ona maua ai lona faaeega paia, ae na le mafai ona talanoa atu tagata faigaluega o le malumalu ia te ia—o lena la, seia oo ina savavali atu i totonu se ulugalii Rusia e susu pala.
Na talosaga loa Tanila e fesoasoani i le faifeautalai talavou. Na ova le fiafia o le faifeautalai ma na faapea mai mulimuli ane na ia lagonaina se agaga faapitoa ina ua ma taunuu atu.
Ou te faafetai ona e ui lava i a ma fuafuaga pisi ma le timuga o le tau, na ma filifili pea ma lou toalua e asiasi atu i le malumalu i lena aso ina ia mafai ona ma fesoasoani atu i se atalii o le Atua e tautala faaRusia i Peretania Tele. Ou te faafetai mo faamanuiaga o le malumalu, na e faafiafiaina ai o tatou olaga i se malamalama faapitoa ma se faamoemoega. Ou te iloa afai tatou te faalogo i uunaiga a le Agaga Paia, o le a Ia toe taitaia atu i tatou i lo tatou aiga faalelagi—e pei lava ona sa Ia taitaia maua ma lou toalua i le maota o le Alii i lena aso.