Episekopo Dean M. Davies

Tauturu piti i roto i te Episekoporaa Faatere Rahi

Ia ani te peresideni o te Ekalesia i te episekopo Dean Davies ra i te mau haamaramaramaraa no ni‘a i te vahi no te hoê hiero apî, mai te atearaa i te tape‘araa pereoo mataeinaa piri roa a‘e, eita te taea‘e Davies e horo‘a noa mai i te tahi rii noa haamaramaramaraa. Ua ite roa oia i te parau o te taata e haere nei i te hiero no te mea ua na reira mai oia.

« E nahea oe e rave nei i te reira ? » Ua ani te peresideni Gordon B. Hinckley ia’na i te hoê taime.

Te mana‘o papû mau e te haapa‘oraa i te mau tuhaa iti na‘ina‘i atoa, o te huru ïa te episekopo Dean Myron Davies—tei pii-apî-hia i roto i te Episekoporaa Faatere Rahi—i ora na i to’na oraraa.

Fanauhia i Roto Miti, i Utah, i te mau Hau Amui no Marite, i te ava‘e setepa 1951 e Oliver T. raua Myra Davies, ua paari te episekopo Davies i roto i te hoê utuafare i reira te here e te ohipa i te riro ei parau tumu arata‘i. Mai te peu ua hinaaro oia i te hoê mea, ua ti‘a roa ia’na ia ohipa no te fana‘o i te reira. Ia ore ta’na mau haapahiraa onoono e manuia no te farii i te hoê ha‘uti mai to’na metua vahine ra, e fariu ïa oia i te tahi atu rave‘a. Te haamana‘o noa nei oia i te rohirohi o te tino e te oaoa atoa râ ia tura‘i i te matini tapu aihere tahito i roto i te aua o tera taata e ora ra i pihai iho i to ratou fare, e mea teitei maitai ho‘i te aihere.

I muri mai ta’na taviniraa i roto i te Misioni no Uruguay/Paraguay mai te matahiti 1970 i te matahiti 1972, ua ho‘i mai oia no te faaipoipo ia Darla Iakobo, te hoê hoa tamahine ta’na i matau i to’na apîraa, i te ava‘e tiunu 1973 i roto i te hiero no Roto Miti. Ua farii te episekopo Davies i te hoê parau tu‘ite « bachelor » no te tereraa faufaa faaapu mai Brigham Young University i te matahiti 1976 e i muri iho ua farii oia i te tahi haapiipiiraa hau atu i Stanford and Northwestern Universities.

I te roaraa o te mau matahiti, ua ora na oia e ta’na vahine e ta raua na pae tamarii i na ono tuhaa fenua taa ê i te te mau Hau Amui no Marite no te mea ua taui ta’na ohipa ei ohipa tapihooraa fenua e te fare. Ua tavini oia ei peresideni tĭtĭ, ei tauturu i roto i te peresideniraa tĭtĭ, ei melo apooraa teitei e pae taime, i roto i te episekoporaa, e te tahi atu â mau piiraa i roto i te paroisa. Ua tavini atoa oia ei peresideni no te Misioni no Puerto Rico San Juan mai te matahiti 1998 i te matahiti 2001. I te taime no ta’na piiraa hopea, te ohipa ra oia ei upoo faatere no te Tuhaa faatere a te Ekalesia no te mau opuaraa taa ê.

Ta’na i apo mai i roto i te mau ohipa ta’na i ite, o te mea ïa, « te here e te arata‘i nei te Fatu i Ta’na mau tamarii ».