E Faapefea ona Tatou Faaaogaina Tatau le Auai Atu i le Malumalu?
Mai se saunoaga i le konafesi aoao ia Aperila 2009.
O tagata taitoatasi o le Ekalesia a Iesu Keriso o le Au Paia o Aso e Gata Ai ua faamanuiaina e ola i se taimi ua musuia ai e le Alii Ana perofeta ina ia faateleina le faigofie ona oo atu o tagata i malumalu paia.
Ona o lo’u alofa ia te outou, o lea o le a ou talanoa atu ai mai le loto i le loto, e aunoa ma ni upu faafefiloi. E tele taimi ua ou vaai ai i tagata taitoatasi ua faia ni osigataulaga maoae e o atu i se malumalu taumamao. Ae a fausia se malumalu latalata ane, i sina taimi itiiti lava, e toatele e le asiasi soo atu i ai. E i ai sau fautuaga: Pe a faigofie ona latalata atu se malumalu, o le a i ai ni mea laiti o le a faalavelave i au fuafuaga e alu i le malumalu. Faatutu ni sini faapitoa, a o iloiloina o outou tulaga, i le taimi e mafai ai ma o le a auai atu ai i sauniga o le malumalu. Ona aua lea ona faatagaina se isi lava mea e faalavelave i lena fuafuaga. O lenei mamanu, o le a mautinoa lava le faamanuiaina ai o i latou o loo nonofo i le ataata o le malumalu, e pei o i latou e fuafua mamao atu ma faia se malaga umi i le malumalu.
Ou te fautuaina outou ia faatu lau lava sini pe faafia ona e avanoa mo sauniga ua ofoina mai e a tatou malumalu o loo faagaoioia. O le a se mea o i ai e sili atu le taua nai lo le auai ma faia sauniga o le malumalu? O le a se gaoioiga e ono sili atu sona aafiaga ma maua ai le olioli sili atu ma le fiafia loloto, nai lo le tapuai i le malumalu?
O lea, se i ou faasoaina atu ni fautuaga faaopoopo i auala e maua ai ni faamanuiaga se tele mai le auai atu i le malumalu.
-
Malamalama i aoaoga faavae e faatatau i sauniga o le malumalu, aemaise lava le taua tele o le Togiola a Iesu Keriso.1
-
A o e auai i sauniga o le malumalu, mafaufau i la oulua sootaga ma Iesu Keriso ma Lona sootaga ma lo tatou Tama Faalelagi. O lenei gaoioiga faatauvaa o le a taitai atu ai i se malamalamaga sili atu o le natura faalelagi o sauniga o le malumalu.
-
Ia faaali atu i taimi uma ma le agaga tatalo le lotofaafetai mo faamanuiaga le mafaatusalia o loo tafe mai i sauniga o le malumalu. Ia ola i aso taitasi e pei o loo e tuuina atu se faamaoniga i le Tama Faalelagi ma Lona Alo Pele i le taua tele o na faamanuiaga ia te oe.
-
Faatulaga ni malaga fai soo i le malumalu.
-
Ia faaavanoa se taimi ia lava ina ia le faanatinatia ai i totonu o puipui o le malumalu.
-
Aveese lau uati pe a e ulufale i se maota o le Alii.
-
Faalogo ma le totoa faatasi ma se mafaufau ma se loto matala i le aoaoga o vaega taitasi o le sauniga.
-
Ia mataala mo le tagata o loo e faataunuuina ona sauniga sui. Ia i ai se taimi e te tatalo ai ina ia iloa e le tagata le taua naua o sauniga ma ia agavaa pe saunia ia agavaa ina ia faamanuiaina mai nei sauniga.
O nisi taimi pe a ou faalogo i se aufaipese i le taimi o se sauniga o le faapaiaga o se malumalu, ou te mauaina se lagona e matua musuia, lea e faagaeetia ai lou loto ma lou mafaufau. E moeiini ou mata, ma e sili atu ma le faatasi, ou te vaai ai i se tino tele o tagata taitoatasi e amata atu i se vaega o le malumalu ma faasolo atu i luga. Na ou lagonaina ua faatusaina i latou i tagata e toatele o loo faatalitali mo galuega sui ina ia faia mo i latou i lena maota, ma o loo olioli ona ua iu lava ina i ai se nofoaga e mafai ai ona faasaoloto i latou mai filifili na saisaitia ai i latou mai lo latou alualu i luma e faavavau. Ina ia mafai ona ausia lenei taunuuga, e tatau lava ona e faia le galuega sui. E manaomia lou sailia o ou augatuaa. Ua faia e le polokalama fou a le FamilySearch le taumafaiga ua sili atu ai le faigofie nai lo le taimi muamua. E tatau ona iloa na augatuaa, tuuina mai faamatalaga talafeagai mo i latou, ma malaga mai loa i le maota o le Alii e faia sauniga ua leva ona latou faatalitali ia maua.
E maeu le fiafia i le mafai ona auai i le galuega o se malumalu!
Ata na tusia e Derek Israelsen