Linda K. Burton
Peresideni rahi no te Sotaiete Tauturu
Ei taure‘are‘a tamahine, ua puta mai te hoê mana‘o i roto ia Linda Kjar Burton i te pureraa i Christchurch, Niu Terani. « Ua ite ihora vau e, e parau mau te evanelia », te haamana‘o nei oia. « Ua tae atoa mai te mana‘o e, ua ite a‘ena vau i te reira » E turu te reira iteraa papû ia’na i roto i ta’na taviniraa i teie nei ei peresideni rahi no te Sotaiete Tauturu.
Fanauhia i Roto Miti, i Utaha, i te mau Hau Amui no Marite, e Marjorie C. raua Morris A. Kjar, e 13 matahiti to te tuahine Burton i to’na utuafare faaru‘eraa ia Utah ia nehenehe i to’na metua tane e peresideni i te Misioni no New Zealand South. Te tuahine Burton—te piti o na tamarii e ono—ua haere oia i te fare haapiiraa a te Ekalesia i Niu Terani e ua matau oia i reira i te feia apî o te mau motu no te moana Patifita. Ua ho‘i oia i Roto Miti ma te here rahi no te taua mau peu tumu rau ra e na reira atoa no te Fatu e no to’na utuafare.
Ua haere te tuahine Burton i te haapiiraa tuatoru i te University of Utah e i reira oia i te matauraa e ua faaipoipo roa ia Craig P. Burton i te ava‘e atete 1973 i roto i te Hiero no Roto Miti. Aita na hoa faaipoipo i faataime no te faatupu i te utuafare ; ua fanauhia te matamua o ta ratou na ono tamarii hoê noa matahiti i muri mai.
Ma te ohipa amui e ta’na tane, ua roaa ia’na ia faaea i te fare e te mau tamarii a rave noa ai i te ohipa i roto i te tapihooraa fenua e te fare. Ua haapii oioi mai te mau tamataraa pae faufaa i na hoa faaipoipo ia hi‘o i te ananahi ma te tiaturi « no te mea ua ite maua ua roaa ia maua i te amo i te hoê ohipa teimaha e te tauturu a te Fatu », te faati‘a mai nei oia.
E tau faafaearaa poto rii noa to te utuafare e ua faahiahia amui matou i te reira. Ua tavini te tuahine i roto i te mau apooraa faatere rahi na te Feia Apî Tamahine, na te Haapiiraa Sabati, na te Paraimere e na te Sotaiete Tauturu. Ua pee oia i ta’na tane a peresideni ai oia i te Misioni no Korea Seoul West mai te matahiti 2007 i te matahiti 2010. I roto i te misioni, ua puta mai te mana‘o o te tuahine Burton e—mai tei tupu a‘ena i Niu Terani—te hiti nei te here na ni‘a i te mau reo e te mau peu.
Te hiaai nei oia i roto i teie piiraa apî ta’na e, e tupu faahou mai te mea ta’na i haapii mai te hoê hoa no te fenua Korea: « E ite ratou i to oe here ».