Episekopo Gary E. Stevenson

Episekopo Faatere Rahi

Ua parau te episekopo Gary Evan Stevenson e, ua hi‘o noa oia i te roaraa o to’na oraraa i te ohipa faufaa ta te mau episekopo e rave nei na te ao atoa nei. Ua parau oia no to’na metua tane, « o oia te episekopo no to’u apîraa, e ua faataui roa ta’na huru taviniraa ia’u ».

E rave rahi taime, e titau te metua tane o te episekopo Stevenson ia haere mai oia na muri ia’na no te haere e farerei i te mau vahine ivi o te paroisa, ua hau ratou i te 60 ti‘ahapa. Mai to’na ra metua tane, ua apo mai te episekopo Stevenson i te mau haapiiraa no te taviniraa huru Mesia e te atuaturaa i te feia i roto i te fifi. Te reira mau haapiiraa, ia au i ta’na mau parau, e riro te reira i te tavini maitai ia’na i roto i ta’na piiraa ei Episekopo Faatere Rahi o te Ekalesia.

« O te mau episekopo o te Ekalesia ta’u mau aito rahi », te na ô ra oia. « I te mau mahana tata‘itahi atoa, e faaûruraa ratou no te mau melo o te Ekalesia, te mau tamarii ihoa râ e te feia apî tamaroa e te feia apî tamahine ».

Fanauhia i te ava‘e atete 1955 e Evan N. raua Vera Jean Stevenson, ua paari te episekopo Stevenson i roto i te hoê utuafare huaai no te mau pionie tei tae mai i Cache Valley, i Utah.

I to’na apîraa, ua farii oia i te piiraa ia tavini i te hoê misioni i te fenua Tapone. Ua faatae mai teie tonoraa i te aau o te episekopo Stevenson i te here no te mau pae fenua Asia e no te faaiteraa i te evanelia, e ua vai noa te reira i te roaraa o to’na oraraa.

I muri mai ta’na misioni, ua haere oia i te haapiiraa tuatoru Utah State University. I reira oia i matau ai (e ua otuitui roa to’na mafatu) ia Lesa Jean Higley. Ua faaipoipo raua i te ava‘e eperera 1979 i roto i te hiero no Idaho Falls Idaho. E maha tamaroa to te utuafare Stenvenson.

Ua titau te episekopo Stevenson i te hoê parau tu‘ite no te ohipa hoo e i muri mai ua faati‘a oia e te tahi hoa i te hoê taiete hamaniraa tauiraa i reira oia i te haapa‘oraa i te ti‘araa peresideni.

Ua tavini oia i roto i te tahi mau piiraa rau o te Ekalesia, mai te riroraa ei tauturu i roto i te hoê peresideniraa tĭtĭ, te riroraa ei episekopo, e te riroraa ei peresideni no te Misioni no Japan Nagoya Mission (2004–07). Ua piihia oia i te pŭpŭ matamua no te Hitu Ahuru i te matahiti 2008 e ua tavini oia ei tauturu e ei peresideni no te area no Asia Apatoerau.