Materia faaroo e hi‘o, ho‘i roa i te matahiti 1971, tei amuihia i te mau puturaa parau tahito no te mau amuiraa rahi
Ei tutavaraa no te tauturu i te mau melo e fana‘o i te mau parau a‘o horo‘ahia e te mau peropheta here tahito e te mau peropheta e aposetolo no teie tau, ua amui faahou nei te Ekalesia i te tahi mau puturaa parau tahito faaroo e hi‘o i roto i te tuhaa no te amuiraa rahi i ni‘a i te LDS.org.
I te ava‘e tiunu 2012, e roaa te puturaa parau tahito na roto i te reo peretane, te mea faaroo e te mea hi‘o, no te mau amuiraa rahi atoa mai te ava‘e eperera 1971 i to tatou nei tau. Na mua a‘e, te mau parau papa‘i noa no te reira mau matahiti ho‘i roa i te matahiti 1971 tei itehia, e no te mau hoho‘a na roto i te reo peretane, e ra‘e-noa-hia te matahiti 2002. I te ava‘e tiunu 2012, e tuu atoa mai te Ekalesia i te materia faaroo e hi‘o no te mau amuiraa rahi e e ra‘ehia te matahiti 2008 na roto i na 70 reo e hau atu â.
« Te rahiraa o te mau melo o te Ekalesia, te haere nei ratou i ni‘a i te tuhaa no te amuiraa rahi i ni‘a i te LDS.org no te tai‘o, no te mata‘ita‘i e no te faaroo i te mau a‘oraa o te amuiraa rahi hopea, tera râ, e rave rahi atoa mau melo te hinaaro nei e tuatapapa i te mau amuiraa tahito », ua parau mai Elder Patrick Kearon no te Hitu Ahuru. « Te fâ o teie mau ohipa, o te faafana‘o rahi a‘e ïa te mau poro‘i o te mau amuiraa rahi i te mau melo o te Ekalesia na te ao atoa nei ».
Te tuu atoa nei te Ekalesia i te mau himene i roto i te mau puturaa parau tahito o te amuiraa rahi. I teie nei, e nehenehe i te mau melo e faaroo i te Pŭpŭ Himene Momoni no te Fare Menemene e himene i te mau himene ho‘i roa i te matahiti 2008 na roto i te pataraa i ni‘a i te Show Music[Faaite i te himene] i ni‘a roa o te tuhaa no te amuiraa rahi i ni‘a i te LDS.org. E puturaa parau tahito apî tei faaineinehia i ni‘a i te (GCmusic.lds.org) e e nehenehe e imi haere i reira i te mau puturaa parau tahito rau e te mau amuiraa rahi.
Te vai ra te opuaraa ia faaineine i te mau puturaa parau tahito eiaha ia ite-noa-hia te reira i ni‘a i te LDS.org, ia ite-atoa-hia râ te reira i ni‘a ite mau faanahoraa afa‘ifa‘i a te Ekalesia, mai te faanahoraa Gospel Library, e te tahi atoa mau faura‘o parau, mai te Mormon Channel i ni‘a i te Roku e te YouTube.
E roaa te himene o te mau tuhaa atoa o te amuiraa mai te matahiti 2008 e teie matahiti, e nehenehe e faaroo i te reira e aore râ e tipee roa mai i ni‘a i te GCmusic.lds.org.