Elder Stanley G. Ellis

No te Hitu Ahuru

Ua ite ihoa Elder Stanley Gareld Ellis e, eita e nehenehe i te hoê taata e faati‘a i te parau no te Atua na roto i te tahi mau tuatapaparaa aivanaa, are‘a i te fare haapiiraa tuatoru no Harvard University, ua haapii oia e, e nehenehe ta’na e faati‘a i te parau no te Atua na roto i te tamataraa i Ta’na mau fafauraa. I te afaraa o te matahiti no te matahiti matamua, ua pau ta’na moni e ua imi atura i te hoê ohipa no te aufau i ta’na mau haamau‘araa. Noa’tu e, ua feaa oia e, ia aufau oia i ta’na tufaa ahuraa e nava‘i mai ta’na moni no ta’na mau haamau‘araa, ua faaoti râ oia ia « tamata » i te Fatu (hi‘o Malaki 3:10).

« Ua aufau na mua vau i ta’u tufaa ahuru, e i reira ua tupu mai te hoê semeio », te na ô ra Elder Ellis, o oia tei faanuu-apî-hia mai te pŭpŭ piti no te Hitu Ahuru i te pŭpŭ matamua. « Ua nava‘i ta’u moni e tae roa’tu te taime aufauraa no muri iho. E ua na reira noa i te mau hepetoma piti atoa tera ono ava‘e. Na roto i te tamataraa i te Fatu, ua haapuai au i to’u iteraa papû e, te ora nei Oia e te haapa‘o nei Oia i Ta’na mau fafauraa ».

Ua fanauhia Elder Ellis e Stephen raua Hazel Ellis i te ava‘e tenuare 1947 i Burley, i Idaho, i te mau Hau Amui no Marite, e ua paari oia i te hoê fare faaapu. Hoê matahiti to’na haereraa i Harvard e ua tavini atura i roto i te Misioni i te fenua Beresiria mai te matahiti 1966 e 1968. I to’na ho‘iraa mai, ua faaipoipo oia ia Kathryn Kloepfer i te ava‘e tiunu 1969 i roto i te hiero no Los Angeles California. E iva tamarii ta raua.

I muri mai te noaaraa o ta’na parau tu‘ite mai Harvard ra, e parau tu‘ite no te ohipa faatereraa, ua farii oia i te hoê parau tu‘ite no te ohipa o te ture mai Brigham Young University. Ua ohipa Elder Ellis no te pû faatereraa titau tute e ua riro atoa ei ti‘a haamana i roto i te hoê taiete haapa‘o faufaa moni.

Na mua a‘e ta’na piiraa i te pŭpŭ matamua no te Hitu Ahuru, ua tavini Elder Ellis i roto i te mau peresideniraa no te area no Marite Apatoerau, te mau pae Apatoa Too‘a o te râ, te area no Beresiria Apatoerau, te area no Beresiria, e i roto atoa i te Apooraa hi‘opo‘araa i te mau tauiraa feia faatere e oti‘a. Mai te matahiti 1999 i te matahiti 2002, ua tavini oia ei peresideni no te Misioni no Brazil São Paulo North. Ua riro atoa oia ei peresideni tĭtĭ, ei tauturu i roto i te hoê peresideniraa tĭtĭ, melo apooraa teitei, tauturu i roto i te hoê episekoporaa, peresideni no te pŭpŭ peresibutero, e peresideni no te Feia Apî Tamaroa i roto i te paroisa e te tĭtĭ.