Aisea Tatou Te Manaomia ai Perofeta?

Saunia e Peresitene Dieter F. Uchtdorf

Fesoasoani Lua i le Au Peresitene Sili

Ata

Peresitene Dieter F. Uchtdorf

Talu ai e alofa le Tama Faalelagi i Lana fanau, o lea e Na te le o tuulafoai ai i latou e savavali e aunoa ma se taiala ma se taitaiga i lenei olaga faaletino. O aoaoga a lo tatou Tama Faalelagi e le o ni aoaoga masani, taumateina, faaleogalua e mafai ona e maua mai i se tusi manifinifi le faavaa i se faletusi i le lotoifale. O aoaoga na o le poto o se Tagata faaselesitila mamana, ma e silafia mea uma ma alofa i Lana fanau. E aofia ai i Ana fetalaiga le mea lilo sili o augatupulaga—o le ki i le fiafia i lenei olaga ma le lalolagi a sau.

Ua faaalia e le Tama Faalelagi lenei poto i Lana fanau i le lalolagi e ala atu i Ana auauna perofeta (tagai i le Amosa 3:7). Mai lava i le vaitaimi o Atamu, na fetalai atu le Atua i Lana fanau e ala atu i perofeta ua valaauina ma ua tuuina atu i ai le tiute e faaalia Lona finagalo ma fautuaga i isi. O perofeta o ni faiaoga musuia ma e masani lava o ni molimau faapitoa a Iesu Keriso (tagai i le MF&F 107:23). E le nao tagata o o latou vaitaimi o loo saunoa atu i ai perofeta, ae o loo latou saunoa atu foi i tagata i tupulaga uma. O o latou siufofoga e tutusa lava i le taimi ua tuanai e oo mai lava i le taimi nei ma e avea ma se molimau o le finagalo o le Atua i Lana fanau.

E leai se eseesega o le asō ma vaitausaga ua mavae. E le itiiti ifo le alofa o le Alii i tagata o o tatou vaitaimi nai lo taimi ua mavae. O se tasi o savali mamana o le Toefuataiga o le Ekalesia a Iesu Keriso e faapea, o loo faaauau pea ona fetalai mai le Atua i Lana fanau! E le o natia o Ia i le lagi ae o loo fetalai mai i le asō e pei ona sa Ia faia i aso anamua.

O le tele lava o mea o loo faaalia mai e le Alii i Ana Perofeta, ua faamoemoe e taofia mai i tatou mai le faanoanoa, o ni tagata taitoatasi ma faalapotopotoga. Pe a fetalai mai le Atua, e Na te faia ina ia aoao, musuia, toefaamamaina, ma lapataia ai Lana fanau. Pe a le amanaia e tagata taitoatasi ma faalapotopotoga aoaoga a lo latou Tama Faalelagi, ua latou faia i le tulaga lamatia o le tofotofoga, puapuaga, ma le tiga.

E alofa le Atua i Ana fanau uma. O le mafuaaga lena ua Ia aioi mai ai ma le naunautai ia i tatou e ala mai i Ana perofeta. E pei lava ona tatou mananao mo mea e sili ona lelei mo e pele ia i tatou, e finagalo foi le Tama Faalelagi mo mea e sili ona lelei mo i tatou. O le mafuaaga lena e matua taua ai Ana aoaoga ma o nisi taimi ua matua faanatinati lava. O le mafuaaga foi lena e Na te le o tuulafoaia ai i tatou i le asō, ae o loo faaauau pea ona faaalia mai Lona finagalo ia i tatou e ala mai i Ana perofeta. O lo tatou taunuuga ma le taunuuga o lo tatou lalolagi o loo faalagolago lea i lo tatou faalogo ma le usitaia o afioga faaalia a le Atua i Lana fanau.

O loo maua i le Tusi Paia, le Tusi a Mamona, le Mataupu Faavae ma Feagaiga, ma le Penina Tautele ia aoaoga e leai se tau a le Atua i tagata uma. E faaopoopo atu i ai, o loo fetalai mai le Alii ia i tatou e ala mai i Ana auauna, ma o le a Ia toe fetalai mai foi i le konafesi aoao a sau nei.

Mo i latou uma o e mafaufau pe o i ai sea ituaiga tulaga—atonu e fesili ifo faapea, “E mafai ea ona talanoa mai le Atua ia i tatou i lenei vaitaimi?”—Ou te valaauliaina outou ma lou loto atoa ina ia “sau ia, ina matamata” (Ioane 1:46). Faitau le afioga a le Atua e pei ona maua i tusitusiga paia. Faafofoga i le konafesi aoao ma se taliga e naunau e faalogologo i le siufofoga o le Atua e ala i Ana perofeta o aso e gata ai. O mai, faalogo, ma matamata faatasi ma o outou loto! Aua afai e te saili “ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia” (Moronae 10:4). E ala atu i lenei mana, ua ou iloa ai o loo soifua Iesu Keriso ma o loo taitaia Lana Ekalesia e ala i se perofeta soifua, o Peresitene Thomas S. Monson.

Uso e ma tuafafine, o loo talanoa mai le Atua ia i tatou i le asō. Ma o loo Ia faanaunau mai i Lana fanau uma ina ia faalogo ma usitai i Lona siufofoga. A tatou faia faapea, o le a faamanuiaina ma lagolagoina maoae i tatou e le Alii, e le gata i lenei olaga ae o lalolagi a sau.

O Loo Saunoa Mai Perofeta ma Aposetolo i le Asō

E le muta le galuega paia a perofeta ma aposetolo. I le va o konafesi aoao, e faaauau ai pea le aoao atu ma le auaunaga a le Au Peresitene Sili ma le Korama a Aposetolo e Toasefululua i le lalolagi. O Loo Saunoa Mai Perofeta ma Aposetolo i Le Asō, o se vaega o le LDS.org, o loo faamatala mai ai le galuega faifaipea a nei taitai o le Ekalesia i vitio, ata, ma tusiga (e maua i le tele o gagana).

Aoao mai ia i latou e uiga i a latou galuega. Faalogo ma faitau i a latou molimau e uiga i le Faaola. Matamata ma faitau e uiga i a latou savali o le alofa ma le faamoemoe mo tagata o le ekalesia i soo se mea e tuuina atu ai la latou molimau, pe i le laumua a le Ekalesia i le Aai o Sate Leki pe i le faataunuuina o o latou valaauga i le lalolagi atoa.

Asiasi i le lds.org/study/prophets-speak-today e aoao atili ai e uiga i le talanoa mai o perofeta ma aposetolo i lenei vaitaimi.

Ua Ulagia le Talaiga a Noa, saunia e Harry Anderson © IRI; Ua Faailoa atu Apinati i luma o le Tupu o Noa, saunia e Arnold Friberg © 1951 IRI; Talaiga a Ioane le Papatiso, saunia e Del Parson © 1984 IRI