Linda S. Reeves

Tauturu piti i roto i te peresideniraa rahi no te Sotaiete Tauturu

I to’na apîraa, ua haapii Linda Sheffield Reeves mai to’na metua vahine itoito ia fariu i te Atua i te taime ati e mai to’na metua tane, ia tutava ia tae i te maitai-roa-raa.

« Oioi roa vau i roto i to’u oraraa i te fariiraa i te iteraa papû puai no te mau tamataraa tei tauturu ia’u ia paari oioi i te pae varua », te na ô ra oia.

Ua fanauhia te tuahine Reeves i Los Angeles, i California, i te mau Hau Amui no Marite, i te ava‘e atete 1951 e Elbert Jolley raua Barbara Welsch Sheffield Te haamana‘o nei oia i te hi‘oraa i te ra‘i, e 13 matahiti to’na e tei te hoê puhaparaa na te Feia Apî Tamahine ma te pûpû i te hoê pure ohie o te aau: « E te Metua, tei reira anei Oe ? »

« Ua puohuhia vau i roto i To’na Varua, e te ite no te parau mau o To’na parau, e To’na here no’u nei », te parau ra oia.

Ua matau te tuahine Reeves ia Melvyn Kemp Reeves i ta’na paroisa i Pasadena. Ua arapae oia ia’na a haere ai raua i te haapiiraa Brigham Young University i te otiraa i ta’na misioni Ua faaipoipo raua i te ava‘e tiunu 1973 i roto i te hiero no Los Angeles California e ua riro mai raua e metua no na 13 tamarii.

I rotopu i ta’na mau tamataraa, ua tape‘a noa te tuahine Reeves i to’na iteraa papû no te Taraehara, i te taime ihoa râ o te pohe o ta’na tamahine 17 matahiti, o Emily Michelle, i roto i te hoê ati purumu i te matahiti 2005.

« E orometua rahi te ati », te na ô ra oia. « E patu e e faaineine te ati ia tatou no te taviniraa araua‘e i roto i te basileia, i roto i to tatou utuafare, e i rotopu i te huiraatira, e e faariro atoa te reira ia tatou ei mauihaa i roto i te rima o te Fatu ».

Na mua i ta’na piiraa i roto i te peresideniraa rahi no te Sotaiete Tauturu, ua tavini te tuahine Reeves na muri i ta’na tane a peresideni ai oia i te Misioni no California Riverside mai te matahiti 2008 i te matahiti 2011. Ua tavini oia ei peresideni Sotaiete Tauturu i roto i te tĭtĭ, ei peresideni Feia Apî Tamahine i roto i te paroisa, ei taata arata‘i himene i te Paraimere paroisa, e ei orometua i te Haapiiraa Sabati.

I te matahiti 1974, ua farii te tuahine Reeves i te hoê parau tu‘ite « bachelor » no te haapiiraa taa ê i te fare haapiiraa BYU. Ua rau ta’na mau ohipa au, mai te ano‘ihi, te upaupa, te pataraa hoho‘a, te aamu utuafare, e te ohipa misionare. Aita oia e taiâ nei e parau i to’na mana‘o, no te faaite ihoa râ i te evanelia a Iesu Mesia i te taata atoa ta’na e farerei nei.