Eaha te mana‘o o te Mesia ia’u?
Mai te mea e here outou Ia’na, e ti‘aturi Ia’na, e faaroo Ia’na, e e pee Ia’na, e ite ïa outou i To’na here e Ta’na fariiraa.
Ua tuatapapa te hoê papa‘i ve‘a no te hoê ve‘a tuiroo no Beresilia i te parau no te Ekalesia no te faaineine i te hoê parau ve‘a rahi.1 Ua hi‘opo‘a oia i ta tatou haapiiraa tumu e ua haere e mata‘ita‘i i te pû faaineineraa misionare e te pû tautururaa i te ao nei. Ua paraparau oia i te mau hoa o te Ekalesia e i te tahi atu mau taata e ere i te mea hoa roa i te Ekalesia. I roto i ta’na uiuiraa ia’u, ua huru ê rii oia i te uiraa mai ia’u e, « Nahea te hoê taata e nehenehe ai e parau e, e ere outou i te Keresetiano? » Ua ite au e, te parau ra oia no te Ekalesia, tera râ, ua faariro vau i ta’na uiraa ei uiraa no’u iho, e ua uiui a‘era vau i roto ia’u iho e, « Te faaite ra anei to’u oraraa i te huru o to’u here e to’u faaroo no te Faaora? »
Ua ui atu Iesu i te mau Pharisea e, « Eaha to outou mana‘o i te Mesia ra? »2 I roto i te hi‘opo‘araa hopea, e ere na te mau hoa e aore râ, na te mau enemi e haavâ i to tatou oraraa ei pĭpĭ. Are‘a râ, mai ta Paulo i parau ra, « E ti‘a atoa ho‘i tatou i mua i te haavâraa a te Mesia ra ».3 I taua mahana ra, te uiraa faufaa no tatou tata‘itahi, teie ïa, « Eaha te mana‘o o te Mesia ia’u? »
Noa’tu To’na here i te taata nei, ua parau Oia ma te faahapa i te tahi o te mau taata ati a‘e Ia’na ei feia haavâre,4 ei mau maamaa,5 e ei feia rave parau ino.6 Ua parau oia ia vetahi ê atu ma te farii e, e mau tamarii o te basileia7 e te maramarama o te ao.8 Ua parau Oia i te tahi pae ei mau matapo9 e te hotu ore.10 Ua haapoupou oia i te tahi atu ei feia aau mâ11 e tei hiaai i te maitai.12 Ua oto Oia no te feia faaroo ore13 e no to teie nei ao,14 area vetahi ê ra, ua faatura oia ia ratou tei ma‘itihia,15 ei mau pĭpĭ,16 ei mau hoa.17 E no reira, e ui tatou tata‘itahi e, « Eaha te mana‘o o te Mesia ia’u? »
Ua faataa mai te Peresideni Thomas S. Monson i to tatou ao i teie mahana mai te huru e, te atea ê atu ra « i te mau mea o te varua… i roto i te matai tauiui e ohu ra na piha‘i iho ia tatou, e te oraraa morare o te sotaiete i te tamauraa i te fatifati i mua i to tatou mata ».18 E taime ïa no te tupuraa i te rahi ti‘aturi ore e te tau‘a ore i te Mesia e i Ta’na mau haapiiraa.
I roto i teie oraraa arepurepu, te oaoa nei tatou i te riroraa ei pĭpĭ na Iesu Mesia. Te ite nei tatou i te rima o te Fatu ati a‘e ia tatou. Te faatoro-nehenehe-hia ra to tatou haerea i mua ia tatou. « Teie ho‘i te ora mure ore », te na reira ra Iesu i te pureraa, « ia ite ho‘i ratou ia oe i te Atua mau ra, e ia Iesu Mesia, ta oe i tono mai ».19 Te riroraa ei pĭpĭ i teie anotau o te tere, ua riro ïa ei faaiteraa no te faatura e a muri noa’tu.
Te mau parau poro‘i ta tatou i faaroo a‘enei i roto i teie amuiraa, e mau poito ïa no ô mai i te Fatu ra, no te arata‘i ia tatou i roto i to tatou tere ei mau pĭpĭ. A faaroo ai tatou i roto i na mahana e piti i ma‘iri a‘enei, a pure ai tatou no te ani i te arata‘iraa a te varua, e a tuatapapa ai tatou e a pure ai no teie mau parau poro‘i i te mau mahana i muri nei, e haamaitai te Fatu ia tatou na roto i te horo‘araa mai i te arata‘iraa taa ê i te taata tata‘itahi na roto i te horo‘a o te Varua Maitai. Na teie mau mana‘o e faafariu rahi atu ia tatou i te Atua ra, ma te tatarahapa, te haapa‘o, te faaroo e te ti‘aturi. E pahono mai te Faaora i ta tatou mau ohipa faaroo. « Ia hinaaro mai te taata [e aore râ, te vahine] ia’u ra, e haapa‘o ïa i ta’u parau: e e here mai ho‘i ta’u Metua ia’na, e e haere atu ho‘i mâua ia’na ra, e parahi mau atu ai i ô na ra ».20
Te piiraa a Iesu « A haere mai ai a pee mai ai ia’u »21 e ere ïa no te feia ana‘e tei faaineinehia no te aro i te pae varua. Te oraraa pĭpĭ e ere roa’tu ïa i te hoê tata‘uraa, e aniraa manihini râ i te mau taata atoa. E ere to tatou tere o te oraraa pĭpĭ i te hoê hororaa faaati poto, e aita atoa e nehenehe e faau i te hoê hororaa « marathon ». To’na auraa mau, e tere roa te reira e tapae atu ai i te hoê ao tiretiera hau atu.
Ta’na aniraa manihini, e piiraa ïa ia haa i te mau mahana atoa. Na ô mai ra Iesu e: « Ua hinaaro outou ia’u ra, e haapa‘o i ta’u parau ».22 « Ia hinaaro te taata i te pee mai ia’u ra, e faaru‘e oia ia’na iho, a rave ai i ta’na satauro i te mau mahana atoa, a pee mai ai ia’u ».23 Eita paha tatou e maitai roa i te mau mahana atoa, tera râ, mai te mea e, e tamata tatou, ua î roa te aniraa manihini a Iesu i te parau faaitoito e te ti‘aturi: « E haere mai outou ia’u nei, e te feia atoa i haa rahi, e tei teiaha i te hopoi‘a, e na’u outou e faaora ».24
I te mau vahi atoa ta outou e ti‘a ra i teie nei i ni‘a i te e‘a o te oraraa pĭpĭ, tei ni‘a ïa outou i te e‘a ti‘a, oia te e‘a e tae atu ai i te ora mure ore ra. E nehenehe tatou e amui no te faateitei e no te faaetaeta i te tahi e te tahi i roto i te mau mahana rahi e te faufaa i muri nei. Noa’tu te huru o te mau fifi ta tatou e farerei nei, te huru ta te ino taaotiaraa ia tatou, e aore râ, te huru o te mau mea ti‘a ore e haati nei ia tatou, e tuu ana‘e i to tatou faaroo i roto i te Tamaiti a te Atua, tei na ô mai e, « e ti‘a te mau mea atoa nei i te taata i faaroo ».25
Te hinaaro nei au e faaite atu ia outou e piti hi‘oraa no te oraraa pĭpĭ i roto i te ohipa. Te matamua no roto mai ïa i te oraraa o te Peresideni Thomas S. Monson, tei faaite mai i te puai o te maitai iti e o te haapiiraa a Iesu, « E tei rahi ra i roto ia outou na, ei tavini ïa no outou ».26
Fatata e 20 matahiti i ma‘iri a‘enei ua paraparau mai te Peresideni Monson i roto i te amuiraa rahi no ni‘a i te hoê tamahine 12 matahiti te paari tei roohia i te ma‘i mariri ai taata. Ua faati‘a mai oia i te itoito o teie tamahine e i te maitai o to’na mau hoa i te amoraa ia’na i ni‘a i te Mou‘a no Timpanogos i te ropuraa no Utah.
Tau matahiti i ma‘iri a‘enei, ua farerei au ia Jami Palmer Brinton e ua faaroo vau i te reira aamu i roto i te tahi hi‘oraa taa ê—oia te hi‘oraa no ni‘a i te ohipa ta te Peresideni Monson i rave no’na.
Ua farerei o Jami i te Peresideni Monson i te ava‘e mati 1993, hoê mahana i muri mai i to’na iteraa e, te oru i ni‘a a‘e i to’na turi atau e mariri ai taata ïa i roto i te ivi e te tupu noa ra i te rahi. Ma te tauturuhia e to’na metua tane, ua horo‘a te Peresideni Monson i te hoê haamaitairaa autahu‘araa, ma te fafau e, « e vai Iesu i to oe pae atau e i to oe pae aui no te pa‘epa‘e ia oe i ni‘a ».
« I to’na faaru‘eraa’tu i te piha toro‘a o te Peresideni Monson i taua mahana ra », te na reira ra o Jami, « ua tatara vau i te hoê opupu i taamuhia i ni‘a i to’u pereoo tura‘i e ua horo‘a’tu na’na. Ua papa‘ihia i ni‘a iho e, ‘O oe te mea Maitai a‘e !’ i te reta maramarama ».
I roto i te mau utuuturaa e rave rahi no’na, aita roa te Peresideni Monson i haamo‘e ia’na. Te na ô ra o Jami e, « Ua faaite te Peresideni Monson i te hi‘oraa no te auraa o te riroraa ei pĭpĭ mau na te Mesia. Ua faateitei oia ia’u mai roto mai i te oto e tae atu i te ti‘aturiraa rahi e te vai maite ». E toru matahiti i muri a‘e i to ratou farereiraa matamua, ua parahi faahou o Jami i roto i te piha toro‘a o te Peresideni Monson. I te hopea o te farereiraa, ua rave te peresideni i te hoê ohipa o te ore roa e mo‘ehia ia Jami. I roto i te here matarohia i te Peresideni Monson, ua faahitimahuta oia ia Jami i taua iho opupu ra ta’na i horo‘a na te Peresideni e toru matahiti na mua’tu. « O oe te mea maitai a‘e! » te na reira ra te faaiteraa a te opupu. Ua faaherehere oia i te reira, ma te ite e, e ho‘i mai â oia i roto i to’na piha toro‘a ia ora ana‘e to’na mariri aitaata. Ahuru ma maha matahiti i muri a‘e i to’na farerei-matamua-raa ia Jami, ua rave te Peresideni Monson i to’na faaipoiporaa ia Jason Brinton i roto i te Hiero no Roto Miti.27
E rave rahi te mau mea ta tatou e apo mai na roto mai i te oraraa pĭpĭ o te Peresideni Monson. Pinepine oia i te faahamana‘o i te mau Hui Mana Faatere Rahi ia haamana‘o i teie uiraa ohie: « Eaha ta Iesu e rave? »
Na ô atura Iesu i te tavana o te sunago ra, « Eiaha e măta‘u; e faaroo noa mai ».28 Te oraraa pĭpĭ, o te faaroo ïa Ia’na i te mau tau hau ra e te faaroo Ia’na i te mau tau ati ra, ia tamărûhia ho‘i to tatou mauiui e te măta‘u na roto ana‘e i te faaroo e, te here nei Oia ia tatou e te haapa‘o nei Oia i Ta’na mau fafauraa.
Aita i maoro a‘enei ua farerei au i te hoê utuafare tei riro ei hi‘oraa maitai roa no ni‘a i te huru o ta tatou ti‘aturiraa Ia’na. Na Olgan e o Soline Saintelus no Port-au-Prince, Haiti, i faati‘a mai ia’u i to raua aamu.
I te 12 no tenuare 2010, tei te ohipa o Olgan e tei te pureraa o Soline a tupu ai te hoê aueueraa fenua rahi i Haiti. Tei te fare noa ta raua na tamarii e toru, o Gancci, e pae matahiti, Angie, e toru matahiti, e o Gansly, hoê matahiti, tei roto i to ratou fare e hoê hoa.
E ino rahi to te mau vahi atoa. Mai ta outou e haamana‘o ra, e rave rahi tauatini taata tei pohe i taua ava‘e tenuare ra i Haiti. Ua horo vitiviti roa o Olgan e o Soline i to raua fare no te hi‘o i te mau tamarii. Te fare toru tahua tei reira te faaearaa te utuafare Saintelus, ua parari ïa.
Aita te mau tamarii i ora mai. Aita e ohipa faaoraraa i faataahia no te hoê fare tei hu‘ahu‘a roa.
Ua tavini Olgan e o Soline Saintelus i te hoê misioni rave tamau e ua faaipoipohia i roto i te hiero. Ua ti‘aturi raua i te Faaora e i Ta’na mau fafauraa ia raua. Noa’tu râ, ua oto roa raua. E ta‘i hau ore ta raua.
Ua parau mai o Olgan ia’u e, ua pure oia i te taime fifi roa‘e o to’na oraraa. « E to’u Metua i te Ao ra, mai te mea ua ti‘a to oe hinaaro, e nehenehe anei ia ora mai hoê noa a‘e tamarii ta’u, a tauturu mai (a tauturu mai) ia maua ». Ua haati tamau noa oia i te fare, ma te pure no te ani i te faaûruraa. Ua tamata te taata e tamărû ia’na e e tauturu ia’na ia farii i te mo‘eraa o ta’na mau tamarii. Ua tamau noa o Olgan i te haati i te haaputuraa hu‘ahu‘a o te fare parari ma te ti‘aturi, e ma te pure. E ua tupu a‘era te hoê ohipa mai te temeio ra te huru. Ua faaroo o Olgan i te ta‘i pepe, tera râ, e mea na‘ina‘i roa. Te ta‘i ïa a to’na pepe.
E maa hora to te taata heruraa i te haapueraa ofa‘i, ma te fifi no to ratou iho ora. I roto i te poiri o te pô, i roto i te haruru hamara e te patia, ua faaroo te mau taata faaora i te tahi maniania ê atu. Ua faaea ratou i te tupaipai e ua faaroo. Aita ta ratou e nehenehe e ti‘aturi i te mea ta ratou i faaroo. E maniania ïa na te hoê tamarii rii—te himene ra. I muri a‘e ra, ua parau o Gancci, e pae matahiti e, ua ite oia e, e faaroo mai to’na metua tane ia’na mai te mea e, e himene oia. I raro a‘e i te teimaha o te mau tima parari, no reira ho‘i i titauhia ai ia tapu i to’na rima, te himene ra o Gancci i ta’na himene au roa, oia ho‘i, « E tamarii au na te Atua ra ».29
A ma‘iri noa ai te hora, i roto i te poiri, te pohe, e te pe‘ape‘a o te tahi atu mau tamaiti e mau tamahine tao‘a rahi e rave rahi a te Atua i Haiti, ua farii te utuafare Saintelus i te hoê temeio. Ua itehia mai o Gancci, o Angie e o Gansly, aita i pohe, tei raro a‘e i te fare parari.30
Eita te mau temeio e tupu ‘oi‘oi noa i te mau taime atoa. Te tahi mau taime e mana‘o ihoa tatou e, no te aha aita te temeio, i anihia na roto i te pure faaroo, e tupu ra. Mai te mea râ e, e ti‘aturi tatou i te Faaora, e tupu mau te mau temeio i fafauhia. I roto anei i teie oraraa e aore râ, a muri a‘e, e afaro te mau mea atoa. Na ô maira te Faaora e: « Eiaha e taiâ to outou aau, eiaha ho‘i e măta‘u ».31 « E pohe to outou i teie nei ao: E faaitoito râ, ua riro te re o teie nei ao ia’u ».32
Te faaite papû nei au e, mai te mea e here outou Ia’na, e ti‘aturi Ia’na, e faaroo Ia’na, e e pee Ia’na, e ite ïa outou i To’na here e Ta’na fariiraa. Mai te mea e, e ui outou e, « Eaha te mana‘o o te Mesia ia’u? » e ite outou e, e pĭpĭ outou Na’na; E hoa outou No’na. Na roto i To’na aroha e rave Oia no outou i te mea e ore e ti‘a ia outou ia rave no outou iho.
Te tia‘i maoro nei tatou i te mau parau opaniraa a to tatou peropheta here. Ua faatoro‘ahia te Peresideni Thomas S. Monson ei Aposetolo na te Fatu ra Iesu Mesia i te 12raa o to’u matahiti. Hau i te 48 matahiti i teie nei, ua haamaitaihia tatou i te faarooraa ia’na ia faaite i te iteraa papû no Iesu Mesia. Te faaite papû nei au e, te ti‘a nei oia i teie nei ei Aposetolo matahiapo na te Faaora i ni‘a i te fenua nei.
Ma te here rahi e te mana‘o faahiahia no te mau pĭpĭ e rave rahi a Iesu Mesia e ere i te melo no teie Ekalesia, te faaite nei matou ma te haehaa e, ua ho‘i mai te mau melahi i ni‘a i te fenua nei i to tatou nei anotau. Te Ekalesia a Iesu Mesia mai Ta’na i haamau i tahito ra, ua faaho‘i-faahou-hia mai ïa, ma te puai, e te mau oro‘a, e te mau haamaitairaa o te ra‘i ra. Te Buka a Moromona, o te hoê ïa ite ê atu no Iesu Mesia.
Te faaite nei au e, o Iesu Mesia te Faaora o te ao nei. Ua mauiui Oia e ua pohe no ta tatou mau hara e ua ti‘afaahou i te rui toru ra. Ua ti‘a faahou Oia. I te mau tau i muri nei, e tuu te mau turi atoa i raro e e fa‘i te mau arero atoa e, Oia te Mesia.33 I taua mahana ra, e ere atura ta tatou mana‘ona‘oraa, « Te feruri ra anei vetahi ê e, e Keresetiano vau? » I taua taime ra, e haere to tatou feruriraa taatoa i ni‘a Ia’na, ei reira to tatou varua e haru ai i ni‘a i te uiraa e, « Eaha te mana‘o o te Mesia ia’u? » Te ora nei Oia. Te faaite papû nei au i te reira na roto i te i‘oa o Iesu Mesia ra amene.