Episekopo Gérald Caussé

Tauturu matamua i roto i te Episekoporaa Faatere Rahi

Mai to’na vai-tamarii-raa, ua ite noa te episekopo Gérald Jean Caussé, tei pii-apî-hia ei tauturu matamua i roto i te Episekoporaa Faatere Rahi, i te oaoa o te taviniraa i roto i te Ekalesia. E ohipa maitai te reira, no te mea, te parau nei oia, i roto i ta’na paroisa iti na‘ina‘i i Bordeaux, i te fenua Farani, na te taatoaraa e tauturu i te haapa‘oraa i te amuiraa. Taa ê atu i ta’na taviniraa i roto i te mau pŭpŭ o te Autahu‘araa a Aarona i to’na apîraa, ua tavini oia ei taata faata‘i piana no te Paraimere i te 12raa o to’na matahiti, i te 14raa o to’na matahiti ua tavini oia ei tauturu i roto i te peresideniraa Haapiiraa Sabati, e i te 16raa o to’na matahiti ua riro mai oia ei peresideni no te Haapiiraa Sabati.

« Na te taviniraa i roto i te Ekalesia i tauturu mai ia’u ia farii i to’u iteraa papû », te na ô ra oia. To’na metua tane, tei tavini e rave rahi taime ei peresideni amaa e ei episekopo, ua riro oia ei rima arata‘i no te episekopo Caussé i roto i te fariiraa i te iteraa maitai.

« I te tau no to’u taure‘are‘araa, e titau mai oia ia’u ia haere na muri ia’na no te haapiiraa utuafare e aore râ no te hahaere i te mau utuafare i roto i te fifi », ua parau mai te episekopo Caussé. « Ua riro mau paha to’u hi‘oraa ia’na ei haapiiraa maitai roa no to’u faaineineraa ei taata faatere i roto i te autahu‘araa ».

I muri mai, ua tavini te episekopo Caussé ei papa‘i parau na te paroisa, ei peresideni pŭpŭ peresibutero, ei ti‘a pŭpŭ tahu‘a rahi, ei tauturu no te episekopo, ei tauturu no te peresideni tĭtĭ, ei peresideni tĭtĭ, ei Hitu Ahuru area, e i teie mau matahiti i ma‘iri ei melo no te pŭpŭ matamua no te Hitu Ahuru.

Ua fanauhia te episekopo Caussé i Bordeaux, i te fenua Farani, i te ava‘e me 1963, e Jean raua Marie-Blanche Caussé. I to’na apîraa, ua tavini oia hoê matahiti i roto i te nuu faehau no te reva no te fenua Farani, i reira ua tonohia oia i te hoê pŭ a te « OTAN ».

E parau tu‘ite « master » ta’na no te ohipa hoo, ua roaa i te haapiiraa ESSEC i te matahiti 1987. Ua haamata oia i ta’na toro‘a ei homana‘o arata‘i taiete, i reira ua ohipa oia e ono matahiti no te hoê taiete homana‘o i Paris e no te tahi mau pû ohiparaa i Lonedona. I muri mai ua ohipa oia no te hoê pŭpŭ taiete hoo i Europa, e na mua noa to’na piiraa i te pŭpŭ matamua no te Hitu Ahuru i te matahiti 2008, te ohipa ra oia ei upoo faatere rahi e ei melo atoa no te tomite faatere o te taiete hoo rahi roa a‘e no Farani.

Ua faaipoipohia oia raua Valérie Lucienne Babin i te ava‘e atete 1986 i te hiero no Bern Switzerland. E pae tamarii ta raua.