Nahea e noaa ai te heheuraa e te faaûruraa no to outou iho oraraa
No te aha te Fatu e hinaaro nei ia tatou ia pure Ia’na e ia ani atu tatou ? No te mea, tera te rave‘a te heheuraa e fariihia.
Te taata atoa e ti‘a i teie nei terono no te faatae i te hoê poro‘i, e farii ihoa ratou i te puai e te faaitoitoraa o te mau melo na te ao atoa nei. Ua mauruuru vau i te mea e, e nehenehe atoa i teie faaitoitoraa e tae mai te hoa here i te tahi pae o te paruru. Mauruuru ia oe, e Jeanene.
E faaite mai te Varua Maitai i te haamaramaramaraa faufaa rahi e hinaarohia e tatou no te arata‘i ia tatou i roto i to tatou tere tahuti nei. Mai te mea e mea papû maitai, mea maramarama maitai e e mea titauhia taua haamaramaramaraa ra, e piihia ïa te reira te heheuraa. Mai te mea e mau faaûruraa e ti‘a ïa ia tatou ia arata‘i maitehia e ia tae atu i te hoê fâ maitai na roto i teie parau poro‘i, e faaûruraa ia te reira.
Te hoê hoho‘a no te heheuraa o te arata‘iraa ïa ta te peresideni Spencer W. Kimball i farii i muri a‘e i to’na taparu-tamau-maoro-noa-raa i te Fatu no ni‘a i te horo‘araa i te autahu‘araa i te mau tane ti‘amâ atoa i roto i te Ekalesia o ta te tahi noa hoi o ratou e mau ra i taua taime râ.
Te tahi â hoho‘a no te heheuraa o teie ïa arata‘iraa tei horo‘ahia i te peresideni Josepha F. Semita: « Te ti‘aturi nei au e te nuu nei tatou e tei mua tatou i te aro o te mau ve‘a e o te mau taata no te ra‘i. Aita tatou i atea ê ia ratou… Ua tu‘atihia tatou i to tatou mau fetii, to tatou mau tupuna… tei na mua’tu ia tatou i roto i te ao varua. Eita e nehenehe ia tatou ia haamo‘e ia ratou; eita tatou e faaea i te here ia ratou; e tape‘a noa tatou ia ratou i roto i to tatou mau aau e to tatou mau haamana‘oraa, e no reira ua apitihia e ua tahoêhia tatou ia ratou na roto i te mau taamu e ore roa e nehenehe ia tatou ia vavahi… Mai te mea teie to tatou huru i roto i te oraraa tahuti nei, haatihia e to tatou mau paruparu tahuti… eaha’tu â ïa te papûraa… ia ti‘aturi e e te feia tei haapa‘o, tei pohe… ua nehenehe ïa ratou ia ite maitai mai ia tatou eiaha ra tatou ia ratou, e ua matau maitai a‘e ratou ia tatou aita ra tatou ia ratou… Te ora nei tatou i mua i to ratou aro, te ite nei ratou ia tatou, te haape‘ape‘a nei ratou no to tatou orara maitai, ua rahi atu â to ratou here ia tatou i teie nei. Te ite nei ratou i teie nei i te mau ati e tamata nei ia tatou… to ratou here e to ratou hinaaro no to tatou oraraa maitai i rahi a‘e ai i ta tatou iho e mana‘o nei no tatou iho ».1
E nehenehe i te mau auraa e ratou i ô mai i te paruru, o ta tatou i matau e o ta tatou e here nei, e haapuaihia. E roaa te reira na roto i te tutavaraa papû ia tamau noa i te rave i te mea maitai. E nehenehe ta tatou e haapuai i to tatou auraa e ratou tei faaru‘e, e o ta tatou e here nei, na roto i te iteraa e, e tau poto noa no te taa-ê-raa e e mea mure ore te mau fafauraa i ravehia i roto i te hiero. Ia haapa‘o-tamau-hia ana‘e te reira, e haapapû mai taua nau fafauraa ra i te noaaraa mure ore o te mau faufaa tei roto ia ratou.
Te hoê taime papû ua farii au i te heheuraa i roto i to’u oraraa, o te taime ïa vau i faaûru-puai-hia e te Varua ia ani ia Jeanene Watkins e taati ia’u i roto i te hiero.
Te hoê o te mau haapiiraa rahi e ti‘a ia tatou tata‘itahi ia haapii mai, oia ho‘i, ia ani atu tatou. No te aha te Fatu e hinaaro nei ia tatou ia pure Ia’na e ia ani atu tatou ? No te mea, tera te rave‘a te heheuraa e fariihia.
Ia faaruru ana‘e au i te hoê ohipa fifi roa, teie ïa te mea ta’u e rave no te tamata i te ite i te mea e rave. E haapae au i te maa. E pure au no te imi e no te ite i te mau papa‘iraa mo‘a e nehenehe e tauturu. E faaohu noa teie rave‘a. E haamata vau i te tai‘o i te hoê irava; e feruri au i te auraa o te irava e e pure au no te faaûruraa. I muri iho e feruri au e e pure au no te ite mai te mea ua noaa ia’u te mau mea atoa ta te Fatu e hinaaro ia’u ia rave. E mea pinepine te mau faaiteraa i te tae mai e te hoê iteraa rahi no ni‘a i te haapiiraa tumu. Ua ite au e e rave‘a maitai teie no te haapii mai roto mai i te mau papa‘iraa mo‘a.
Te vai nei te tahi mau parau tumu o te faarahi i te heheuraa. A tahi, te toparaa i roto i te riri aore râ te inoino aore râ te pato‘iraa, e faatea ê ïa te reira i te Varua Maitai. E ti‘a i taua mau mea ia faaorehia, oi e iti mai te fariiraa i te heheuraa.
Te tahi atu parau tumu, o te haapa‘o-maitai-raa ïa i te parau arearea. E faainoino te ata pahô e te tano ore i te Varua. E tauturu te faahitiraa i te parau arearea tano i te heheuraa; eita te ata pahô e na reira. Ua riro te faahitiraa i te parau arearea ei haamaîraa i te mau haape‘ape‘araa o te oraraa.
Te tahi atu enemi i te heheuraa e tae mai ïa na roto mai i te faarahiraa aore râ te maniania i te mea i faahitihia. Te hoê a‘oraa mărû e te hau e faarahi ïa i te mana no te farii i te heheuraa.
I te tahi pae, e nehenehe i te faaiteraa pae varua e faarahihia na roto i te ora maitai o te tino. Te faaetaetaraa tino, te faito taoto tano, e te amu-tano-raa i te maa, na te reira e faarahi i to tatou faito aravihi no te farii e no te maramarama i te heheuraa. E ora ïa tatou i te ora i faataahia no tatou. Atira noa’tu, e nehenehe ta tatou e haamaitai mai i na mea toopiti, te maitai o ta tatou taviniraa e te maitai o to tatou tino na roto i te raveraa i te mau ma‘itiraa maitai e te tano.
E mea faufaa ia ore ta tatou mau ohiparaa i te mahana tata‘itahi e faahahi ê ia tatou mai te faarooraa i te Varua.
E nehenehe atoa ta te heheuraa e tae mai na roto i te hoê moeamoea i te taime ite-ore-hia a hee ai tatou mai te taoto i te araraa. Mai te mea e tutava outou i te haru mai i te mea i roto i te reira ihoâ taime, e nehenehe ïa ta outou e tapa‘o i te mau mea atoa, aita ana‘e e ore oioi ïa te reira. E apeehia te faaiteraa faaûruhia i te pô e te hoê mana‘o mo‘a no te taatoaraa o te ohipa tei tupu. E faaohipa te Fatu i te mau taata ta tatou e faatura rahi nei no te haapii ia tatou i te mau parau mau i roto i te hoê moemoea no te mea, te ti‘aturi nei tatou ia ratou e no te mea, e faaroo tatou i ta ratou a‘o. O te Fatu ïa e haapii ra na roto i te Varua Maitai. Are‘a râ, e nehenehe Ta’na na roto i te moemoea e faaohie i te maramaramaraa e te haaputapûraa i to tatou mau aau na roto ïa i te haapiiraa ia outou na roto i te tahi taata ta tatou i here e e faatura.
E ohipa ana‘e na te Fatu, e nehenehe Ta’na e faahaamana‘o mai ia tatou i te mau mea atoa. Eiaha râ te reira e haaparuparu i to tatou mana‘o papû ia tapa‘o i te mau faaûruraa a te Varua. E faaite te tapa‘o-maite-raa i te faaûruraa i te Atua i te huru mo‘a o te reira no tatou nei. E riro te tapa‘oraa i te tauturu rahi a‘e ia tatou no te haamana‘o i te heheuraa. E mea ti‘a i teie mau tapa‘opa‘oraa i te arata‘iraa o te Varua e paruruhia ia ore te reira e mo‘e e ia ore te reira e tai‘o-haere-hia e vetahi ê.
Te horo‘a nei te mau papa‘iraa mo‘a i te haapapûraa rahi i te huru te parau mau, ia ora-tamau-hia ana‘e, e iriti i te uputa no te faaûruraa no te ite mai i te mea e rave atu e, i te taime hinaarohia, no te farii i te faito aravihi rahi a‘ena roto i te mana hanahana. Te faaite nei te mau papa‘iraa mo‘a e nahea te faito aravihi o te hoê taata, no te upootia i te fifi, i te feaa e te mau tamataraa huru rahi roa, e haapuaihia e te Fatu i te taime e hinaarohia. A feruri ai outou i tera mau hi‘oraa, e tae mai tera haapapûraa mărû na roto i te Varua Maitai e, e aamu mau te reira. E riro atoa outou i te ite e, e roaa atoa ia outou te tauturu mai teie te huru.
Ua ite a‘enei au i te tahi mau taata tei faaruru i te mau tamataraa e ua ite ratou eaha te rave atu a tapo‘i noa mai te tamataraa ia ratou, no te mea, ua tiaturi ratou i te Fatu e ua ite ratou e, e faaite mai Oia ia ratou i te mau pahonoraa e titau-ru-hia nei.
Ua parau te Fatu e : « E e riro outou i te haapiihia mai mai ni‘a mai ra. A haamo‘a na outou ia outou iho e e horo‘ahia mai ai te mana, ia horo‘a’tu outou mai te au i ta’u i parau ra ».2 E riro paha te parau haamo‘a na outou ia outou iho i te faatupu i te uiuiraa. Ua faataa mai te peresideni Harold B. Lee e, e nehenehe ta outou e taui i te reira mau parau e te parau « haapa‘o i ta’u mau faaueraa ». Ia tai‘ohia mai te reira, e mea papû roa ïa te parau a‘o.3
E ti‘a i te hoê ia vai mâ i te aau e i te tino e ia faaite i te hinaaro mau e te viivii ore ia nehenehe i te Fatu e faaûru ia’na. O oia te haapa‘o i Ta’na mau faaueraa, e tiaturi to te Fatu ia’na. E roaa i teie taata Ta’na faaûruraa no te ite i te mea e rave atu, e mai te mea ua hinaarohia ra, te puai hanahana atoa ïa no te rave i te reira.
No te faarahi a‘e e no te faaineine a‘e i to tatou puai varua, e ti‘a i te reira ia tanuhia i te vahi parau-ti‘a. Ua riro te te‘ote‘o, te aau faaoru, e te papavaha mai te hoê vahi ofa‘ifa‘i i reira eita te hotu e horo‘a mai.
Ua riro te haehaa ei vahi repo maitai i reira te puai varua e tupu mai e e faahotu mai i te hotu no te faaûruraa ia ite i te mea e rave atu. E iriti te reira i te puai hanahana no te rave hope i te mea e ti‘a ia ravehia. Eita te taata e haa nei no to’na iho arueraa e to’na roo maitai e faati‘a ia’na ia haapiihia e te Varua. Te taata e haate‘ote‘o nei e e tuu nei i to’na mana‘o ei arata‘iraa no te mau faaotiraa, eita ïa oia e arata‘i-puai-hia e te Varua.
Mea faaûru-ohie-hia a‘e tatou ia riro ana‘e tatou ei mauhaa no vetahi ê, eiaha râ ia mana‘o ana‘e tatou ia tatou iho. Na roto i te tautururaa ia vetahi ê, e nehenehe ta te Fatu e apiti mai i te mau arata‘iraa no to tatou iho maitai.
Aita to tatou Metua i te Ao ra i tuu ia tatou i ni‘a i te fenua nei ia fati mai tatou, ia manuia râ ma te hanahana. E mea huru ê ihoa paha, tera râ, te reira mau te tumu e fifi rii tatou i te tahi taime ia ite maitai i te pahonoraa i te pure. Te tahi mau taime, e tamata tatou, ma te paari ore, ia faaruru i te oraraa na ni‘a noa i to tatou ite e to tatou faito aravihi. E paari a‘e no tatou ia imi na roto i te pure e te faaûruraa, ia ite eaha te rave atu. E haapapû mai to tatou haapa‘o maitai i te reira i te taime hinaarohia, e nehenehe ta tatou e faati‘a ia tatou i te puai hanahana no te rave hope i te hoê opuaraa i faaûruhia.
Mai te rahiraa o tatou, aita Oliver Cowdery i ite i te tapa‘o no te mau pahonoraa i te mau pure tei horo‘a-a‘ena-hia mai e te Fatu. No te iriti i to’na e i to tatou mau mata, ua horo‘ahia teie heheuraa na roto ia Iosepha Semita:
« E ao to oe no te ohipa ta oe i rave; no te mea ua ani mai hoi oe ia’u nei, e inaha, i ta oe mau aniraa’toa i farii na hoi oe i te haapiiraa o to’u nei Varua. Ahiri aita râ, aore ïa oe i tae mai na i te vahi i parahihia e oe i teie nei.
« Inaha, ua ite oe e ua ani mai oe ia’u nei e ua haamaramarama vau i to oe feruriraa; ei teie nei te faaite nei au i teie mau mea ia ite hoi oe e ua haamaramaramahia oe e te Varua no te parau mau ».4
Mai te mea e mana‘o outou e aita te Atua i pahono i ta outou mau pure, a feruri i teie mau papa‘iraa mo‘a—e a hi‘o maite i te tapa‘o i roto i to outou iho oraraa e, ua pahono a‘ena Oia ia outou.
E piti faaiteraa no te haapapû e, no ô mai i te Atua ra te mea i to outou aau e aore râ te faaûruraa, e faatupu te reira i te hau i te aau e e tae mai te mana‘o mărû e te mahanahana. Ia pee outou i te mau parau tumu ta’u i vauvau atu, e faaineine outou ia outou ia ite mai i te heheuraa i te mau taime fifi rahi o to outou oraraa.
Rahi noa’tu outou i te pee i te arata‘iraa hanahana, rahi atoa’tu to outou oaoa i ô nei e a muri atu—Hau atu â, e rahi atoa’tu to outou nuuraa i mua e to outou faito aravihi ia tavini. Aita i papû maitai roa ia’u e nahea ra teie ohipa, tera râ, aita teie arata‘iraa i roto i to outou oraraa e rave ê atu i to outou ti‘amâraa. E nehenehe ta outou e rave i te mau faaotiraa ta outou e hinaaro e ma‘iti. A haamana‘o râ, na te hinaaro ia rave i te mea maitai e faatae mai i te hau o feruriraa e te oaoa.
Ia hape noa’tu te ma‘itiraa, e nehenehe i te reira e faatitiaifarohia na roto i te tatarahapa. Ia pahono-oti-hia te mau titauraa, e faatae mai te Taraehara a Iesu Mesia, to tatou Faaora, i te haamâmâraa o te mau aniraa o te parau-ti‘a no te mau hape i ravehia. E mea ohie roa e e mea nehenehe taa ê mau. A tamau noa ai outou i te ora ma te parau-ti‘a, e faaûru-tamau-hia’tu outou no te ite eaha te rave atu. Te tahi mau taime, e riro te iteraa i te mea e rave atu i te titau mai i te itoito rahi e te tiaturi rahi mai outou. Noa’tu râ, e faaûruhia outou ia ite i te mea e rave atu a pahono noa ai outou i te mau titauraa no taua arata‘iraa hanahana ra i roto i to outou oraraa, maoti ho‘i, te haapa‘oraa i te mau faaueraa a te Fatu, te tiaturiraa i Ta’na opuaraa oaoa e te hanahana, e te haapaeraa i te mau mea atoa e pato‘i nei i te reira.
Aita te paraparauraa i te Metua i te Ra‘i i te hoê ohipa faufaa ore. E haamaitairaa mo‘a te reira. Ua niuhia te reira i ni‘a i te mau parau tumu mure ore e te taui ore. E farii tatou i te tauturu mai to tatou Metua i te Ao ra ei pahonoraa i to tatou faaroo, to tatou haapa‘o-maitai-raa, e i te faaohipa-tano-raa i to tatou ti‘amâraa.
Ia faaûru mai te Fatu ia outou ia ite e ia faaohipa i te mau ture o te arata‘i atu i te heheuraa e te faaururaa no outou iho i te i‘oa o Iesu Mesia, amene.