Carole M. Stephens

Tauturu matamua i roto i te peresideniraa rahi no te Sotaiete Tauturu

E faaturaraa noa ta Carole Manzel Stephens no te mau mea mo‘a e te hanahana. Ua haamata tera huru faatura i to’na apîraa, i te taime ua taatihia to’na utuafare i roto i te hiero i muri mai to’na metua vahine fariuraa i te evanelia.

« Aita i papû roa ia’u te mea atoa i tupu », te parau ra te tauturu matamua apî no te peresideniraa rahi o te Sotaiete Tauturu. « Ua ite râ vau e, e ohipa taa ê te reira. Ua nava‘i to’u paari no te haamana‘o e, e vahi mo‘a te hiero ».

Fanauhia i te ava‘e mati 1957 e Carl L. raua Forest Manzel, o te tuahine Stephens te toru o na iva tamarii tei paari i Ogden, i Utah, i te mau Hau Amui no Marite. Te haamana‘o maitai nei oia i te hi‘oraa o to’na na metua no te taviniraa, te faatusiaraa, e te auraa atoa no te faariroraa i te utuafare e te Ekalesia ei matameha‘iraa rahi.

« Ua riro te evanelia ei taaatoaraa no raua, e ua faaite raua i te reira ia matou na roto i te taviniraa huru Mesia », te na ô ra oia. « Ua haapii mai raua ia matou i te huru mau no te taviniraa—nahea mau e tavini ».

A tavini noa ai to’na na metua i te mau vahi ĕê, ua titau atoa mai raua i ta raua na tamarii. I te reira mau taime ratou i te faatupuraa i te faahoaraa no te tahi e te tahi—te hoê ho‘i mea ta’na e ta’na tane, o Martin « Marty » Stephens, i tamata i te rave e ta raua na tamarii e ono.

Ua matau raua i to raua haereraa i te Weber State University i Ogden, i Utah, i reira raua i haapii mai i te parau no te haapiiraa tamarii. Ua faaipoipo raua i te ava‘e eperera 1976 i roto i te hiero no Logan Utah. Ua parau te tuahine Stephens e, ua riro oia raua ta’na tane ei pŭpŭ tahoê maitai na roto i te mau matahiti e ua turu raua te tahi i te tahi i roto i te mau ohipa atoa, mai ta’na mau piiraa ei peresideni Sotaiete Tauturu i roto i te tĭtĭ e te paroisa, ei tauturu, e ei orometua ; ei peresideni Feia Apî Tamahine ; ei tauturu no te Paraimere paroisa, ei orometua, e ei ti‘a haapa‘o « scout » ; ei orometua haapiiraa evanelia ; e ei misionare totauturu a te Ekalesia.

« I roto i taua ohipa rahi ra, ua ite maua i te popou rahi e te oaoa », te na ô ra oia. « Ua titau atoa maua i ta maua na tamarii e mootua i roto ta maua taviniraa. No reira, ua faatupu matou i te mau auraa puai i roto i te utuafare a tavini amui noa ai matou ».